အပစ်ရပ်ရေးသဘောတူညီချက်ကြောင့်ရေနံစိမ်းဈေးကျ၊ စတော့ဈေးများ ပြန်တက်

အရေးပါသည့် ဟော်မုဇ်ရေလက်ကြားကို တေရန်က ဖွင့်ပေးရမည့်အချက်ပါဝင်သည့် အမေရိကနှင့် အီရန်အကြား သီတင်းနှစ်ပတ်ကြာ အပစ်အခတ်ရပ်စဲရေးသဘောတူညီချက်ကို ရယူနိုင်ခဲ့ပြီးနောက် ရေနံဈေးနှုန်းများ ကျဆင်းသွားခဲ့ပြီး စတော့ရှယ်ယာဈေးများ ပြန်လည်မြင့်တက်ခဲ့သည်။

အစ္စလာမ်မစ်သမ္မတနိုင်ငံအနေဖြင့် ရေလက်ကြားကို ပြန်ဖွင့်လျှင်ဖွင့် မဖွင့်လျှင်ချေမှုန်းခံရမည်ဆိုသော ဒေါ်နယ်ထရမ့်ပ်၏ နောက်ဆုံးသတ်မှတ်ချိန်နီးကပ်လာချိန်တွင် တိုက်ခိုက်မှုများကို သီတင်းနှစ်ပတ်ကြာ ရပ်တန့်သွားမည်ဖြစ်ကြောင်း ၎င်းက ကြေညာခဲ့ကာ လက်တွေ့ကျသော အချက် ၁၀ ချက်ပါ သည့် အဆိုပြုချက်ကို လက်ခံရရှိထားကြောင်း ပြောဆိုခဲ့သည်။

အီရန်ဘက်ကလည်း ကမ္ဘာ့ရေနံနှင့် သဘာဝဓာတ်ငွေ့၏ ငါးပုံတစ်ပုံခန့်ဖြတ်သန်းသယ်ဆောင်ရာ ရေလမ်းကြောင်းကို ဘေးကင်းလုံခြုံစွာဖြတ်သန်းနိုင်ရေး သဘောတူခဲ့ကြောင်း နောက်ပိုင်းတွင် ပြောကြားခဲ့သည်။

ထိုသတင်းကြောင့် ရေနံစိမ်းဈေးများ ကျဆင်းခဲ့ပြီး West Texas Intermediate သည် ၂၀ ရာခိုင်နှုန်းနှင့် ဘာရန့်ရေနံစိမ်းဈေးနှုန်းသည် ၁၆ ရာခိုင်နှုန်းအထိ ကျဆင်းသွားခဲ့သောကြောင့် စစ်ပွဲ သီတင်းငါးပတ်ကျော်အတွင်း ထောက်ပံ့ဖြည့်တင်းရေးလုပ်ငန်းစဉ်များထိခိုက်ခဲ့ရပြီးနောက် ရင်းနှီးမြှုပ်နှံသူများအတွက် စိတ်သက်သာရာရစေခဲ့သည်။

တစ်လကျော်ကြာ ကမ္ဘာ့စီးပွားရေးကို တုန်လှုပ်စေခဲ့သည့် အကျပ်အတည်း အဆုံးသတ်တော့မည်ဟူသော မျှော်လင့်ချက်များကြောင့် ရှယ်ယာဈေးနှုန်းများကို မြင့်တက်စေခဲ့သည်။

ဆိုးလ်နှင့် တိုကျိုစတော့ရှယ်ယာဈေးများ ၅ ရာခိုင်နှုန်းကျော်၊ တိုင်ပေက ၄ ရာခိုင်နှုန်းနီးပါး၊ ဆစ်ဒ်နီနှင့် ဟောင်ကောင်က ၂ ရာခိုင်နှုန်းကျော်မြင့်တက်ခဲ့သည်။ ရှန်ဟိုင်း၊ စင်ကာပူနှင့် ဝယ်လင်တန်တို့တွင်လည်း သိသိသာသာမြင့်တက်ခဲ့ကြောင်း သိရသည်။

Ref: ဘန်ကောက်ပို့စ်