အစ္စရေး ဓ-ါးစာခံ ၃ ဦးနှင့် ပါလက်စတိုင်း အကျဉ်းသား ၃၆၉ ဦး လဲလှယ်

အတိမ်းအစောင်းမခံသည့် အပစ်အခတ်ရပ်စဲမှု ပျက်ပြားမည့်အရေးမှ ရှောင်လွှဲနိုင်ရန် ကြားဝင်ညှိနှိုင်းသူများက ကူညီပေးခဲ့ပြီးနောက်တွင် ထိန်းသိမ်းထားသူများကို အပြန်အလှန်လဲလှယ်မှုအဖြစ် ဖေဖော်ဝါရီ လ ၁၅ ရက် နေ့ တွင် ဟားမတ်စ်အဖွဲ့က ဂါဇာရှိ အစ္စရေး ဓ-ါးစာခံ သုံးဦးကို လွှတ်ပေးခဲ့သကဲ့သို့ အစ္စရေးက ပါလက်စတိုင်းအကျဉ်းသား ၃၆၉ ဦးကို လွှတ်ပေးလိုက်သည်။

ခန်ယူနစ်မြို့တစ်နေရာရှိ စင်မြင့်တစ်ခုပေါ်သို့ အစ္စရေးအကျဉ်းသား သုံးဦးကို ခေါ်ဆောင်လာခဲ့ပြီး ၎င်းတို့ဘေးတစ်ဖက်စီတွင် မောင်းပြန်ရိုင်ဖယ်များကိုင်ထားသည့် ဟားမတ်စ် စစ်သွေးကြွများခြံရံထားသည်ကို တိုက်ရိုက်လွှင့်ခဲ့သည့် ဗီဒီယိုတွင် တွေ့ရသည်။ ယင်းနောက်တွင် သူတို့သုံးဦးကို အစ္စရေးတပ်ဖွဲ့များက အစ္စရေးနယ်မြေအတွင်းသို့ ပြန်လည်ခေါ်ဆောင်သွားခဲ့သည်။

အဆိုပါ အစီအစဉ်အပြီး သိပ်မကြာခင်မှာပင် လွတ်မြောက်လာသော ပါလက်စတိုင်း အကျဉ်းသားများနှင့် ထိန်းသိမ်းထားသူများကို တင်ဆောင်ထားသည့် ဘတ်စ်ကားများသည် အစ္စရေးသိမ်းပိုက်ထားသော အနောက်ဘက်ကမ်းဒေသ အိုဖာ အကျဉ်းထောင်မှ ထွက်ခွာသွားခဲ့သည်။ ပါလက်စတိုင်းအလံများဝှေ့ယမ်းက ကြိုဆိုအားပေးနေသည့် လူအုပ်ရှိရာ ရာမာလာမြို့သို့ ပထမဆုံး ဘတ်စ်ကား ဆိုက်ရောက်လာခဲ့သည်။

ကားပြတင်းများတွင် အောင်ပွဲခံဆိုင်းဘုတ်များ တပ်ဆင်ထားသည့် လွတ်မြောက် ပါလက်စတိုင်းအကျဉ်းသားများ တင်ဆောင်လာသော ဘတ်စ်ကားများသည် နောက်ပိုင်းတွင် ဂါဇာကမ်းမြောင်တောင်ပိုင်း ခန်ယူနစ်မြို့ရှိ ဥရောပဆေးရုံကို ရောက်ရှိလာခဲ့သည်။

အချို့ပါလက်စတိုင်းများသည် ၂၀၀၀ ပြည့်နှစ်က ဒုတိယ ပါလက်စတိုင်းအုံကြွမှုအရေးအခင်းအတွင်း အသေခံဗုံးခွဲမှုများနှင့် အစ္စရေးနိုင်ငံသား ဒါဇင်နှင့်ချီကို သတ်ဖြတ်ခဲ့မှုများတွင် ပါဝင်ပတ်သက်မှုဖြင့် နှစ်ရှည်ထောင်ဒဏ် ချမှတ်ခံထားရသူများဖြစ်သည်။

ဇန်နဝါရီလ ၁၉ ရက် နေ့ မှစတင်ကာ ပြန်လည်လွတ်မြောက်လာသော အစ္စရေးဓါးစာခံအချို့သည် အစာဖြတ်တောက်ခံထားရခြင်း၊ ဥမင်လှိုဏ်ခေါင်းများအတွင်း လနှင့်ချီ၍ ထိန်းသိမ်းခံထားရခြင်း၊ နေ့အလင်းရောက် မရရှိခြင်းနှင့် ရုပ်ပိုင်း၊ စိတ်ပိုင်းဆိုင်ရာ စော်ကားနှိပ်စက်ခံရမှုများ ရှိခဲ့သည်ဟု ဆိုသည်။

Ref: သည်စထရိတ်တိုင်းမ်စ်