လွိုင်ကော်၊ ဇူလိုင် ၃၀
ကယားပြည်နယ်၊ လွိုင်လင်လေးမြို့နှင့် လွိုင်ကော်မြို့နယ်အတွင်းရှိ ပိတ်ထားရသည့် တိုက်နယ်ကျန်းမာရေးဌာန ပြန်လည်ဖွင့်လှစ်နိုင်ရေး၊ မြို့တွင်းနှင့် ကျေးရွာချင်းဆက် လမ်းတံတား တည်ဆောက်ရေးနှင့် စိုက်ပျိုးရေးလုပ်ငန်းများ ဆောင်ရွက်နေမှုကို ပြည်နယ်ဝန်ကြီးချုပ် ဦးအံ့မော်နှင့် အဖွဲ့က ကွင်းဆင်းစစ်ဆေးခဲ့သည်။
စစ်ဆေးမှုအတွင်း လွိုင်လင်လေး တိုက်နယ်ကျန်းမာရေးဌာနကို ပြည်သူ့ကျန်းမာရေး ဝန်ဆောင်မှုများ ပြန်လည်ပေးအပ်နိုင်ရန် ပြင်ဆင်နေသည့် အခြေအနေများကို ကြည့်ရှုခဲ့ပြီး ဆေးရုံအမြန်ဆုံး ပြန်လည်ဖွင့်လှစ်နိုင်ရေး သက်ဆိုင်ရာဌာနများနှင့် ညှိနှိုင်းဆောင်ရွက်ပေးခဲ့သည်။
ထို့ပြင် လွိုင်လင်လေးမြို့ အောင်တေဇရပ်ကွက်အတွင်းရှိ တော်ဝင်လမ်း (၇၄၀ ပေ) နှင့် ကုက္ကိုရိပ်လမ်း (၆၀၅ ပေ) တို့ကို ကျောက်ချောလမ်းအဖြစ် အဆင့်မြှင့်တင်ခြင်း၊ ရေပြွန်များ တည်ဆောက်ခြင်းတို့အပြင် ၂၀၂၆-၂၀၂၇ ဘဏ္ဍာနှစ် ပြည်ထောင်စုရန်ပုံငွေဖြင့် ဆောင်ရွက်နေသည့် လွိုင်ကော်မြို့ နွားလဝိုးကျေးရွာအုပ်စုရှိ သပြေကုန်း-လွယ်ထွဲ ကျေးရွာချင်းဆက်လမ်း ကတ္တရာထပ်ပိုးလွှာ ခင်းခြင်းလုပ်ငန်းများကိုပါ စစ်ဆေးခဲ့သည်။
ဆက်လက်၍ ထီရိကျေးရွာနှင့် နွားလဝိုးရွာမကျေးရွာတို့ရှိ မိုးစပါးနှင့် မြေပဲစိုက်ခင်းများတွင် သဘာဝမြေဩဇာနှင့် ကျောက်မှုန့်ရောစပ် ပက်ဖြန်းသည့် နည်းပညာသရုပ်ပြပွဲများနှင့် စိုက်ပျိုးရေ ပေးဝေလျက်ရှိသည့် နွားလဝိုးရေလှောင်ကန် ရေထိန်းတံခါး ပြုပြင်ဆောင်ရွက်နေမှု အခြေအနေများကိုလည်း ကြည့်ရှုစစ်ဆေးခဲ့ကြောင်း သိရသည်။