အဆိုပါပြိုင်ပွဲတွင် အိမ်ရှင် မြန်မာအမျိုးသမီးအသင်းနှင့်အတူ အာရှအဆင့် ထိပ်တန်းအသင်းများဖြစ်သည့် ထိုင်းအသင်းနှင့် ဥဇဘက်ကစ္စတန်အသင်းတို့ ပါဝင်ယှဉ်ပြိုင်ကြမည်ဖြစ်ပြီး ပွဲစဉ်အားလုံးကို သုဝဏ္ဏအားကစားကွင်း၌ ကျင်းပပြုလုပ်သွားမည်ဖြစ်သည်။ ပြိုင်ပွဲပုံစံမှာ အသင်း (၃) သင်းစလုံး တစ်သင်းနှင့်တစ်သင်း အပြန်အလှန် ယှဉ်ပြိုင်ရမည့် Round Robin (အုပ်စုပတ်လည်) စနစ်ဖြင့် ကျင်းပမည် ဖြစ်သည်။
ယှဉ်ပြိုင်မည့် ပွဲစဉ်ဇယားများမှာ –
ဇွန်လ (၁) ရက် (ညနေ ၅ နာရီ): မြန်မာ နှင့် ဥဇဘက်ကစ္စတန်
ဇွန်လ (၄) ရက် (ညနေ ၄ နာရီ): ဥဇဘက်ကစ္စတန် နှင့် ထိုင်း
ဇွန်လ (၇) ရက် (ညနေ ၅ နာရီ): မြန်မာ နှင့် ထိုင်း
လက်ရှိ ကမ္ဘာ့အဆင့် (၅၅) နေရာတွင် ရှိနေသည့် မြန်မာအမျိုးသမီးအသင်းအတွက် အဆင့် (၅၀) ရှိ ထိုင်းအသင်းနှင့် အဆင့် (၅၁) ရှိ ဥဇဘက်ကစ္စတန်အသင်းတို့ကဲ့သို့ အင်အားတောင့်တင်းသည့် ပြိုင်ဘက်များနှင့် ခြေစမ်းခွင့်ရခြင်းမှာ အလွန်ကောင်းမွန်သည့် အခွင့်အလမ်းတစ်ခု ဖြစ်သည်။
မြန်မာ့လက်ရွေးစင်အသင်းကို ယာယီနည်းပြချုပ် ဒေါ်စန်းစန်းသိန်း က ဦးဆောင်ကိုင်တွယ်လျက်ရှိပြီး လက်ရှိတွင် ပဏာမကစားသမား (၃၅) ဦးဖြင့် စခန်းသွင်း လေ့ကျင့်လျက်ရှိသည်။ ပြည်ပကလပ်များတွင် သွားရောက်ကစားနေသည့် ဝါရင့်ကစားသမားများသည်လည်း မေလဆန်းပိုင်းတွင် အသင်းနှင့် လာရောက်ပူးပေါင်းရန် ရှိနေကြောင်း သိရသည်။
ပရိသတ်များအနေဖြင့် စိတ်လှုပ်ရှားဖွယ် ခြေစမ်းပွဲစဉ်များကို ပြည်တွင်းရုပ်သံလိုင်းများနှင့် YouTube Channel များမှတစ်ဆင့် တိုက်ရိုက် (Live) ကြည့်ရှုအားပေးနိုင်မည် ဖြစ်ပါသည်။