ယူအက်စ်၏ လူကုန်ကူးမှုတို-က်ဖျ-က်ရေး အစီရင်ခံစာတွင်ထိုင်းက ပထမတန်း အဆင့်ရရှိရန်ရည်မှန်း

မေလ ၃ ရက်

ထိုင်းအစိုးရသည် လူကုန်ကူးမှု တို-က်ဖျ-က်ရေးဆိုင်ရာ ကြိုးပမ်းအားထုတ်မှုများကို အရှိန်အဟုန်မြှင့် လုပ်ဆောင်သွားမည်ဟု ကတိပြုထားပြီး၊ ၂၀၂၅ ခုနှစ်အထိ ၄ နှစ်ဆက်တိုက် ရောက်ရှိနေခဲ့သည့် ဒုတိယတန်း အဆင့်မှ အမေရိကန်နိုင်ငံခြားရေးဝန်ကြီးဌာန၏ လူကုန်ကူးမှုဆိုင်ရာ အစီရင်ခံစာတွင် ပထမတန်းအဆင့်သို့ တက်လှမ်းနိုင်ရန် ရည်မှန်းထားကြောင်း သိရသည်။

အစိုးရပြောရေးဆိုခွင့်ရှိသူ ရာချဒါ ဒ်နာဒီရက် က ဘန်ကောက်ပို့စ် သတင်းစာသို့ ပြောကြားရာတွင် ပူးပေါင်းဆောင်ရွက်မှုများ ကောင်းမွန်လာခြင်းနှင့် တရားဥပဒေစိုးမိုးရေးဆိုင်ရာ အစီအမံများ ပိုမိုခိုင်မာလာခြင်းတို့ကြောင့် ထိုင်းနိုင်ငံအနေဖြင့် မကြာမီအတွင်း အမေရိကန်၏ လူကုန်ကူးမှုတိုက်ဖျက်ရေး အကဲဖြတ်မှုတွင် ပထမတန်းအဆင့်သို့ ရောက်ရှိနိုင်မည်ဟု အစိုးရက ယုံကြည်မှုရှိကြောင်း ဆိုသည်။

ပြောရေးဆိုခွင့်ရှိသူ၏ အဆိုအရ အစိုးရသည် အွန်လိုင်းမှတစ်ဆင့် လိမ်လည်မှုများနှင့် နိုင်ငံဖြတ်ကျော် ရာဇဝတ်မှုများကို တိုက်ဖျက်ရန် အချက်အလက်စနစ်များကို ပေါင်းစပ်ရာတွင် တိုးတက်မှုများ ရရှိခဲ့ကြောင်း သိရသည်။ အမေရိက၊ တရုတ်စသည့် နိုင်ငံများနှင့်လည်း ပူးပေါင်းဆောင်ရွက်မှုများ ပိုမိုအားကောင်းလာပြီး၊ ထိုင်းနိုင်ငံအနေဖြင့် ရာဇဝတ်ဂိုဏ်းများ ပြည်တွင်းသို့ ဝင်ရောက်လာခြင်းကို တားဆီးကာ ပြစ်မှုကျူးလွန်သူများကို ၎င်းတို့၏ မိခင်နိုင်ငံများသို့ တိုက်ရိုက်ပြန်လည် လွှဲပြောင်းပေးလျက်ရှိသည်။

ငွေကြေးခဝါချရန် အသုံးပြုသည့် အကောင့်တု များကို ပိတ်သိမ်းခြင်းနှင့် ထိုင်းနိုင်ငံသားအဖြစ် လိမ်လည်လျှောက်ထားရန် ကြိုးပမ်းသည့် နိုင်ငံဖြတ်ကျော် ရာဇဝတ်သားများ၏ အမှုကိစ္စများကို ထိရောက်စွာ ကိုင်တွယ်ဖြေရှင်းနိုင်ခဲ့သည့် အချက်များကိုလည်း သူက ထောက်ပြခဲ့သည်။ အဆိုပါကြိုးပမ်းမှုများသည် ဌာနဆိုင်ရာအသီးသီးအကြား နီးကပ်စွာ ပူးပေါင်းဆောင်ရွက်မှုကို ထင်ဟပ်စေပြီး လူကုန်ကူးမှုကွန်ရက်များကို ပိတ်ဆို့ရန် ထိုင်းနိုင်ငံ၏ ပြတ်သားသော ဆုံးဖြတ်ချက်ကို ပြသနေခြင်းဖြစ်သည်ဟု ဆိုသည်။

