ဗင်နီဇွဲလားငလျင် သေဆုံးသူ ၉၀၀ ကျော်လာ၊ ရာနှင့်ချီသော ပိတ်မိနေသူများကို အပူတပြင်းရှာဖွေနေ

ဗင်နီဇွဲလားနိုင်ငံတွင် လှုပ်ခတ်ခဲ့သော အားပြင်းငလျင်နှစ်ခုကြောင့် သေဆုံးသူဦးရေ ၉၀၀ ကျော်ရှိလာခဲ့ပြီး ဗင်နီဇွဲလားနိုင်ငံသားများနှင့် ကယ်ဆယ်ရေးအဖွဲ့များသည် အသက်ရှင်ကျန်ရစ်ဖွယ်ရှိသူများကို အပူတပြင်းရှာဖွေလျက်ရှိကာ နိုင်ငံခြားကယ်ဆယ်ရေးအဖွဲ့များသည် ငလျင်လှုပ်ခတ်အပြီး နှစ်ရက်နီးပါးအကြာမှသာ အပျက်အစီးများဖြစ်နေသောနေရာများသို့ ရောက်ရှိလာခဲ့သည်။

လူ ၁၇၂ ဦး ပိတ်မိနေဆဲဖြစ်ကာ သေဆုံးဦးရေ ၉၂၀ ဦးနှင့် ဒဏ်ရာရရှိသူ ၃,၃၆၀ ဦးရှိကြောင်း အစိုးရက ပြောကြားခဲ့ပြီး ဝက်ဘ်ဆိုက်တစ်ခုကမူ ပျောက်ဆုံးနေသူ ၅၀,၀၀၀ ကျော်ရှိကြောင်း ဖော်ပြခဲ့သည်။

ဗုဒ္ဓဟူးနေ့ ညနေပိုင်းတွင် ကရာကတ်စ်နှင့် အနီးတစ်ဝိုက်ဒေသများကို ပြင်းအာ ၇ ဒဿမ ၂ နှင့် ၇ ဒဿမ ၅ ရှိသော ငလျင်များ လှုပ်ခတ်သွားခဲ့ပြီးနောက် ပစ္စည်းကိရိယာမလုံလောက်မှုနှင့် ကယ်ဆယ်ရေးဆောင်ရွက်ရာတွင် အစိုးရ၏ မညီမျှသောထောက်ပံ့မှုများအပေါ် စိတ်ပျက်မှုများ တိုးပွားလာခဲ့သည်။

တိုက်ရိုက်ပျက်စီးဆုံးရှုံးမှုသည် ဒေါ်လာ ၆ ဒဿမ ၇ ဘီလျံရှိနိုင်သည်ဟု ကုလသမဂ္ဂက သတင်းထုတ်ပြန်ခဲ့ပြီး ထပ်ဆင့် အာမခံပွဲစား ဂီးကာပင်တာက စီးပွားရေးနှင့် အာမခံဆုံးရှုံးမှုများကြား ကွာဟချက်မှာ အတော်ကြီးမားနိုင်ကြောင်း ပြောကြားခဲ့သည်။

ငလျင်ဗဟိုချက်အနီးရှိ မိုရွန်မြို့တွင် လျှပ်စစ်မီးပြတ်တောက်နေဆဲဖြစ်ကြောင်း ဒေသခံမီးသတ်အကြီးအကဲက ပြောကြားခဲ့သည်။

ငလျင်များကြောင့် အဝေးပြေးလမ်းမကြီးများ ကွဲအက်ကုန်ခဲ့ကာ အဆောက်အအုံများသည် ကွန်ကရစ်ပုံများ၊ တွန့်လိမ်သွားသော သတ္ထု့ပုံများဖြစ်သွားခဲ့သည်ဟု ဒေသတလျှောက်သွားလာခဲ့သည့် မျက်မြင်တွေ့ရှိသူများက ပြောကြားခဲ့သည်။ တည်နေရာများကို ကယ်ဆယ်ရေးသမားများ သိရှိနိုင်စေရန်အတွက် အချို့အပျက်အစီးပုံများကို စပရေးများသုံး၍ အဆောက်အအုံနာမည်များ ရေးမှတ်ထားသည်။

စစ်သားများတင်ဆောင်လာသော ပစ်ကပ်ကားများအပါအဝင် အစိုးရနှင့် ပုဂ္ဂလိကယာဉ်များ စုပြုံဝင်ရောက်လာသောကြောင့် ငလျင်အပြင်းဆုံးခံခဲ့ရသည့် La Guaira ပြည်နယ်တွင် ယာဉ်ကြောပိတ်ဆို့မှုများ ဖြစ်ပေါ်ခဲ့သည်။ ထိုပြည်နယ်တွင် ငလျင်များကြောင့် အထပ်မြင့်တိုက်ခန်းများအပါအဝင် အဆောက်အအုံ ၁၀၀ ထက်မနည်း ပျက်ဆီးခဲ့သည်။

Ref: ဂျေတီ