ကမ္ဘောဒီးယားငွေလိမ်ဂိုဏ်းများမှ လွတ်လာသူများတွင် ထိုင်းအများစုပါဝင်

ဆိုက်ဘာရာဇဝတ်မှုများကို အာဏာပိုင်များက ဆက်လက် ဖော်ထုတ်နှိမ်နင်းနေရာ ကမ္ဘောဒီးယားနိုင်ငံ Poipet မြို့ရှိ အွန်လိုင်း ငွေလိမ်ဂိုဏ်းတစ်ခုမှ လွတ်မြောက်လာသော နိုင်ငံခြားသား ၂၃၀ ဦးတွင် ထိုင်းနိုင်ငံသား စုစုပေါင်း ၁၁၉ ဦး ပါဝင်သည်ဟု ဆိုသည်။

Banteay Meanchey ပြည်နယ် Poipet မြို့ရှိ နေရာနှစ်ခုကို ဖေဖော်ဝါရီ ၂၂ ရက်နှင့် ၂၃ ရက်တို့တွင် လုံခြုံရေးတပ်ဖွဲ့များက ဝင်ရောက် စီးနင်းခဲ့ကြောင်း ကမ္ဘောဒီးယားရဲချုပ်ရုံးက သတင်းထုတ်ပြန်ခဲ့သည်ဟု ခမာတိုင်းမ်စ်က စနေနေ့(မတ်လ ၁ရက်နေ့) ဆောင်းပါးတွင် ဖော်ပြခဲ့သည်။

စီးနင်းမှုများတွင် တွေ့ရှိခဲ့သည့် နိုင်ငံခြားသား ၂၃၀ တွင် ၁၂၃ ဦးသည် ထိုင်းနိုင်ငံသားများဟု ဆိုသော်လည်း ၁၁၉ ဦးသည်သာ ထိုင်းနိုင်ငံမှဟု အတည်ပြုခဲ့သည်။ အခြား လွတ်မြောက်နိုင်ငံခြားသားများတွင် မြန်မာနှင့် လာအိုနိုင်ငံသားများ ပါဝင်သည်ဟု ဆိုသည်။

ထိုင်းနိုင်ငံသား ၁၁၉ ဦး(ကျား ၆၁၊ မ ၅၈) ဦးသည် ဝင်ငွေမြင့်မားသည်ဟူသောစည်းရုံး ဆွဲဆောင်မှု‌ကြောင့် အွန်လိုင်းရာဇဝတ်လုပ်ငန်းများတွင် လုပ်ကိုင်ရန် ကမ္ဘောဒီးယားနိုင်ငံသို့ တရားမဝင် ဝင်ရောက်ခဲ့ကြောင်း ဝန်ခံခဲ့သည်။ ၎င်းတို့သည် ယင်းအဖွဲ့များသို့ လာရောက်ရန်အတွက် လှည့်ဖြားသိမ်းသွင်းခံရခြင်းမဟုတ်ကြောင်းနှင့် ၎င်းတို့ ဆန္ဒအတိုင်း လာရောက်ခဲ့ခြင်းဖြစ်ကြောင်း ထွက်ဆိုခဲ့ကြသည်။

၎င်းတို့အနေဖြင့် ထိုင်း သို့မဟုတ် ကမ္ဘောဒီးယားအစိုးရများထံသို့ အကူအညီတောင်းခံခြင်းမျိုး မလုပ်ခဲ့ဟု သိရသည်။

ထိန်းသိမ်းထားသည့် ထိုင်းနိုင်ငံသားအားလုံးကို နေရပ်ပြန်ပို့ရန် စီစဉ်ထားသည်ဟု ဆိုသည်။

ကမ္ဘောဒီးယားနိုင်ငံရှိ တရုတ်လူမျိုးပိုင် အွန်လိုင်းလုပ်ငန်းများကို သုံးလကြာ စုံစမ်းစစ်ဆေးမှုလုပ်ခဲ့ပြီးနောက် စီးနင်းဖမ်းဆီးခြင်းများ လုပ်ခဲ့ခြင်းဖြစ်သည်ဟု သိရသည်။

Ref: ဘန်ကောက်ပို့စ်