ကယားပြည်နယ်တွင် သံဃာတော်များပါသီတင်းသုံးနေသည့်ကျောင်းများအား စွန့်ခွာစစ်ဘေးရှောင်နေရ
ကယားပြည်နယ်အတွင်းဖြစ်ပွားလျက်ရှိသည့် တိုက်ပွဲများကြောင့် ပျက်စီးဆုံးရှုံးမှုများဖြစ်ပေါ်နေသဖြင့် ပြည်နယ်အတွင်းရှိ သံဃာတော်များမှာလည်း သီတင်းသုံးနေကြသည့် ကျောင်းများအားစွန့်ခွာ၍ ရှမ်းပြည်နယ်အတွင်းသို့ စစ်ဘေးရှောင်များအဖြစ်ရောက်ရှိလာလျက်ရှိသည်ဟု စစ်ဘေးရှောင်ကူညီသူများထံမှ သိရသည်။
“အဓိက ကတော့ဆွမ်းကိစ္စအခက်အခဲဖြစ်လာတယ် စျေးတွေလည်းပိတ်သလို မြို့ပေါ်မှာလည်း လူမရှိတော့ဘူး နောက်ပြီး သေနတ်သံတွေလည်းဆက်တိုက်ကြားနေရတော့ အသက်ငယ်တဲ့ကိုရင်လေးတွေကြောက်မှာစိုးတာကြောင့် နီးစပ်ရာဘုန်းကြီးကျောင်းတွေကို ရွှေ့ပေးနေတာပါ ဆွမ်းကိစ္စကလည်းထိုက်သင့်သလောက်အဆင်ပြေသွားတာပေါ”ဟု စစ်ဘေးရှောင်ကူညီသူတစ်ဦးကပြောသည်။
လွိုင်ကော်မြို့အတွင်း၌ ဘုန်းတော်ကြီးကျောင်းများနှင့်စာသင်တိုက်စုစုပေါင်း ၃၀ နီးပါးခန့်ရှိပြီး သံဃာတော်များပြားသည့် ဘုန်းတော်ကြီးကျောင်းများမှ သံဃာတော်နှင့်ကိုရင်များအား ဦးစားပေးရွှေ့ပြောင်းပေးလျက်ရှိသည်။
“ရှမ်းပြည်နယ်က အနီးဆုံးဖြစ်လို့အဲ့ဖက်ကဘုန်း ကြီးကျောင်းတွေဆီကို ပို့ပေးထားတယ် လက်ရှိဦးဇင်းကျောင်းကတိုက်ပွဲဖြစ်တဲ့နေရာနဲ့ဝေးတယ် သေနတ်သံတွေကတော့ကြားနေရတာပေါ့ ကျောင်းမှာလည်းလူ ၃၀၀ လောက်ကိုကယ်ထားပြီးအဆင်ပြေအောင်စီမံပေးနေရတယ်”ဟု လွိုင်ကော်မြို့မှရွှေကျောင်းဆရာတော်ကမိန့်သည်။
တိုက်ပွဲဖြစ်ပွားမှုကြောင့် စစ်ဘေးရှောင်များအဖြစ်ရွှေ့ပြောင်းရောက်ရှိလာမည့် သံဃာတော်များအား လွိုင်ကော်အခြေစိုက်လူမှုကူညီရေးအသင်းယာဥ်များ၊ရှမ်းပြည်အခြေစိုက် လူမှုကူညီရေးအသင်းကားများနှင့်အလှူရှင်များက ကုန်ကျစရိတ်စိုက်ထုတ်လှူဒါန်းပေးသည့် မော်တော်ယာဥ်များဖြင့် ရွှေ့ပြောင်းပေးလျက်ရှိသည်။
“အခုကတော့ ရှမ်း-ကယားအစပ်က ဘုန်းကြီး ကျောင်းတွေကိုပို့ထားပေးတယ် ဆွမ်းကိစ္စလည်းအဆင်ပြေသွားတာပေါ့ လွိုင်ကော်မှာဆိုရင် အခုချိန်ကအကုန်ခက်ခဲနေတာလေ”ဟုစစ်ဘေးရှောင်ကူညီသူတစ်ဦးကပြောသည်။
လွိုင်ကော်မြို့အတွင်း၌ တိုက်ပွဲစတင်ဖြစ်ပွားခဲ့သည့်အချိန်မှစ၍ လျှပ်စစ်မီးများပြတ်တောက်ကာ ဆိုင်ခန်းများအားလုံးနှင့်စျေးများလည်းပိတ်ထားလျက်ရှိသည်။
Photo – CJ