နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က လွတ်လပ်ပြီးတရားမျှတသည့် ပါတီစုံဒီမိုကရေစီအထွေထွေရွေးကောက်ပွဲအား ယခု ၂၀၂၅ ခုနှစ်၊ ဒီဇင်ဘာလအတွင်း၌ကျင်းပရန် ဆောင်ရွက်လျက်ရှိသည်ဟုပြောကြားထားရာ ပြည်ထောင်စုရွေးကောက်ပွဲကော်မရှင်(UEC)မှလည်း ရွေးကောက်ပွဲကျင်းပမည့်ရက်အား လျာထားသတ်မှတ်ပြီးဖြစ်ကာ အချိန်မီကြိုတင်ထုတ်ပြန်ပေးသွားမည်ဟု အသိပေးခဲ့သည်။
ထိုသို့ ရွေးကောက်ပွဲကျင်းပမည့်ရက်အား သတ်မှတ်ကြေညာပြီးနောက်ပိုင်းတွင် လွှတ်တော်ကိုယ်စားလှယ်လောင်းများ၏ အမည်စာရင်းကိုစိစစ်ပြီးချိန်၌ မဲဆွယ်စည်းရုံးရေးကာလကို သတ်မှတ်ကြေညာပေးသွားမည်ဟု အသိပေးခဲ့သည်။
ထို့ပြင် လက်ရှိအချိန်၌ တစ်နိုင်ငံလုံးစည်းရုံးမည့် ပါတီ(၉)ခုအနက် ပါတီ(၃)ခုမှာ သတ်မှတ်ရုံးခန်း အရေအတွက်ဖွင့်လှစ်ထားနိုင်ပြီး ပါတီ(၆)ခုမှာ နိုင်ငံရေးပါတီများမှတ်ပုံတင်ခြင်းဥပဒေပါသတ်မှတ်ချက်အတိုင်း ရွေးကောက်ပွဲကျင်းပမည့် နေ့ရက်မတိုင်မီ အနည်းဆုံးရက်ပေါင်း(၉၀)ကြိုတင်၍ ကော်မရှင်၏အမိန့်ကြော်ငြာစာဖြင့်ထုတ်ပြန်သည့် နေ့ရက်အတွင်း သတ်မှတ်ရုံးခန်းပြည့်မီနိုင်ရေးကိုဆောင်ရွက်ရမည်ဟု အသိပေးခဲ့သည်။
ထို့အတူ တိုင်း(သို့)ပြည်နယ်တစ်ခုအတွင်း၌သာ စည်းရုံးမည့် ပါတီ(၄၅)ခုအနက် ပါတီ(၁၉)ခုမှာ သတ်မှတ်ရုံးခန်းအရေအတွက်ဖွင့်လှစ်ထားနိုင်ပြီး ပါတီ(၂၆)ခုမှာ သတ်မှတ်ရက်အတွင်း ရုံးခန်းပြည့်မီရန်ဆောင်ရွက်ရမည်ဖြစ်ကာ နယ်မြေအခြေအနေ ကန့်သတ်ချက်ရှိသော တိုင်းနှင့် ပြည်နယ်များရှိ ပါတီများရုံးခန်းဖွင့်လှစ်ရာတွင်လည်း သက်ဆိုင်ရာပါတီ၏ တင်ပြချက်အပေါ် စိစစ်ပြီး လုံခြုံရေးကောင်းမွန်သည့် မြို့နယ်ရုံးများတွင် ယာယီတွဲဖက်ဖွင့်လှစ်ခွင့်ပြုထားသည်ဟု အသိပေးခဲ့သည်။
ထို့ပြင် နယ်မြေအခြေအနေအခက်အခဲကြောင့် ပါတီစုံဒီမိုကရေစီအထွေထွေရွေးကောက်ပွဲအား ဝင်ရောက်ယှဥ်ပြိုင်ရန်အခက်အခဲရှိသော ပါတီများအတွက်လည်း UEC မှဖြေလျော့ဆောင်ရွက်ပေးထားသည်ဟု အသိပေးခဲ့သည်။