ဖနောင်ပင်၊ဇန်နဝါရီ ၁၉
ကမ္ဘောဒီးယားသည် ၎င်း၏မိုင်းလုံးဝကင်းစင်ရေးကို အကောင်အထည်ဖော်နိုင်မည့်ကာလကို မူလက ၂၀၂၅ ခုသတ်မှတ်ထားသော်လည်း မိုင်းရှာဖွေရေးနှင့်ရှင်းလင်းရေးတွင် ပထဝီဝင်ဆိုင်ရာအခက်အခဲများကြောင့် ၂၀၃၀ ပြည့်နှစ်သို့ပြောင်းလဲသတ်မှတ်လိုက်ကြောင်းသိရသည်။
အထူးသဖြင့် ကမ္ဘောဒီးယားနှင့်ထိုင်းနယ်စပ်တစ်လျှောက်ရှိမိုင်းကွင်းများသည် မိုင်းရှာဖွေရှင်းလင်းရန်ခက်ခဲသည့် တောင်တန်းဒေသများနှင့် သစ်တောထူထပ်သောနေရာများဖြစ်နေခြင်းကြောင့်ဖြစ်သည်ဟုလည်းပြောကြားခဲ့သည်။
“အဲ့ဒီနေရာတွေက တောထူထပ်ပြီး အဆိပ်အတောက်တွေနဲ့ညစ်ညမ်းနေတဲ့နေရာတွေဖြစ်တာကြောင့် မိုင်းရှင်းလင်းရေးအဖွဲ့တွေဝင်ရောက်ရှင်းလင်းဖို့ခက်ခဲတာမို့လို့ အချိန်လိုအပ်တာကြောင့်ထပ်တိုးလိုက်ရခြင်းဖြစ်ပါတယ်” ဟုလည်းဆိုခဲ့သည်။
ကမ္ဘောဒီးယားမြေမြှုပ်မိုင်းရှင်းလင်းရေးအဖွဲ့အနေဖြင့် မိုင်းရှင်းလင်းရေးလှုပ်ရှားမှုမူဝါဒ ၂၀၂၆ – ၂၀၃၀ ကို ထပ်မံရေးဆွဲခဲ့ပြီး ရည်မှန်းချက်အသစ်ကိုအကောင်အထည်ဖော်နိုင်ရန် စီမံကိန်းများနှင့်မဟာဗျူဟာများလည်းချမှတ်ထားသည်ဟုသိရသည်။
ကမ္ဘောဒီးယားသည် မြေမြှုပ်မိုင်းဒဏ်အများဆုံးခံခဲ့ရသော နိုင်ငံတစ်နိုင်ငံလည်းဖြစ်ပြီး ၁၉၇၉ မှ ၂၀၂၄ ခုနှစ်အတွင်း မြေမြှုပ်မိုင်းနှင့်စစ်လက်ကျန်မိုင်းများကြောင့် လူပေါင်း ၁၉,၃၈၄ ဦးသေဆုံးကာ ၄၅,၂၅၂ ဦးကို ထိခိုက်ဒဏ်ရာရစေခဲ့ပြီး ခြေလက်အင်္ဂါဆုံးရှုံးမှုများဖြစ်ပေါ်စေခဲ့သည်ဟုသိရသည်။
Source : ရှင်းဟွာ