ဆိုးလ်၊ ဇူလိုင် ၂၅
ကိုရီးယားသမ္မတနိုင်ငံတွင် လုပ်ငန်းခွင်မတော်တဆမှုကြောင့် ကွယ်လွန်ခဲ့သည့် မြန်မာလုပ်သား မောင်အောင်မင်းဦး၏ ရုပ်အလေ-ာင်းကို မြန်မာနိုင်ငံသို့ ပြန်လည်ပို့ဆောင်နိုင်ရေးအတွက် မြန်မာသံရုံး (ဆိုးလ်) က လိုအပ်သည့် ကူညီဆောင်ရွက်မှုများ ဆောင်ရွက်ပေးခဲ့ကြောင်း သိရသည်။
မောင်အောင်မင်းဦးသည် ၂၀၂၆ ခုနှစ် ဇွန် ၂၉ ရက်က ကိုရီးယားသမ္မတနိုင်ငံ၊ ချွန်းချောင်းတောင်ပိုင်းပြည်နယ်၊ အာဆန်မြို့ရှိ မြေအောက်လှိုဏ်ခေါင်း တည်ဆောက်ရေးလုပ်ငန်းခွင်တွင် မတော်တဆထိခိုက်မှုဖြစ်ပွားကာ ကွယ်လွန်ခဲ့ခြင်းဖြစ်သည်။
ဖြစ်စဉ်ဖြစ်ပွားပြီးနောက် မြန်မာသံရုံး (ဆိုးလ်) မှ တာဝန်ရှိသူများသည် လုပ်ငန်းခွင်သို့ သွားရောက်စစ်ဆေးခဲ့ပြီး သက်ဆိုင်ရာကုမ္ပဏီတာဝန်ရှိသူများ၊ လုပ်ဖော်ကိုင်ဖက် မြန်မာလုပ်သားများနှင့် တွေ့ဆုံကာ ဖြစ်စဉ်အခြေအနေများကို စိစစ်မေးမြန်းခဲ့သည်။
ထို့ပြင် ကွယ်လွန်သူ၏ ရုပ်အလေ-ာင်းကို သွားရောက်အတည်ပြုခဲ့ပြီး ကျန်ရစ်သူဇနီးထံ ဆက်သွယ်ကာ ကုမ္ပဏီဘက်မှ မိသားစုအတွက် ဆောင်ရွက်ပေးမည့် အခြေအနေများကို အသိပေးခဲ့ကြောင်း သိရသည်။
ကျန်ရစ်သူဇနီး၏ ဆန္ဒအတိုင်း ရုပ်အလေ-ာင်းကို မြန်မာနိုင်ငံသို့ ပြန်လည်ပို့ဆောင်နိုင်ရေးအတွက် လိုအပ်သည့် စာရွက်စာတမ်းများ ထုတ်ပေးခဲ့သည့်အပြင် သံရုံးယာယီတာဝန်ခံ/သံအမတ်ကြီး ဦးမျိုးမြင့်မောင်ကလည်း ကျန်ရစ်သူဇနီးနှင့် ကိုယ်တိုင်တွေ့ဆုံ၍ အားပေးစကား ပြောကြားခဲ့ကြောင်း သိရသည်။
မြန်မာသံရုံး (ဆိုးလ်) အနေဖြင့် ကိုရီးယားနိုင်ငံရောက် မြန်မာနိုင်ငံသားများ၏ အရေးကိစ္စများနှင့်စပ်လျဉ်း၍ လိုအပ်သည့် ကူညီဆောင်ရွက်မှုများနှင့် သက်ဆိုင်ရာအဖွဲ့အစည်းများအကြား ချိတ်ဆက်ညှိနှိုင်းပေးခြင်းများကို ဆက်လက်ဆောင်ရွက်ပေးလျက်ရှိကြောင်း သိရသည်။