တကျော့ပြန်ရွေးကောက်ခံခဲ့ရသော သြစတြေးလျ အစိုးရအနေဖြင့် အမေရိက-တရုတ် ကုန်သွယ်ရေးစစ်ပွဲ၏ ထိခိုက်သက်ရောက်မည့်အရေးကို ဦးစားပေးဆောင်ရွက်မည်ဖြစ်ကြောင်း ဘဏ္ဍာရေးမှူး Jim Chalmers က မေလ ၄ ရက် နေ့တွင် ပြောကြားလိုက်သည်။
ဆယ်စုနှစ် ၂ ခုအတွင်း သက်တမ်းနှစ်ကြိမ်ဆက် အနိုင်ရသည့် ပထမဆုံး သြစတြေးလျဝန်ကြီးချုပ်ဖြစ်သည့် လေဘာပါတီခေါင်းဆောင် အန်သိုနီ အယ်လ်ဘာနီးစ်က မေ ၄ ရက်တွင် မှတ်ချက်ပြု ပြောကြားခဲ့ရာ၌ စည်းကမ်းရှိ၍ စည်းစနစ်ကျသော အစိုးရတစ်ရပ်ဖြင့် ဖွဲ့စည်းအုပ်ချုပ်သွားမည်ဟု ကတိပြုခဲ့ကာ သြစတြေးလျနိုင်ငံသားများသည် စည်းလုံးညီညွတ်မှုအတွက် မဲပေးခဲ့ကြသည်ဟု မှတ်ချက်ပြုခဲ့သည်။
ဗဟိုလက်ဝဲ လေဘာပါတီသည် ပါလီမန်တွင် အမတ်နေရာ အနည်းဆုံး ၇၇ မှ ၈၅ နေရာဖြင့် ၎င်း၏ အများစုထိန်းချုပ်မှုကို ဆက်လက်ဆုပ်ကိုင်ထားနိုင်မည်ဟု အေဘီစီသတင်းဌာနက ဖော်ပြခဲ့သည်။ မဲအများစုကို ရေတွက်ခဲ့ပြီးနောက် ပါတီသည် အမတ်နေရာ ၁၅၀ ရှိ အောက်လွှတ်တော်ကို ဆက်လက်ထိန်းထားရန် ရုန်းကန်ရနိုင်သည်ဟု ခန့်မှန်းခဲ့သည်။
မဲအရေအတွက် သုံးပုံနှစ်ပုံကျော်ကို ရေတွက်ပြီးဖြစ်ကာ မေ ၅ ရက်တွက် မဲရေတွက်မှုများ ပြန်လည်စတင်မည်ဖြစ်သည်။
မဲဆန္ဒရှင်များသည် ကနဦးက နေထိုင်မှုစရိတ်ကြီးမြင့်မှုအပေါ် အဓိကထား ဆုံးဖြတ်ရန်ရှိခဲ့ကြသော်လည်း အမေရိကန်သမ္မတ ဒေါ်နယ်ထရမ့်ပ်၏ အခွန်စည်းကြပ်မှုများနှင့် အခြားမူဝါဒများအပေါ် ပိုမိုစိုးရိမ်လာခဲ့မှုကြောင့် သြစတြေးလျ၏ အတိုက်အခံ ကွန်ဆာဗေးတစ်ခေါင်းဆောင် မစ္စတာ ပီတာဒပ်တွန်သည် အမတ်နေရာ ရှုံးနိမ့်ခဲ့ရသည်။
“ကျွန်တော်တို့ရဲ့ ဒုတိယသက်တမ်းမှာ ပထမသက်တမ်းကလိုပဲ စည်းကမ်းရှိပြီး စည်းစနစ်ကျတဲ့ အစိုးရတစ်ရပ်ဖြစ်လာမှာပါ” ဟု မစ္စတာ အယ်လ်ဘာနီးစ်က သူ၏ ဆစ်ဒနီမဲဆန္ဒနယ်ရှိ ကော်ဖီဆိုင်သို့ သွားရောက်ခဲ့မှုအတွင်း သတင်းထောက်များကို ပြောကြားခဲ့သည်။
“သြစတြေးလျပြည်သူတွေက ကွဲပြားခြင်းထက် စည်းလုံးမှုကိုသာ မဲပေးခဲ့ကြပါတယ်” ဟုလည်း အယ်လ်ဘာနီးစ်က သူ၏ အတိုချုံး မှတ်ချက်တွင် ပြောကြားခဲ့သည်။
Ref: သည်စထရိတ်တိုင်းမ်စ်