ကုန်သွယ်မှုမြှင့်တင်ရန် ကွာလာလမ်ပူ-ဘန်ကောက် ကုန်ရထား ပြေးဆွဲမည်

နှစ်နိုင်ငံအကြားနှင့် ဒေသတွင်း ကုန်သွယ်ရေးမြှင့်တင်ရန်အတွက် ယခုနှစ်တွင် ကွာလာလမ်ပူ-ဘန်ကောက် တိုက်ရိုက်ကုန်ရထားလမ်းချိတ်ဆက်မှု စတင်ရန် မလေးရှားက စီစဉ်နေသည်ဟု ပို့ဆောင်ရေးဝန်ကြီးကို ကိုးကား၍ နိုင်ငံပိုင်မီဒီယာက ဖော်ပြခဲ့သည်။
          
ယင်းစီမံကိန်းကို အစိုးရအဖွဲ့နှင့် ဝန်ကြီးချုပ်က အတည်ပြုထားပြီး ယခုနှစ်ကုန်ပိုင်းတွင် ရထားလမ်းဝန်ဆောင်မှုအတွက် လုပ်ငန်းပိုင်းစတင်နိုင်ရန် မျှော်လင့်သည်ဟု သယ်ယူပို့ဆောင်ရေးဝန်ကြီး အန်ထော်နီလုပ် က ပြောကြားသည်ဟု ဘနားမားသတင်းဌာနက တနင်္ဂနွေနေ့တွင် ဖော်ပြခဲ့သည်။
             
“ကွာလာလမ်ပူ-ဘန်ကောက် တိုက်ရိုက်ရထားလမ်းချိတ်ဆက်မှုက လာအို၊ တရုတ်နဲ့ ဗဟိုအာရှအပါအဝင် အခြားနိုင်ငံများနဲ့ဆက်သွယ်မှုကိုလည်း တိုးတက်စေပါလိမ့်မယ်” ဟု လုပ်က ပြောကြားခဲ့သည်။ စီမံကိန်းဆိုင်ရာ အသေးစိတ်အချက်အလက်များကိုမူ သတင်းတွင် မဖော်ပြခဲ့ပေ။
        
ယင်းကိစ္စနှင့် ပတ်သက်၍ မှတ်ချက်ပေးရန် တောင်းဆိုမှုကို ထိုင်းနိုင်ငံ သယ်ယူပို့ဆောင်ရေးဝန်ကြီးဌာန ပြောရေးဆိုခွင့်ရှိသူက လတ်တလောတွင် တုန့်ပြန်ဖြေကြားခြင်း မရှိပေ။
             
မလေးရှားသည် ထိုင်းနိုင်ငံနှင့်ထိစပ်နေသည့် ၎င်း၏ နယ်စပ်သို့ ချိတ်ဆက်မည့် တရုတ်ဦးဆောင်သော ရထားလမ်းစီမံကိန်းကို တိုးချဲ့ရန် စဉ်းစားသွားမည်ဟု ပြီးခဲ့သည့်နှစ်တွင် ပြောဆိုထားသည်။ ၄၁၃ မိုင်ရှည်လျားသည့် ရထားလမ်းသည် ၂၀၂၆ နှစ်ကုန်ပိုင်းတွင် အပြီးသတ်မည်ဖြစ်ကာ မလေးရှားနိုင်ငံ၏ အရှေ့ပိုင်းနှင့် အနောက်ပိုင်းကမ်းရိုးတန်းဒေသများကို ဆက်သွယ်ပေးမည်ဖြစ်သည်။
           
တရုတ်သည် မလေးရှားနှင့် ထိုင်းနိုင်ငံတို့၏ အကြီးဆုံး ကုန်သွယ်ဖက်နိုင်ငံဖြစ်သည်။ အမေရိကန်သမ္မတ ဒေါ်နယ်ထရမ့်ပ်သည် တရုတ်နိုင်ငံအပေါ် အခွန်စည်းကြပ်မှု ၁၄၅ ရာခိုင်နှုန်း ချမှတ်ထားသကဲ့သို့ မလေးရှားနှင့် ထိုင်းနိုင်ငံတို့သည်လည်း စည်းကြပ်မှု ၂၄ ရာခိုင်နှုန်းနှင့် ၃၆ ရာခိုင်နှုန်း အသီးသီးချမှတ်ထားမှုကို ရင်ဆိုင်နေရသည်။
        
လုပ် သည် ပြီးခဲ့သည့်သီတင်းပတ်က ဘန်ကောက်သို့သွားရောက်ခဲ့ကာ ထိုင်းနိုင်ငံ သယ်ယူပို့ဆောင်ရေးဝန်ကြီးနှင့် တွေ့ဆုံခဲ့ပြီး နယ်စပ်ဖြတ်ကျော် ခရီးသွားလုပ်ငန်းကို မြှင့်တင်ရန်အတွက် ကွာလာလမ်ပူနှင့် ဘန်ကောက်အကြား ခရီးသွားများအတွက် တိုက်ရိုက်ရထားလမ်းဝန်ဆောင်မှုများ ပြန်လည်အသက်ဝင်လာစေရန် ရည်ရွယ်ထားသည်ဟု အစောပိုင်းတွင် ကြေညာခဲ့သည်။
         
အဆိုပါဝန်ဆောင်မှုအတွက် လက်ရှိရထားလမ်းပိုင်းကို အသုံးပြုသွားမည်ဖြစ်ကာ ပြင်ဆင်မှုများအတွက် မလေးရှားနှင့် ထိုင်း မီးရထားအော်ပရေတာများကို သုံးလအချိန်ပေးထားသည်ဟု ၎င်းက ပြောကြားခဲ့သည်။

Ref: ဘန်ကောက်ပို့စ်