လားရှိုးမြို့၌ လာရောက်ခိုလှုံသည့် ကျောက်မဲနှင့် သီပေါဒေသမှ စစ်ဘေးရှောင်အများစုမှာ ယနေ့ အောက်တိုဘာ (၂၀)ရက်တွင် နေရပ်ပြန်ကြပြီဖြစ်ကြောင်း ဒေသခံသတင်းရင်းမြစ်များထံက သိရသည်။
မြန်မာ့တပ်မတော်က ယခုအောက်တိုဘာလအတွင်း ကျောက်မဲနှင့် သီပေါမြို့ကို ပြန်လည်ထိန်းချုပ်အပြီး (၂)ရက်အကြာတွင် ဒေသခံများနေရပ်သို့ ပြန်ကြခြင်းဖြစ်ကြောင်း ဆိုသည်။
အဆိုပါ ကျောက်မဲနှင့် သီပေါဒေသခံများအတွက် လားရှိုးမြို့ခံများက ကားများစီစဉ်ပေးကာ နေရပ်မြို့အထိ အခမဲ့ပို့ဆောင်ပေးကြကြောင်း သိရသည်။
“ပြန်တဲ့သူတွေလည်း ပြန်ကြပြီပေါ့။ ကျန်တာသေးလည်းရှိပါသေးတယ်။ နောက်ရက် ဖြည်းဖြည်းချင်းတော့ ပြန်ဖို့လုပ်နေသူတွေလည်း ရှိပါတယ်။ သူတို့မြို့တွေမှာက ဝန်ထမ်းမိသားစုတွေလည်း ရောက်နေပြီလေ။ ကျောင်းတွေလည်း ပြန်ဖွင့်ပြီဆိုတော့ ကျောင်းတက်နေတဲ့သူတွေကတော့ အမြန်ပြန်ကြတာပေါ့”ဟု ဆိုသည်။
လက်ရှိတွင် ကျောက်မဲမြို့၌ အခြေခံပညာကျောင်းများ ပြန်လည်ဖွင့်လှစ်သင်ကြားပေးလျက်ရှိရာ အောက်တိုဘာ (၁၈)ရက်အထိ ကျောင်း(၆)ကျောင်း ဖွင့်လှစ်နိုင်ခဲ့ပြီးဖြစ်ကြောင်း သိရသည်။