ထိုင်းနိုင်ငံ ချင်းရိုင်ပြည်နယ် မယ်ဆိုင်မြို့တွင် မိုးသည်းထန်စွာရွာသွန်းမှုကြောင့် အင်္ဂါနေ့တွင် မြစ်ချောင်းများရေလျှံကာ မြစ်ကမ်းဘေး လူနေရပ်ကွက်များနှင့် လမ်းများပေါ်သို့ ရေတက်လာခဲ့သည်။
ဒေသခံများသည် ၂၀၂၄ ခုနှစ်ကကဲ့သို့ ရေကြီးရေလျှံမှုများ ထပ်ဖြစ်လာမည်ကို စိုးရိမ်သောကြောင့် ယမန်နေ့နံနက်အစောပိုင်းမှစကာ ဘေးလွတ်ရာသို့ ရွှေ့ပြောင်းခြင်းနှင့် ပိုင်ဆိုင်ပစ္စည်းများကို အမြင့်ပိုင်းနေရာများသို့ ပြောင်းရွှေ့နေကြသည်။
မယ်ဆိုင်တွင် ယမန်နေ့နံနက်ပိုင်းမှစကာ အဆက်မပြတ်ရွာသွန်းနေသောမိုးကြောင့် ရေကြီးရေလျှံမှုအခြေအနေသည် စိုးရိမ်ဖွယ်ရာဖြစ်လာကြောင်း သဘာဝဘေးကာကွယ်ရေးနှင့် လျော့ပါးရေးဦးစီးဌာနက ယမန်နေ့မွန်းလွဲ ၁ နာရီတွင် သတင်းထုတ်ပြန်ခဲ့သည်။
“Hug Mae Sai” ၏ ဖေ့စ်ဘုတ်ပေ့ချ်တွင် ဖော်ပြချက်အရ မိုင်လုံခွန်ကျေးရွာတွင် လမ်းများစွာ ရေမြုပ်လျက်ရှိသည်ဟု ဆိုသည်။ ရေပမာဏ အရမ်းမများသေးသော်လည်း ရပ်ရွာများ၏ လမ်းများနှင့် လမ်းကြားများရှိ အစိတ်အပိုင်များ ရေနစ်မြုပ်နေပြီဖြစ်ကာ မိုးအဆက်မပြတ် ဆက်လက်ရွာသွန်းနေမှုကြောင့် အချို့နေရာများတွင် နေရာအနှံ့ ရေလွှမ်းမိုးမှုများဖြစ်နေခဲ့သည်။
မယ်ဆိုင်ခရိုင်နှင့် မြန်မာနိုင်ငံ တာချီလိတ်မြို့ကို ဆက်သွယ်ထားသည့် အမှတ် ၁ ချစ်ကြည်ရေးတံတားဝန်းကျင် အခြေအနေသည် ပိုမိုဆိုးရွားလျက်ရှိသည်။ အထူးသဖြင့် မယ်ဆိုင်ရှိ မြစ်ကမ်းဘေး လူနေရပ်ကွက်များအတွင်းသို့ ရေများရောက်ရှိလာခဲ့သဖြင့် နယ်စပ်နှစ်ဖက်လုံးတွင် ရေကြီးရေလျှံနေသည်။
ကိုဆိုင်ခရိုင်ခွဲတွင် မြစ်ကြောင်းများ ရေလျှံမှုကြောင့် အနီးရှိ လူနေရပ်ကွက်များသို့ ရေဝင်၍ ဘေးလွတ်ရာ သို့ရွှေ့ပြောင်းရသည့် ဒေသခံပြည်သူများပိုများလာကာ ပစ္စည်းများကို အမြင့်ပိုင်းနေရာများသို့ ရွှေ့ပြောင်းလျက်ရှိကြသည်။ ဒေသခံများစွာသည် ၂၀၂၄ ခုနှစ် ရေဘေးအန္တရာယ်မျိုး ပြန်ကြုံရမည်ကို စိုးရိမ်လျက်ရှိကြသည်။
ဒေသဆိုင်ရာ တာဝန်ရှိသူများက အခြေအနေကို အနီးကပ်စောင့်ကြည့်နေပြီး ရေဆက်လက်မြင့်တက်နေပါက အရေးပေါ်အစီအမံများအတွက် ပြင်ဆင်လျက်ရှိကြောင်း သိရသည်။
Ref: သည်နေရှင်း