ဒဗ္ဗလျူအိပ်ချ်အို ညီလာခံသို့ ထိုင်ဝမ်ကို ဖိတ်ကြားမည့်အဆိုပြုချက်ကို အဖွဲ့ဝင်နိုင်ငံများ ပယ်ချ

ထိုင်ဝမ်၏ ပါဝင်မှုကို ပိတ်ပင်မည်ဟု တရုတ်နိုင်ငံက ပြောကြားခဲ့ပြီးနောက် ဂျီနီဗာတွင် ကျင်းပမည့် ကမ္ဘာ့ကျန်းမာရေးအဖွဲ့(ဒဗ္ဗလျူအိပ်ချ်အို)၏ နှစ်ပတ်လည်ညီလာခံသို့ ထိုင်ဝမ်ကို ဖိတ်ကြားမည့် အဆိုပြုချက်အား အဖွဲ့ဝင်နိုင်ငံများက တနင်္လာနေ့တွင် ပယ်ချခဲ့သည်။

တနင်္လာနေ့တွင် စတင်ခဲ့သော အစည်းအဝေးအတွင်း တရုတ်နိုင်ငံသည် ယင်းအဆိုကို ပါကစ္စတန်နှင့်အတူ ကန့်ကွက်ခဲ့သည်။ ထိုင်ဝမ်ကို ဖယ်ထုတ်မှုကို ညီလာခံက လက်ခံခဲ့သည်။

“တရုတ်နိုင်ငံသည် ကမ္ဘာ့ကျန်းမာရေးညီလာခံ(ဒဗ္ဗလျူအိပ်ချ်အေ) တွင် တရုတ်၏ ထိုင်ဝမ်ဒေသကို မည်သည့်ပုံစံဖြင့်မျှ ပါဝင်ရန် သဘောမတူပါ” ဟု တရုတ်ကိုယ်စားလှယ်က အဖွဲ့ဝင်နိုင်ငံများကို ပြောကြားခဲ့သည်။

ဒဗ္ဗလျူအိပ်ချ်အေတွင် ထိုင်ဝမ်ကို လေ့လာသူအဖြစ် ထည့်သွင်းရန် အဆိုပြုချက်ကို ထောက်ခံသည့် နိုင်ငံများတွင် ပါဝင်သော ပါလာယူးနိုင်ငံက ထိုင်ဝမ်ကို ဖယ်ထုတ်မှုသည် မတရားကြောင်းနှင့် ကမ္ဘာလုံးဆိုင်ရာ ရောဂါစောင့်ကြည့်ရေးနှင့် သတင်းအချက်အလက်မျှဝေမှုကို အားနည်းစေမည့် အန္တရာယ်ရှိကြောင်း ကိုယ်စားလှယ်များကို ပြောကြားခဲ့သည်။

ဒီမိုကရေစီနည်းကျ အုပ်ချုပ်သော ကျွန်းဒေသကို ၎င်း၏နယ်မြေအဖြစ် သတ်မှတ်သော ပေကျင်း၏ ကန့်ကွက်မှုများကြောင့် ထိုင်ဝမ်သည် နိုင်ငံတကာအဖွဲ့အစည်းများမှ ဖယ်ထုတ်ခံရသည်။

ဒဗ္ဗလျူအိပ်ချ်အိုအစည်းအဝေး၏ ပြင်ပဆွေးနွေးပွဲများအတွက် ဆွစ်ဇာလန်နိုင်ငံသို့ ရောက်ရှိခဲ့ကြောင်း ထိုင်ဝမ်နိုင်ငံခြားရေးဝန်ကြီးက တနင်္ဂနွေနေ့တွင် ကြေညာခဲ့သည်။

Ref: အေးရှားဝမ်း