ကုန်ဈေးနှုန်းကျဆင်းရေးနှင့် ဈေးနှုန်းတည်ငြိမ်ရေးအတွက် သက်ဆိုင်ရာဝန်ကြီးဌာနများ၊ ပုဂ္ဂလိကအသင်းအဖွဲ့များနှင့် ပူးပေါင်းဆောင်ရွက်နေဟု ဒုတိယဝန်ကြီးရှင်းလင်း

နေပြည်တော်၊ ဇူလိုင် ၂၃

လက်ရှိကြုံတွေ့နေရသည့် စားသောက်ကုန်နှင့် အခြေခံစားသုံးကုန်များ၏ ကုန်ဈေးနှုန်းမြင့်တက်မှုကို လျှော့ချပြီး ဈေးနှုန်းတည်ငြိမ်စေရေးအတွက် သက်ဆိုင်ရာဝန်ကြီးဌာနများ၊ ပုဂ္ဂလိကကဏ္ဍနှင့် အသင်းအဖွဲ့များ ပူးပေါင်း၍ ကဏ္ဍအလိုက် အဆင့်ဆင့်ဆောင်ရွက်လျက်ရှိကြောင်း ဘဏ္ဍာရေးနှင့် အခွန်ဝန်ကြီးဌာန ဒုတိယဝန်ကြီး ဒေါ်သန်းသန်းလင်းက ပြောကြားသည်။

တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (၂၇) ရက်မြောက်နေ့တွင် ဒဂုံမြို့သစ်(မြောက်ပိုင်း) မဲဆန္ဒနယ်မှ ဦးတင့်ဝေ၏ ကုန်ဈေးနှုန်းမြင့်တက်မှုနှင့်ပတ်သက်သည့် မေးခွန်းကို ဖြေကြားရာတွင် ဒုတိယဝန်ကြီးက ယင်းသို့ ရှင်းလင်းပြောကြားခဲ့ခြင်းဖြစ်သည်။

ဦးတင့်ဝေက လမ်းပန်းဆက်သွယ်ရေး အခက်အခဲများကြောင့် အခြေခံစားသောက်ကုန်၊ စားသုံးဆီ၊ အသား၊ ငါးနှင့် ဟင်းသီးဟင်းရွက်များ၏ ဈေးနှုန်းများသည် ယခင်ကထက် သုံးဆ၊ လေးဆအထိ မြင့်တက်လာကြောင်းနှင့် ကုန်ဈေးနှုန်းကျဆင်းရေးအတွက် အစိုးရ၏ ဆောင်ရွက်ချက်များကို သိရှိလိုကြောင်း မေးမြန်းခဲ့သည်။

ဒုတိယဝန်ကြီးက ကုန်ဈေးနှုန်းတည်ငြိမ်ရေးသည် ထုတ်လုပ်မှုမှ ဖြန့်ဖြူးရောင်းချမှုအထိ Supply Chain တစ်ခုလုံးနှင့် သက်ဆိုင်သည့်ကိစ္စဖြစ်ပြီး စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနတို့အပါအဝင် သက်ဆိုင်ရာဌာနများက ကဏ္ဍအလိုက် ပူးပေါင်းဆောင်ရွက်လျက်ရှိကြောင်း ပြောကြားသည်။

ဆန်နှင့် စားသုံးဆီဈေးနှုန်း ထိန်းညှိရေး

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည် မြန်မာနိုင်ငံဆန်စပါးအသင်းချုပ်နှင့် ပူးပေါင်း၍ ပြည်တွင်းဆန်ဖူလုံရေး၊ စနစ်တကျ ပြည်ပတင်ပို့ရေးနှင့် ဈေးကစားရန် ရည်ရွယ်သိုလှောင်မှုများ မဖြစ်စေရေးအတွက် အခြေခံရည်ညွှန်းဈေးနှုန်းများ ထုတ်ပြန်လျက်ရှိကြောင်း သိရသည်။

