လူ့ဦးနှောက်ဆဲလ်များနှင့် ဆီလီကွန်တို့ကို ပေါင်းစပ်ကာ လူလုပ်ဇီ၀အသိဉာဏ်တု(Synthetic Biological Intelligence – SBI)အဖြစ်ဖန်တီးထားသည့် ကမ္ဘာ့ပထမဆုံး ဇီဝကွန်ပျူတာ CL1 ကို ဩစတြေလျနိုင်ငံအခြေစိုက် သုတေသနကုမ္ပဏီတစ်ခုဖြစ်သည့် Cortical Labs က စတင်မိတ်ဆက်လိုက်ပြီဖြစ်သည်။
ဆီလီကွန်ချစ်ပ်များကို အခြေခံသည့် ထုံးတမ်းစဉ်လာ AI နည်းပညာနှင့်မတူဘဲ၊ ယခုနည်းပညာသည် ဓာတ်ခွဲခန်းတွင် မွေးထုတ်ထားသော အာရုံခံဆဲလ်များ(neurons) ကို အသုံးပြုကာ လျှပ်စစ်စွမ်းအင်အနည်းငယ်ဖြင့် လျင်မြန်စွာ သင်ယူနိုင်စွမ်းနှင့် ပြောင်းလဲတိုးတက်နိုင်စွမ်း ရှိပါသည်။
ဤထိုးဖောက်တီထွင်မှုနည်းပညာသည် တိုးတက်လာသည်နှင့်အမျှ ကျင့်ဝတ်ဆိုင်ရာ စဉ်းစားစရာ မေးခွန်းများပေါ်ပေါက်လာစေသော်လည်း Cortical Labs ကမူ ယင်းကိစ္စများကို တာဝန်ယူမှုရှိစွာ ဖွံ့ဖြိုးတိုးတက်ရန် စည်းမျဉ်းများနှင့်အညီ လုပ်ဆောင်နေကြောင်း ပြောကြားခဲ့ပါသည်။ အဆိုပါ လူလုပ်ဇီ၀အသိဉာဏ်တု(SBI)သည် ဇီဝဉာဏ်ရည်နှင့် စက်မှုဉာဏ်ရည်(AI) အကြား ကွာဟချက်ကို ဖြည့်ဆည်းပေးကာ AI ခေတ်တွင် ဉာဏ်ရည်ဆိုသည့် အဓိပ္ပာယ်ကို အသစ်ပြန်လည်သတ်မှတ်နိုင်စေခဲ့သည်။
ကမ္ဘာ့ပထမဆုံး ဇီဝကွန်ပျူတာ CL1 ကို စပိန်နိုင်ငံ ဘာစီလိုနာမြို့တွင် တရားဝင်မိတ်ဆက်ခဲ့ပြီး သုတေသီများအနေဖြင့် “Wetware-as-a-Service(WaaS)” cloud ပလက်ဖောင်းမှတစ်ဆင့် အဝေးမှဖြစ်စေ၊ တစ်ခုလုံးဝယ်ယူခြင်းဖြင့်ဖြစ်စေ လူလုပ်ဇီ၀အသိဉာဏ်တုကွန်ရက်များနှင့် အချိန်နှင့်တစ်ပြေးညီ ချိတ်ဆက်၍ အလုပ်လုပ်ကိုင်နိုင်မည်ဖြစ်ပါသည်။
ဤတီထွင်မှုသည် ဆေးဝါးရှာဖွေခြင်း၊ ရောဂါမော်ဒယ်ပြုလုပ်ခြင်းနှင့် AI ဖွံ့ဖြိုးတိုးတက်ရေးကဲ့သို့သော နယ်ပယ်များကို ပြောင်းလဲနိုင်ပြီး ထုံးတမ်းစဉ်လာကွန်ပျူတာစနစ်များထက် ပိုမိုလိုက်လျောညီထွေရှိကာ ရေရှည်တည်တံ့သော အခြားရွေးချယ်စရာတစ်ခုဖြစ်လာနိုင်ကြောင်း သုတေသီတို့က ဆိုကြသည်။