ကယ်လီဖိုးနီးယားပြည်နယ် Garden Grove မြို့ရှိ စက်ရုံတစ်ခုတွင် ဓာတုပစ္စည်းပါသော မီးလောင်မှုဖြစ်ပွား၍ အရေးပေါ်အခြေအနေကြေညာ၊ ဒေသခံ ၅ သောင်းခန့် ဘေးလွတ်ရာရွှေ့ပြောင်းရန် သတိပေးအမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ Orange County၊ Garden Grove မြို့ရှိ စက်ရုံတစ်ခုတွင် Methyl methacrylate (မီသိုင်း မက်သကရီလိတ်) ဓာတုပစ္စည်းများ ပါဝင်သော မီးလောင်မှုတစ်ခု ဖြစ်ပွားခဲ့ပြီး အဆိပ်သင့်စေနိုင်သည့် ဓါတ်ငွေ့များ ပါဝင်သော ဓါတ်ပေါင်းဖိုတစ်ခုမှာ အပူချိန်အလွန်အမင်း မြင့်မားကာ ပေါက်ကွဲနိုင်ခြေရှိသည့် အန္တရာယ်ရှိသော အခြေအနေသို့ ရောက်ရှိနေကြောင်း သိရသည်။

အဆိုပါ ဖြစ်စဉ်ကြောင့် Orange County မီးသတ်ဌာနက မီးလောင်မှုဖြစ်ပွားရာ ဝန်းကျင်တစ်ဝိုက်ရှိ ဒေသခံပြည်သူ ၅၀,၀၀၀ (ငါးသောင်း) ခန့်အား ဘေးကင်းရာသို့ အရေးပေါ် ပြောင်းရွှေ့ကြရန် သတိပေးချက် ထုတ်ပြန်ထားပြီး၊ ကယ်လီဖိုးနီးယားပြည်နယ် အုပ်ချုပ်ရေးမှူး Gavin Newsom ကလည်း Orange County အတွင်း မေလ ၂၃ ရက်နေ့တွင် အရေးပေါ်အခြေအနေ (State of Emergency) အဖြစ် တရားဝင် ကြေညာထားသည်။

မြန်မာနိုင်ငံသားများအတွက် လော့စ်အိန်ဂျလိစ်မြို့ မြန်မာကောင်စစ်ဝန်ချုပ်ရုံး သတိပေးချက်

လော့စ်အိန်ဂျလိစ်မြို့ မြန်မာကောင်စစ်ဝန်ချုပ်ရုံးကလည်း Orange County အတွင်း နေထိုင်ကြသော မြန်မာနိုင်ငံသားများအနေဖြင့် သက်ဆိုင်ရာ အမေရိကန်အာဏာပိုင်ဌာနများက ထုတ်ပြန်သည့် တရားဝင် အရေးပေါ် ထုတ်ပြန်ချက်များကို အချိန်နှင့်တစ်ပြေးညီ စောင့်ကြည့်ကြရန်နှင့် အထူးလိုက်နာ ဆောင်ရွက်ကြရန် အသိပေးထားသည်။

အရေးပေါ် ရွှေ့ပြောင်းရန် လိုအပ်ပါက အောက်ပါ သတ်မှတ်ထားသော ကယ်ဆယ်ရေးစခန်း (Evacuation Centers) များသို့ ဆက်သွယ်ရွှေ့ပြောင်းနိုင်ပြီး၊ အကူအညီလိုအပ်ပါက မြန်မာကောင်စစ်ဝန်ချုပ်ရုံး၏ Hot Line ဖုန်းနံပါတ်များသို့ ဆက်သွယ်နိုင်ကြောင်း ထုတ်ပြန်ထားသည် ။

ယာယီကယ်ဆယ်ရေးစခန်းများ

(Evacuation Centers)
Garden Grove Sports and Recreation Center Address: 13641 Deodara Dr. Garden Grove, CA 92844
Cypress Recreation and Community Center Address: 5700 Orange Ave. Cypress, CA 90630

Public Information Hotline: 714-628-7085
24-Hour Call Center: 714-741-5444

📞 မြန်မာကောင်စစ်ဝန်ချုပ်ရုံး အရေးပေါ် Hot Line ဖုန်းနံပါတ်များ
၂၁၃ ၄၁၀ ၆၁၄၃
၂၁၃ ၃၈၇ ၀၀၄၃ (ရုံးဖုန်းနံပါတ်)