လှိုင်း/လေဒဏ်ကို သဘာဝတံတိုင်းကြီးများ သဖွယ်ကာကွယ်ရန် ခိုကျွန်းဒီရေတောကို ဧက၂သောင်းကျော်ဖြင့် ကာကွယ်တောသတ်မှတ်
တာနင်္သာရီတိုင်းဒေသကြီး၊ မြိတ်ခရိုင်၊ ကျွန်းစုမြို့နယ်တွင်းရှိ အကျယ်အဝန်းဧက (၂၃,၃၇၀) ကို ခိုကျွန်း ဒီရေတာကြိုးပြင်ကာကွယ်တောအဖြစ် ၂၀၂၅ ခုနှစ်၊ ဇူလိုင်လ(၂၂)ရက်တွင် စတင်သတ်မှတ်ခဲ့ကြောင်း သိရသည်။
ဒီရေတောဂေဟစနစ် ရေရှည်တည်တံစေရန်၊ ဇီဝမျိုးစုံကွဲများ ပေါကြွယ်ဝစေရန်၊ လှိုင်းဒဏ်/လေမုန်တိုင်းဒဏ် ခံစားရမှုများကို သဘာဝတံတိုင်းကြီးများ သဖွယ်ကာကွယ်ရန် ဒီရေတာ ကြိုးဝိုင်း/ကြိုးပြင် ကာကွယ်တောများ ဖွဲ့စည်းသတ်မှတ်နေခြင်း ဖြစ်သည်။
ထို့ပြင် သား၊ ငါး၊ ပုဇွန်၊ ဂဏန်းရေသယံဇာတများ စဉ်ဆက်မပြတ် ထုတ်ယူသုံးစွဲနိုင်ရန်နှင့် ဒီရေတောဂေဟစနစ်အုပ်ချုပ်မှု ပိုမိုကောင်းမွန်လာစေရန်လည်း ရည်ရွယ်ခြင်းဖြစ်ကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနမှသိရသည်။
ခိုကျွန်း ဒီရေတောကြိုးပြင်ကာကွယ်တော သတ်မှတ်ခြင်းဖြင့် ဒီရေတောအဓိက သစ်မျိုးများဖြစ်သည့် ဗြူးခြေထောက်၊ ဗြူးအုပ်ဆောင်း၊ လမု၊ လဘ၊ ကနစို၊ သမဲ့၊ ကျန၊ မဒမ၊ ပင်လယ်အုန်းစသည့် သစ်မျိုးများနှင့် သရော၊ နှံဗြူး(ငှက်)နှင့် ဓနိပင်စသည့် ဒေသမျိုးရင်း ဒီရေတောသစ်မျိုးများအား ထိန်းသိမ်းနိုင်မည်ဖြစ်ပြီး ဗျိုင်း၊ ဗျိုင်းအောက်၊ စွန်၊ သိမ်းငှက်၊ ပန်းဇင်ငှက်၊ ခရုစုတ်ငှက်၊ရေညှောင့်နှုတ်ဝိုင်းငှက်၊ တင်ကြီးငှက်၊ ငှက်တုံးငှက် စသည့်ငှက်မျိုးများ၏ နေရင်းဒေသအား ထိန်းသိမ်းနိုင်မည်လည်း ဖြစ်သည်။
လက်ရှိ ဒီရေတောများ ပေါက်ရောက်လျက်ရှိသည့် ကမ္ဘာနိုင်ငံပေါင်း(၁၂၃)နိုင်ငံတွင် မြန်မာနိုင်ငံက သတ္တမမြောက် ဒီရေတော ဧရိယာအများဆုံးပိုင်ဆိုင်ထားသည့် နိုင်ငံဖြစ်ပြီး ဒီရေတော ဧရိယာ ဧက (၁ ဒဿမ ၂၆သန်း) ကျော် ရှိကြောင်း သိရသည်။