စားသုံးဆီကဏ္ဍတွင်လည်း ပြည်ပတင်သွင်းမှု CIF ဈေးနှုန်းအပေါ် အခြေခံ၍ ရန်ကုန်လက်ကားရည်ညွှန်းဈေးကို အပတ်စဉ် ထုတ်ပြန်ပေးလျက်ရှိပြီး ဖြန့်ဖြူးရေးအဆင့်များကို သတ်မှတ်ထိန်းချုပ်ထားကာ သတ်မှတ်ဈေးထက် ပိုမိုရောင်းချမှုများကို ရှောင်တခင်စစ်ဆေး၍ အရေးယူလျက်ရှိကြောင်း ဒုတိယဝန်ကြီးက ပြောကြားသည်။

စက်သုံးဆီနှင့် စိုက်ပျိုးရေးသွင်းအားစုများအတွက် အခွန်သက်သာခွင့်

သယ်ယူပို့ဆောင်ရေးနှင့် ကုန်ထုတ်လုပ်မှု ကုန်ကျစရိတ်လျှော့ချနိုင်ရေးအတွက် ဒီဇယ်(HSD 500 ppm) အပေါ် ကောက်ခံသည့် အကောက်ခွန်၊ အထူးကုန်စည်ခွန်၊ ကုန်သွယ်လုပ်ငန်းခွန်နှင့် ကြိုတင်ဝင်ငွေခွန်တို့ကို ၂၀၂၆ ခုနှစ် ဧပြီလမှ ဇွန်လအထိ ကင်းလွတ်ခွင့်ပြုထားကြောင်း၊ ထို့အပြင် ဓာတ်မြေဩဇာတင်သွင်းမှုအပေါ် ကြိုတင်ဝင်ငွေခွန်ကိုလည်း ကင်းလွတ်ခွင့်ပြုထားကြောင်း ရှင်းလင်းပြောကြားသည်။

နိုင်ငံ့စီးပွားမြှင့်တင်ရေးရန်ပုံငွေဖြင့် ထုတ်လုပ်မှုတိုးမြှင့်

တိုင်းဒေသကြီးနှင့် ပြည်နယ် (၁၄) ခု၊ ကိုယ်ပိုင်အုပ်ချုပ်ခွင့်ရဒေသ (၆) ခုတို့တွင် ထုတ်လုပ်မှုတိုးမြှင့်ရေးနှင့် ဈေးနှုန်းတည်ငြိမ်ရေးအတွက် နိုင်ငံ့စီးပွားမြှင့်တင်ရေးရန်ပုံငွေမှ အတိုးနှုန်းသက်သာသော ချေးငွေများ ထုတ်ချေးပေးလျက်ရှိကြောင်း၊ ဓာတ်မြေဩဇာ၊ စိုက်ပျိုးရေးစက်ကိရိယာများ၊ ဆန်စက်နှင့် ဆီစက်လုပ်ငန်းများကိုလည်း ငွေကြေးပံ့ပိုးမှုများ ဆောင်ရွက်ပေးထားကြောင်း သိရသည်။

ဒုတိယဝန်ကြီးက ကုန်ဈေးနှုန်းတည်ငြိမ်ရေးသည် အစိုးရတစ်ဖက်တည်း ဆောင်ရွက်နိုင်သည့် လုပ်ငန်းမဟုတ်ဘဲ ထုတ်လုပ်သူ၊ စားသုံးသူ၊ ပုဂ္ဂလိကကဏ္ဍနှင့် ကုန်သည်လုပ်ငန်းရှင်အသင်းအဖွဲ့များ ပူးပေါင်းဆောင်ရွက်ရန် လိုအပ်ကြောင်း၊ သက်ဆိုင်ရာဌာနများနှင့် ပုဂ္ဂလိကအသင်းအဖွဲ့များ ချိတ်ဆက်ပူးပေါင်း၍ ကုန်ဈေးနှုန်းကျဆင်းရေးနှင့် ဈေးနှုန်းတည်ငြိမ်ရေးကို ဆက်လက်အကောင်အထည်ဖော်သွားမည်ဖြစ်ကြောင်း လွှတ်တော်တွင် ရှင်းလင်းဖြေကြားခဲ့သည်။