သဘာဝဘေးဒ-ဏ်ခံစားနေရသည့် နီပေါနိုင်ငံနှင့် တရုတ်နိုင်ငံနယ်စပ်ဒေသတွင်နေထိုင်သူများအတွက် မြန်မာနိုင်ငံတော်အစိုးရက အမေရိကန်ဒေါ်လာ(၅)သိန်းနှင့် ပဲ(၈)တန်ကို လှူဒါန်းပေးခဲ့ကြောင်း သိရသည်။
မြန်မာအစိုးရ(ကိုယ်စား )လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဒေါက်တာသန်းစိုးနှင့် တာဝန်ရှိသူများက စက်တင်ဘာ ၂ ရက်တွင် တပ်မတော်လေယာဉ်ဖြင့် ရန်ကုန်မြို့မှ နီပေါနိုင်ငံ၊ ကတ္တမန္ဒူးမြို့ရှိ Tribhuvan International Airport (KTM)သို့သွားရောက်လှူဒါန်းခဲ့ကြောင်း သိရသည်။
လူကယ်ပြန် ဒုတိယဝန်ကြီးက ယခုလှူဒါန်းမှုသည် နီပေါပြည်သူများအပေါ် မြန်မာနိုင်ငံအစိုးရနှင့်ပြည်သူများ၏ လူသားချင်းစာနာထောက်ထားမှုအရ ကူညီထောက်ပံ့ခြင်းဖြစ်ပြီး နှစ်နိုင်ငံချစ်ကြည်ရေးနှင့် ပူးပေါင်းဆောင်ရွက်မှုများတိုးမြှင့်နိုင်မည်ဟုမျှော်လင့်ကာ သဘာဝဘေးသင့်သူများ အမြန်ဆုံးပုံမှန်ဘဝပြန်လည်ရောက်ရှိစေရေး ဆုမွန်ကောင်းတောင်းသည်ဟု ပြောကြားခဲ့သည်။
ထို့အတူ နီပေါနိုင်ငံ သိပ္ပံ၊ နည်းပညာနှင့် တီထွင်ဆန်းသစ်မှုဝန်ကြီးဌာနဝန်ကြီးကလည်း မြန်မာနိုင်ငံတော်အစိုးရနှင့်ပြည်သူများ၏ လူသားချင်းစာနာထောက်ထားမှုဆိုင်ရာကူညီပံ့ပိုးပေးမှုအတွက် အထူးကျေးဇူးတင်ပြီး ယင်း ကူညီထောက်ပံ့မှုများကို သဘာဝဘေးသင့်သူများအတွက် ထိရောက်စွာအသုံးပြုသွားမည်ဟု ပြောသည်။
ထို့နောက် နီပေါနိုင်ငံမှ သဘာဝဘေးသင့်သူများ၏ အရေးပေါ်လိုအပ်ချက်များကိုဖြည့်ဆည်းပေးနိုင်ရေးနှင့် ကယ်ဆယ်ရေး၊ ပြန်လည်ထူထောင်ရေးလုပ်ငန်းများတွင် အထောက်အကူဖြစ်စေရန်ရည်ရွယ်၍ အမေရိကန်ဒေါ်လာ(၅)သိန်းနှင့် မတ်ပဲ(၅)တန်၊ ကုလားပဲ(၃)တန်တို့ကိုပေးအပ်လှူဒါန်းခဲ့ကြောင်း သိရသည်။