အမေရိကန်နိုင်ငံ၏ လွတ်လပ်ရေးနှစ် (၂၅၀) ပြည့် အထိမ်းအမှတ်အဖြစ် ကျင်းပမည့် UFC Freedom250 ခေါင်ပွဲစဉ်များကို ရန်ကုန်မြို့ရှိ အမေရိကန်စင်တာ၌ အတူတကွကြည့်ရှုနိုင်ရန် မြန်မာနိုင်ငံဆိုင်ရာ အမေရိကန်သံရုံးက ဖိတ်ခေါ်ထားကြောင်း သိရသည်။
အဆိုပါ အစီအစဉ်ကို ဇွန်လ ၁၅ ရက်နေ့တွင် ကျင်းပမည်ဖြစ်ပြီး တက်ရောက်သူများအနေဖြင့် မနက်စာသုံးဆောင်ရင်း အိမ်ဖြူတော်တောင်ဘက် မြက်ခင်းပြင်မှ တိုက်ရိုက်ထုတ်လွှင့်မည့် UFC Freedom250 ပွဲစဉ်များကို ကြည့်ရှုနိုင်မည်ဖြစ်သည်။
ထို့ပြင် Freedom250 အထိမ်းအမှတ် လက်ဆောင်ပစ္စည်းများ ရယူနိုင်မည့်အပြင် မြန်မာနိုင်ငံရှိ MMA (Mixed Martial Arts) ဝါသနာရှင်များနှင့် တွေ့ဆုံရင်းနှီးခွင့်လည်း ရရှိမည်ဖြစ်ကြောင်း သိရသည်။
ပွဲကို ဇွန်လ ၁၅ ရက် နံနက် ၆ နာရီခွဲမှ ၁၀ နာရီခွဲအထိ ရန်ကုန်အမေရိကန်စင်တာ (အမှတ် ၁၄၀၊ အင်းယားလမ်းနှင့် တက္ကသိုလ်ရိပ်သာလမ်းထောင့်၊ ကမာရွတ်မြို့နယ်) တွင် ကျင်းပမည်ဖြစ်သည်။
တက်ရောက်ခွင့် အခမဲ့ဖြစ်သော်လည်း နေရာအကန့်အသတ်ရှိသဖြင့် ကြိုတင်စာရင်းပေးသွင်းရန် လိုအပ်ကြောင်းနှင့် စင်တာအတွင်း ဝင်ရောက်ရာတွင် ဓာတ်ပုံပါ သက်သေခံကတ်ပြားတစ်ခုခု ယူဆောင်လာရမည်ဖြစ်ကြောင်း အမေရိကန်သံရုံးက အသိပေးထားသည်။