ဖနွမ်းပင်၊ဖေဖော်ဝါရီ ၈
နှစ်နှစ်အတွင်း ပထမဆုံးအကြိမ်အနေဖြင့်ပြန်လည်ကျင်းပသည့် နှစ်စဉ်ဖေဖော်ဝါရီလအတွင်းကျင်းပနေကြ ကမ္ဘောဒီးယားနှင့်တရုတ်တို့၏ “Golden Dragon” ပူးတွဲစစ်ရေးလေ့ကျင့်မှုအား နှစ်နိုင်ငံစစ်သည်အင်အား ၁,၀၀၀ ကျော်ဖြင့် ယခုနှစ်အတွင်းပြန်လည်စတင်တော့မည်ဖြစ်ကြောင်းသိရသည်။
အဆိုပါလေ့ကျင့်မှုအား ၂၀၂၀ ပြည့်နှစ်အထိပြုလုပ်ခဲ့ပြီး ကိုဗစ်ကြောင့်နှစ်နှစ်တာ ရပ်နားထားခဲ့ရာမှ ယခုနှစ်တွင်ပြန်လည်ကျင်းပခြင်းဖြစ်ကြောင်းသိရသည်။နှစ်နိုင်ငံပူးတွဲစစ်ရေးလေ့ကျင့်မှုအား နိုင်ငံတော်စစ်လေ့ကျင့်ရေးစင်တာ၌ မတ်လ ၂၀ ရက်တွင် ပြုလုပ်မည်ဖြစ်ကြောင်း ကမ္ဘောဒီးယား နိုင်ငံတော်ကာကွယ်ရေးဝန်ကြီးဌာနမှ ပြောရေးဆိုခွင့်ရှိသူကပြောကြားခဲ့သည်။
အစီအစဉ်အရ ယခုလေ့ကျင့်မှု၌ ကမ္ဘောဒီးယားနှင့်တရုတ်စစ်တပ်များမှ စစ်သားနှင့်အရာရှိ ၁,၀၀၀ ခန့်ပါဝင်လေ့ကျင့်မည်ဖြစ်ကြောင်းလည်းသိရှိရသည်။စစ်ရေးလေ့ကျင့်မှု၏အဓိကရည်ရွယ်ချက်မှာ မြေပြင်အတွေ့အကြုံများဖလှယ်ပြီး နှစ်နိုင်ငံတပ်မတော်များ၏စွမ်းရည်မြှင့်တင်ရန်ဖြစ်သည်ဟုလည်းဆိုသည်။
ယခုလေ့ကျင့်မှု၌ လူသားချင်းစာနာထောက်ထားမှုဆိုင်ရာစစ်ဆင်ရေးများ၊ သဘာဝဘေးအန္တရာယ်ကယ်ဆယ်ရေးနှင့် အကြမ်းဖက်မှုတန်ပြန်ရေးတို့ကို ကုလမူဘောင်နှင့်အညီ နှစ်နိုင်ငံကာကွယ်ရေးဝန်ကြီးဌာနများ၏ မူဝါဒအတိုင်းလေ့ကျင့်သွားမည်ဖြစ်ကြောင်းလည်းပြောကြားခဲ့သည်။
တရုတ်နှင့်ပူးတွဲလေ့ကျင့်မည့်ယခုစစ်ရေးလေ့ကျင့်မှုအပြင် ကမ္ဘောဒီးယားအနေဖြင့် လာအိုနှင့်ဗီယက်နမ်နိုင်ငံတို့နှင့်ပါ ပူးတွဲလေ့ကျင့်မှုများထပ်မံပြုလုပ်ဦးမည်ဟုလည်း ကာကွယ်ရေးဝန်ကြီးဌာနကပြောကြားခဲ့သည်။
လာအို၊ဗီယက်နမ်တို့နှင့်လေ့ကျင့်ရာ၌ ရေကြီးမှုနှင့်အဆောက်အအုံပြိုကျမှုကဲ့သို့သော သဘာဝဘေးအခြေအနေများ၌ ကူညီကယ်တင်ရေးဆိုင်ရာများကို ဦးစားပေးလေ့ကျင့်မည်ဖြစ်ကြောင်းလည်းပြောကြားခဲ့သည်။
ယင်းအပြင်ကမ္ဘောဒီးယားသည် အိန္ဒိယနိုင်ငံနှင့်လည်းစစ်ရေးအရ ဆက်ဆံရေးတိုးမြှင့်ကာ နှစ်နိုင်ငံပူးပေါင်းလေ့ကျင့်မှုမျိုးပြုလုပ်ရန်လည်း စီစဉ်နေကြောင်းသိရသည်။တရုတ်နှင့်ပူးတွဲစစ်ရေးလေ့ကျင့်မှုအား ၂၀၁၆ ခုနှစ်ကစတင်ပြုလုပ်ခဲ့ခြင်းဖြစ်ပြီး ၂၀၂၀ နောက်ပိုင်း၌ ကမ္ဘောဒီးယား၏ ကပ်ရောဂါအခြေအနေကြောင့် ယာယီရပ်ဆိုင်းထားခဲ့ရခြင်းဖြစ်သည်။
Source : Khmer Times