ကုန်ဈေးနှုန်းမြင့်တက်လာမှုကြောင့် အလုပ်သမားများ လက်ရှိလုပ်ခလစာနှင့် မရပ်တည်နိုင်ဟုဆို

ပြည်တွင်း၌ဒေါ်လာဈေးနှုန်းမြင့်တက်ခြင်း၊ ပြည်ပကနေမှာယူတင်သွင်းရသည့် ကုန်ပစ္စည်းတွေ၏ တန်ဖိုးတွေမှာ မြင့်တက်လာသည့်အတွက် အခြေခံစားသောက်ကုန်ဈေးကွက်အတွင်းမှာလည်း ဈေးနှုန်းမြင့်တက်လာခြင်းကြောင့် အလုပ်သမားများ လက်ရှိလုပ်ခလစာနှင့် မရပ်တည်နိုင်ကြောင်း အလုပ်သမားအရေးဆောင်ရွက်သူများထံမှ သိရသည်။

“ပြီးခဲ့တဲ့ ၆ လလောက်ကတည်းက EU ကတာဝန်ရှိတဲ့သူတွေ၊ သံရုံးကတာဝန်ရှိတဲ့သူတွေ၊ လုပ်ငန်းရှင်တွေနဲ့ တွေ့ဆုံမှုလုပ်ခဲ့တယ်။ လက်ရှိလုပ်ခလစာနဲ့ အလုပ်သမားတွေရပ်တည်ဖို့ ခက်ခဲတယ်ပေါ့။ မဖြစ်နိုင်တော့ဘူး။ လုပ်ခလစာတိုးမြှင့်ရေးလို့ပြောလိုက်ရင်လည်း အစိုးရ၊အလုပ်ရှင်၊အလုပ်သမားသုံးပွင့်ဆိုင်ဆိုတဲ့ ယန္တရားမှာပဲ အဖြေရှာရမယ့် သဘောဖြစ်နေတယ်။အဓိက မြန်မာပြည်ရဲ့ အော်ဒါတွေကိုပေးနေတဲ့ Brand တွေကိုပြောတာပေါ့။ အခုဆိုရင်ကုန်ဈေးနှုန်းတွေက တက်လာပြီ။ အဲဒီလိုအခြေအနေမျိုးမှာ ကျွန်တော်တို့ရဲ့အလုပ်သမားတွေက လက်ရှိလုပ်ခလစာနဲ့ ဘယ်လိုမှမရပ်တည်နိုင်တော့ဘူး။ နောက်ဆက်တွဲအနေနဲ့ လူမှုရေးအကြပ်အတည်းတွေ အများကြီးပေါ်ပေါက်လာလိမ့်မယ်။ လုပ်ခလစာသတ်မှတ်ရေးဆိုတဲ့ အစိုးရ၊အလုပ်ရှင်၊အလုပ်သမားသုံးပွင့်ဆိုင် မလုပ်နိုင်ရင်တောင် brand တွေအနေနဲ့ ရသင့်ရထိုက်တဲ့လုပ်ခလစာကိုပေးဖို့တွေ့ဆုံဆွေးနွေးထားပါတယ်”ဟု အလုပ်သမားအရေးဆောင်ရွက်သူ ဦးရဲနိုင်ဝင်းက ပြောသည်။

အနည်းဆုံးအခကြေးငွေဥပဒေကို ၂၀၁၃ ခုနှစ်တွင် ပြဋ္ဌာန်းခဲ့ပြီး အခကြေးငွေနှုန်းထားကို ၂ နှစ်တစ်ကြိမ်ပြင်ဆင်သတ်မှတ်ရမည်ဟု ဥပဒေတွင် ပြဋ္ဌာန်းထားသည်။ ပထမအကြိမ်အဖြစ် တစ်နေ့အလုပ်ချိန် ၈ နာရီအတွက် ကျပ် ၃၆၀၀ နှင့် ဒုတိယအကြိမ်ကို ၂၀၁၈ ခုနှစ် မေလတွင် ၄၈၀၀ ကျပ်ထိ တိုးမြင့်ခဲ့ခြင်းဖြစ်သည်။

သို့သော် တတိယအကြိမ်မြောက်ထပ်မံပြဋ္ဌာန်းရမည့် ၂၀၂၀ ပြည့်နှစ်တွင် ပြင်ဆင်သတ်မှတ်မှုလုပ်ဆောင်ရန် ပျက်ကွက်ခဲ့ပြီး လက်ရှိအချိန်ထိ ကျပ် ၄၈၀၀ နှုန်းဖြင့်သာ တွက်ချက်ပေးချေနေခြင်းဖြစ်ကြောင်းသိရသည်။

ယခင်က ၄၈၀၀ သတ်မှတ်ချိန်တွင် ဗဟိုဘဏ်ငွေလဲနှုန်းမှာ ၁၃၅၀ သာရှိသည့်အတွက် ၃ ဒသမ ၅ ဒေါ်လာနှင့်ညီမျှ၍ အဆင်ပြေကြောင်း၊ယခုအခါ ဗဟိုဘဏ်ငွေလဲနှုန်းမှာ ၂၁၀၀ ကျပ်ဖြစ်သည့်အတွက် ၂ ဒေါ်လာခွဲပဲရရှိတော့သည့်အတွက် အလုပ်သမားတွေအတွက် လုပ်ခလစာကိုညီမှုမရှိကြောင်း ၎င်းက ဆက်လက်ပြောကြားခဲ့သည်။