မနီလာတွင် ခြင်ငါးကောင်ရလျှင့် တစ်ပီဆို ဆုငွေပေး

သွေးလွန်တုပ်ကွေးရောဂါဖြစ်ပွားမှု မြင့်တက်နေသောကြောင့် အ‌ေ-သဖြစ်စေ အရှင်ဖြစ်စေ ခြင်ငါးကောင်ရလျှင် တစ်ပီဆို (အမေရိကန်ဒေါ်လာ နှစ်ဆင့်နီးပါး) ဆုငွေပေးအပ်သည့်အတွက် မနီလာမြို့လယ် ရပ်ကွက်တစ်ခုရှိ ဒေသခံများသည် ဗုဒ္ဓဟူးနေ့က ဆုငွေထုတ်ယူရန် တန်းစီခဲ့ကြသည်။

သူစတင်ခဲ့သော အသိပညာပေး စီမံချက်သည် ဒေသတွင်း သန့်ရှင်းရေးလုပ်ဆောင်မှုများနှင့် ပေါင်းစပ်လိုက်သည့်အခါ အပူပိုင်းဒေသရောဂါ ပြန့်နှံ့မှုကို တားဆီးရာတွင် ကြီးကြီးမားမား အကျိုးသက်ရောက်မှုရှိနိုင်သည်ဟု Addition Hills ကျေးရွာအုပ်ချုပ်ရေးမှူး ကာလစ်တို ကာနဲလ်က ပြောဆိုသည်။

ဖိလစ်ပိုင် ကျန်းမာရေးတာဝန်ရှိသူများနှင့် ပညာရှင်များက ယင်းအစီအစဉ်အပေါ် ယုံကြည်မှုသိပ်မရှိဟု အေအက်ဖ်ပီကို ပြောဆိုခဲ့သော်လည်း ရောဂါပိုးသယ်ဆောင်နိုင်သော ခြင်များထည့်ထားသည့် ပုံးများ၊ ခွက်များနှင့် အခြားထည့်စရာပစ္စည်းကို ကျေးရွာခန်းမရှိရာသို့ သယ်ဆောင်လာကာ ဆုငွေနှင့်လဲရန် ရောက်ရှိလာသည့် ဒေသခံများကြားတွင်မူ စိတ်အားထက်သန်မှု မြင့်မားနေခဲ့သည်။

ဖိလစ်ပိုင်နိုင်ငံသည် ၂၀၂၃ ခုနှစ်၌ အနောက်ပစိဖိတ်ဒေသတွင် သွေးလွန်တုပ်ကွေးရောဂါအဖြစ်များဆုံး နိုင်ငံအဖြစ် ကမ္ဘာ့ကျန်းမာရေးအဖွဲ့က သတ်မှတ်ထားပြီး ရောဂါဖြစ်ပွားသူ ၁၆၇,၃၅၅ ဦးနှင့် ‌ေ-သဆုံးသူ ၅၇၅ ဦး ရှိခဲ့သည်ဟု ဆိုသည်။

သွေးလွန်တုပ်ကွေးရောဂါသည် အသက်ဆုံးရှုံးနိုင်ခြေနည်းသော်လည်း ဖျားနာခြင်း၊ ခေါင်းကိုက်ခြင်းမှသည် ဂလင်းများရောင်ရမ်းခြင်းကဲ့သို့ ရောဂါလက္ခဏာများ ခံစားရသည်။

ဖေဖော်ဝါရီ ၁ ရက်အထိ ရောဂါဖြစ်ပွားသူ လူနာပေါင်း ၂၈,၂၀၀ တွေ့ရှိခဲ့ပြီး နိုင်ငံ၌ ယခုနှစ်တွင် ရောဂါဖြစ်ပွားမှုသည် ပုံမှန်မဟုတ်သောအနေအထားဖြင့် မြင့်တက်လာသည်ဟု ကျန်းမာရေးဌာနမှ ပြောရေးဆိုခွင့်ရှိသူ ဒေါက်တာ အဲလ်ဘတ် ဒိုမင်ဂိုက ပြောဆိုခဲ့ပြီး ယမန်နှစ်အလားတူကာလကထက် ရောဂါဖြစ်ပွားမှု ၄၀ ရာခိုင်နှုန်း တိုးမြင့်လာသည်ဟု ဆိုသည်။

နိုင်ငံတွင် မြို့ကြီး ငါးမြို့နှင့် မြူနီစီပယ်နယ်မြေများကို ရောဂါဖြစ်ပွားနေကြောင်း ကြေညာထားကြောင်း သိရသည်။

သွေးလွန်တုပ်ကွေးရောဂါတိုက်ဖျက်ရေး စီမံချက်အားလုံးကို ကြိုဆိုသော်လည်း Addition Hills ကျေးရွာ၏ ခြင်ဖမ်းဆီးပုံမျိုးသည် သက်ရောက်မှု အနည်းငယ် သို့မဟုတ် လုံးလုံး မရှိနိုင်ဟု ပြည်သူ့ကျန်းမာရေးပညာရှင် အန်သိုနီ လီချွန်က အေအက်ဖ်ပီကို ပြောဆိုသည်။

အချို့သော ဒေသခံများသည် ငွေကြေးအတွက် ခြင်များကို ပေါက်ပွားစေခြင်းဖြင့် ပြဿနာကို ပို၍ပင် ဆိုးစေနိုင်သည်ဟု သူက သတိပေးခဲ့သည်။