ကုန်သွယ်ခွန်များဆိုင်းငံ့ပေးရန် ကိုလံဘီယာ ကထရမ့်ပ်ကိုတောင်းဆို

ဩဂုတ်လ ၁၆ ရက်

ကိုလံဘီယာနိုင်ငံသမ္မတသစ် အာဘဲလာဒို ဒီ လာ အက်စ်ပရီယယ်လာက ပြင်းထန်သော ငလျင်ဒဏ်ကြောင့် ထိခိုက်ခံစားနေရသည့် ၎င်း၏ တောင်အမေရိက နိုင်ငံအပေါ် လက်ရှိ စည်းကြပ်ထားသော ကုန်သွယ်ခွန်များကို ခေတ္တဆိုင်းငံ့ပေးပါရန် အမေရိကန် သမ္မတ ဒေါ်နယ်ထရမ့်ပ်ကို စနေနေ့က တောင်းဆိုလိုက်သည်။

ဇူလိုင်လကုန်ပိုင်းတွင် ကော်ဖီနှင့် ရေနံစသည့် ကင်းလွတ်ခွင့် ရရှိထားသော ကုန်ပစ္စည်း အနည်းငယ်မှအပ ကိုလံဘီယာ ကုန်ပစ္စည်းများအပေါ် စည်းကြပ်သည့် အမေရိကန်၏ ကုန်သွယ်ခွန်သည် ၁၀ ရာခိုင်နှုန်းမှ ၁၂.၅ ရာခိုင်နှုန်းအထိ မြင့်တက်လာခဲ့သည်။

“ငလျင်ရဲ့ ရိုက်ခတ်မှုတွေကြောင့် အလွန်ခက်ခဲတဲ့ ကာလကို ရင်ဆိုင်နေရတဲ့ ကျွန်တော်တို့ရဲ့ စီးပွားရေးလုပ်ငန်းရှင်တွေကို သက်သာရာရစေဖို့အတွက် ကိုလံဘီယာ ကုန်ပစ္စည်းတွေအပေါ် သက်ရောက်နေတဲ့ မြင့်မားတဲ့ ကုန်သွယ်ခွန်တွေကို ယာယီဆိုင်းငံ့ပေးဖို့ ကျွန်တော် သူ့ကို မေတ္တာရပ်ခံခဲ့ပါတယ်” ဟု ဒီ လာ အက်စ်ပရီယယ်လာ က လူမှုကွန်ရက်တွင် ရေးသားဖော်ပြခဲ့သည်။

တိုးမြှင့်လိုက်သော ကုန်သွယ်ခွန်များသည် ယခုနှစ် စတင်ပိုင်းတွင် ထရမ့်ပ် ထုတ်ပြန်ခဲ့သည့် သက်တမ်းကုန်ဆုံးတော့မည့် ကမ္ဘာလုံးဆိုင်ရာ အခွန်နှုန်းထားများ၏ နေရာ၌ အစားထိုး၍ ဇူလိုင်လ ၂၄ ရက်တွင် စတင် အာဏာတည်ခဲ့ခြင်း ဖြစ်သည်။

တနင်္လာနေ့က လှုပ်ခတ်ခဲ့သည့် ပြင်းအား ၇.၄ အဆင့်ရှိ ငလျင်ကြောင့် သေဆုံးခဲ့ရသူများအတွက် ဝမ်းနည်းကြောင်း ဖော်ပြခဲ့သည့် ထရမ့်ပ်နှင့် ၁၀ မိနစ်ခန့် စကားပြောဆိုခဲ့ကြောင်း ဒီ လာ အက်စ်ပရီယယ်လာ က ပြောကြားခဲ့သည်။

“ဆွေးနွေးမှုဟာ အလွန် ရင်းနှီးပွင့်လင်းပြီး ဖော်ရွေပါတယ်” ဟု ကိုလံဘီယာ ခေါင်းဆောင်က ဆိုသည်။

Ref: ဆော့သ်ချိုင်းနားမောနင်းပို့စ်