ထိုင်းနိုင်ငံသည် နိုင်ငံဖြတ်ကျော် ရာဇဝတ်မှုများကို တိုက်ဖျက်သည့် လှုပ်ရှားမှုများကို အရှိန်မြှင့်လုပ်ဆောင်လျက်ရှိပြီး အမေရိကနှင့် ပူးပေါင်း၍ Call-centre လိမ်လည်သည့် ကွန်ရက်များနှင့် လူကုန်ကူးမှုဂိုဏ်းများကို ဖြိုခွင်းကာ ဘတ်ငွေ ၂၀ ဘီလျံကျော် တန်ဖိုးရှိသော ပိုင်ဆိုင်မှုများကို သိမ်းဆည်းနိုင်ခဲ့ကြောင်း ပြောရေးဆိုခွင့်ရှိသူက ဆိုသည်။

အစိုးရသည် နိုင်ငံတကာ လူကုန်ကူးမှုတိုက်ဖျက်ရေး အကဲဖြတ်မှုများတွင် ပထမတန်းအဆင့်သို့ တက်လှမ်းနိုင်ရန်နှင့် စီးပွားရေးနှင့် ခရီးသွားကဏ္ဍအပေါ် ယုံကြည်မှုများ ပိုမိုခိုင်မာလာစေရန်အတွက် သတင်းအချက်အလက်ဆိုင်ရာ ပလက်ဖောင်းအသစ်ဖြစ်သော ရှီးလ် ကို မိတ်ဆက်ရန် ပြင်ဆင်လျက်ရှိသည်။

ထိုင်းနိုင်ငံတော်ရဲတပ်ဖွဲ့သည် Call-centre လိမ်လည်မှုများနှင့် လူကုန်ကူးမှုများကို ပိုမိုထိရောက်စွာ တိုက်ဖျက်နိုင်ရန်အတွက် နိုင်ငံပေါင်း ၁၀ နိုင်ငံကျော်ကို ချိတ်ဆက်ပေးမည့် ဒေသတွင်း သတင်းအချက်အလက် ဖလှယ်ရေးဗဟိုဌာနအဖြစ် ရှီးလ် စနစ်ကို လာမည့် ဇွန်လတွင် စတင်အသုံးပြုသွားမည် ဖြစ်သည်။

မစ္စ ရာချဒါ က ဝန်ကြီးချုပ်သည် လွှတ်တော်သို့ တင်သွင်းသည့် မူဝါဒရေးရာ မိန့်ခွန်းတွင် နိုင်ငံဖြတ်ကျော် ရာဇဝတ်မှုကွန်ရက်များနှင့် လိမ်လည်မှုလုပ်ငန်းများကို နှိမ်နင်းရေးအား နိုင်ငံအဆင့် ဦးစားပေးကိစ္စတစ်ရပ်အဖြစ် အစောပိုင်းကတည်းက ကြေညာထားခဲ့ကြောင်း ထောက်ပြခဲ့သည်။

မကြာသေးမီက ထူးခြားသော တိုးတက်မှုတစ်ခုမှာ Ben Smith၊ Yim Liak နှင့် ၎င်းတို့၏ အပေါင်းအပါများကို တရားစွဲဆိုကာ ဘတ်ငွေ ၂၀ ဘီလျံကျော် တန်ဖိုးရှိသော ပိုင်ဆိုင်မှုများကို သိမ်းဆည်းခဲ့ခြင်း ဖြစ်သည်။ ယင်းနောက်ပိုင်းတွင် စုံစမ်းစစ်ဆေးမှုများကို ထိုင်းနိုင်ငံအား ငွေကြေးခဝါချမှု အခြေစိုက်စခန်းအဖြစ် အသုံးပြုနေသည့် အခြားအုပ်စုများဆီသို့ပါ တိုးချဲ့လုပ်ဆောင်ခဲ့သည်။

အာဏာပိုင်များသည် ထိုင်း-ကမ္ဘောဒီးယား နယ်စပ်တစ်လျှောက်ရှိ အကြီးစား Call-centre ကွန်ရက်တစ်ခုကိုလည်း ဖြိုခွင်းနိုင်ခဲ့ပြီး၊ ထိုနေရာတွင် နိုင်ငံစုံမှ လူပေါင်း ၁၀,၀၀၀ ကျော်မှာ လူကုန်ကူးခံရပြီး အဓမ္မစေခိုင်းခံနေရကြောင်း တွေ့ရှိခဲ့သည်။ ၎င်းတို့အနက်မှ အများစုမှာ အွန်လိုင်းမှတစ်ဆင့် အချစ်ရေးလိမ်လည်မှုများ နှင့် ရင်းနှီးမြှုပ်နှံမှုဆိုင်ရာ လိမ်လည်မှုများကို ပြုလုပ်ရန် အတင်းအကျပ် ခိုင်းစေခြင်းခံခဲ့ရသည်။

Ref ဘန်ကောက်ပို့စ်