ဗီဇာကင်းလွတ်ခွင့်ကို ပြန်သုံးသပ်ရန် ထိုင်းဝန်ကြီးချုပ်ပြော

ဘန်ကောက်၊ မေလ ၁၂ ရက်

ထိုင်းနိုင်ငံ၊ ပတ္တရားမြို့တွင် တရားမဝင် လက်နက်မှောင်ခိုဂိုဏ်းနှင့် ဆက်နွှယ်နေသည်ဟု သံသယရှိရသော တရုတ်နိုင်ငံသားတစ်ဦးကို ဖမ်းဆီးရမိပြီးနောက် ထိုင်းဝန်ကြီးချုပ် အနူတင် ချန်ဗီရာကူးလ်က နိုင်ငံ၏ ဗီဇာကင်းလွတ်ခွင့်မူဝါဒကို ပြန်လည်သုံးသပ်သွားမည်ဖြစ်ကြောင်း တနင်္လာနေ့တွင် အရိပ်အမြွက် ပြောကြားခဲ့သည်။

စီးပွားရေးနှင့် ခရီးသွားကဏ္ဍ မြှင့်တင်ရေးနှင့် နိုင်ငံတော်လုံခြုံရေးတို့အကြား ချိန်ဆဆောင်ရွက် နိုင်ရန်အတွက် ဗီဇာကင်းလွတ်ခွင့် အစီအစဉ်ကို သက်ဆိုင်ရာ ဌာနဆိုင်ရာပေါင်းစုံနှင့် ညှိနှိုင်းကာ ပြန်လည်ဆန်းစစ်ရန် လိုအပ်ကြောင်း ဝန်ကြီးချုပ်က ဆိုသည်။

ဝန်ကြီးချုပ်က ယခုမူဝါဒကို အလုံးစုံ ပြောင်းလဲပစ်ရန် တောင်းဆိုမှုများအပေါ် ခုခံပြောဆိုခဲ့ပြီး ဖြစ်ရပ်တစ်ခုတည်းကို ကြည့်ကာ ကောက်ချက်မချရန် သတိပေးခဲ့သည်။

တစ်နှစ်လျှင် နိုင်ငံခြားသား ဧည့်သည်ပေါင်း သန်းနှင့်ချီ၍ ဥပဒေနှင့်အညီ လာရောက်လည်ပတ်နေကြခြင်းဖြစ်ပြီး ပြဿနာအနည်းငယ်ကြောင့် စနစ်တစ်ခုလုံးကို မထိခိုက်စေလိုကြောင်း ၎င်းက ဖြည့်စွက်ပြောကြားခဲ့သည်။

ယခုဖြစ်စဉ်တွင် ချောင်ဘူရီ (Chon Buri) ပြည်နယ်ရှိ သံသယရှိသူ တရုပ်လူမျိုး ၏ နေအိမ်တွင် လက်နက်များ ရှာဖွေတွေ့ရှိခဲ့မှုနှင့် ပတ်သက်၍ တာဝန်ထမ်းဆောင်ဆဲ ရေတပ်အရာရှိနှစ်ဦး အပါအဝင် ထိုင်းနိုင်ငံသား ၅ ဦးကို ရဲတပ်ဖွဲ့က အမှုဖွင့် အရေးယူထားပြီးနောက် ဝန်ကြီးချုပ်၏ မှတ်ချက် ထွက်ပေါ်လာခြင်းဖြစ်သည်။

အဆိုပါ ဖြစ်စဉ်နောက်ပိုင်းတွင် အစိုးရအနေဖြင့် နိုင်ငံခြားသားများကို စိစစ်မှုများ ကို တိုးမြှင့် ဆောင်ရွက်နေပြီး နိုင်ငံသားအဖြစ်ခံယူခွင့်ပြုခြင်းနှင့် သန်းခေါင်စာရင်းသွင်းခြင်း လုပ်ငန်းစဉ်များကိုလည်း တင်းကျပ်ထားကြောင်း သိရသည်။

လက်နက်များ၏ အရင်းအမြစ်နှင့် ဆက်နွှယ်နေသော ဂိုဏ်းအဖွဲ့များကို အမြန်ဆုံး ဖော်ထုတ်ရန် ညွှန်ကြားထားသည်။ ဖမ်းဆီးထားသည့် ထိုင်းနိုင်ငံသား ၅ ဦးမှာ တရားမဝင် လက်နက်ကိုင်ဆောင်မှု၊ ရောင်းချမှုများဖြင့် တရားစွဲဆိုခံထားရသော်လည်း ၎င်းတို့က စွပ်စွဲချက်များကို ငြင်းဆိုထားကြောင်း ဘန်ကောက်ပို့စ် သတင်းတွင် ဖော်ပြထားသည်။

Ref: ဘန်ကောက်ပို့စ်