ထိုင်းနိုင်ငံနှင့် မလေးရှားနိုင်ငံတို့ရှိ လုပ်ငန်းခွင်များသို့ ပို့ဆောင်ပေးရန်အတွက် ထောင်ဖာဖွမ်ခရိုင်ရှိ တောတွင်းတစ်နေရာတွင် စောင့်ဆိုင်းနေကြသည့် တရားမဝင် မြန်မာရွှေ့ပြောင်းလုပ်သား ၁၆၂ ဦးသည် တနင်္ဂနွေနေ့က ဖမ်းဆီးခံလိုက်ရသည်။
တရားမဝင်လုပ်သားများသည် ထာခါနွန်မြို့နယ်ရှိ တောတွင်းတစ်နေရာတွင် ပုန်းအောင်းနေကြကြောင်း ကန်ချနာဘူရီပြည်နယ် အုပ်ချုပ်ရေးမှူး အထီဆန်အင်ထရာက သတင်းရရှိခဲ့သည်။ ၎င်းတို့သည် မြန်မာနိုင်ငံသားများဖြစ်ကာ နိုင်ငံအတွင်းသို့ တရားမဝင် ဝင်ရောက်လာခြင်းဖြစ်ကြာင်းသတင်းက ဖော်ပြခဲ့သည်။
သတင်းအရ ထောင်ဖာဖမ် အထူးတပ်ဖွဲ့က ရှာဖွေခဲ့ရာတွင် လူ ၁၆၂ ဦးပါအဖွဲ့ကို တွေ့ရှိခဲ့ပြီး ၎င်းတို့သည် အာဏာပိုင်များထံ အသာတကြည် အဖမ်းခံခဲ့သည်။
ယင်းအဖွဲ့တွင် အမျိုးသား ၉၄ ဦး၊ အမျိုးသမီး ၅၇ ဦးနှင့် အသက် ၁၅ နှစ်မှ ၁၈ နှစ်ကြားရှိ ယောက်ျားလေးနှင့် မိန်းကလေး ၁၁ ဦးပါဝင်သည်။
ထောင်ဖာဖမ်ခရိုင် တောတွင်းသို့ ယာဉ်မောင်းတစ်ဦးက ၎င်းတို့ကို ပို့ဆောင်ပေးခဲ့ကာ ယင်းမှတဆင့် ၎င်းတို့ကို မြို့တွင်းသို့ အခြားယာဉ်တစ်စီးဖြင့် ခေါ်ဆောင်ပေးမည်ဖြစ်သောကြောင့် နောက်ထပ် ၅ နာရီခန့် စောင့်ဆိုင်းနေကြရန် ထိုယာဉ်မောင်းက ပြောကြားခဲ့သည်ဟု ဆိုသည်။
၎င်းတို့အနေဖြင့် ဆမွတ်ဆခွန့်၊ ဘန်ကောက်၊ ချွန်ဘူရီ၊ အယုဒ္ဓယနှင့် ဆွန်ခလာတို့ရှိ လုပ်ငန်းခွင်ရှိရာများသို့ ပို့ဆောင်ပေးရန်အတွက် ပွဲစားများကို ဘတ် ၂၀,၀၀၀ နှင့် ၂၄,၀၀၀ အကြား ပေးခဲ့ကြရသည်ဟု ထုတ်ဖော်ပြောဆိုခဲ့သည်။ ၎င်းတို့ထဲမှ အချို့သည် နယ်စပ်ကိုဖြတ်၍ မလေးရှားသို့ ဝင်ရောက်ရန် မျှော်လင့်ထားကြကြောင်း သိရသည်။
Ref: ဘန်ကောက်ပို့စ်