ထိုင်းနိုင်ငံအတွင်း အွန်လိုင်းလိမ်လည်လောင်းကစားမှုများ လုပ်ကိုင်ပြီး မြန်မာနိုင်ငံအတွင်း တရားမဝင် နယ်စပ်ဖြတ်ကျော်ဝင်ရောက်လာသည့် တရုတ်နိုင်ငံသားတစ်ဦး ကို မွန်ပြည်နယ် ကျိုက်ထိုမြို့နယ်အတွင်း မတ် ၉ ရက်နေ့တွင် ဖမ်းဆီးရမိ ခဲ့ကြောင်း သိရသည်။
ပြီးခဲ့သည့် မတ်လ ၉ ရက်နေ့တွင် မွန်ပြည်နယ် ကျိုက်ထိုမြို့နယ် မုပ္ပလင်စစ်ဆေးရေးဂိတ်၌ နယ်မြေလုံခြုံရေးဆောင်ရွက်နေသည့် ပူးပေါင်းအဖွဲ့က ရန်ကုန် မော်လမြိုင်ကားလမ်းအတိုင်း ကျိုက်ထိုမြို့မှ သိမ်ဇရပ်မြို့ဘက် သို့ လမ်းလျှောက်လာသည့် တရုတ်နိုင်ငံသားတစ်ဦးဖြစ်သည့် Mr.Jiang Xiaoqiang ကို ဖမ်းဆီးရမိခဲ့ခြင်း ဖြစ်ကြောင်း သိရသည်။
အဆိုပါ တရုတ်နိုင်ငံသားသည် ထိုင်းနိုင်ငံတွင် တရုတ်နိုင်ငံသားတစ်ဦး၏ ချိတ်ဆက်မှုဖြင့် ၂၀၂၄ ခုနှစ်က မဲဆောက်မြို့တွင် အွန်လိုင်းလိမ်လည်လောင်းကစားလုပ်ငန်းများ လုပ်ကိုင်ခဲ့ခြင်းဖြစ်ပြီး ပစ္စည်းများ၊ဖုန်း ပတ်စ်ပို့နှင့် ဗီဇာများကိုလည်း သိမ်းဆည်းခံထားရခြင်း ဖြစ်ကြောင်း သိရသည်။
၂၀၂၆ ခုနှစ် မတ်လအတွင်းတွင် သောင်ရင်းမြစ်ကို စက်လှေဖြင့် ဖြတ်ကူးပြီး မြဝတီမြို့သို့ ရောက်ရှိပြီး အဆောက်အုံတစ်ခုတွင် နေထိုင်ခဲ့ရချိန် အစောင့်ဖြစ်သူကို ထိုးကြိတ်ပြီး ထွက်ပြေးခဲ့ရခြင်း ဖြစ်ကြောင်း သိရသည်။
အဆိုပါ ထွက်ပြေးခဲ့စဉ် ကားဖြင့် လမ်းကြုံလိုက်ခြင်း လမ်းလျှောက်ခြင်းဖြင့် မုပ္ပလင်စစ်ဆေးရေးဂိတ်တွင် ဖမ်းဆီးခံခဲ့ရခြင်းလည်း ဖြစ်သည်။
လက်ရှိ တရားမဝင် နယ်စပ်ဖြတ်ကျော် ၍ ဝင်ရောက်လာသည့် တရုတ်နိုင်ငံသားကို ထိန်းသိမ်းထားပြီး မြန်မာနိုင်ငံလူဝင်မှုကြီးကြပ်ရေးအက်ဥပဒေ ပုဒ်မ ၃(၁) အရ အရေးယူဆောင်ရွက်နေကြောင်း သိရသည်။