1:30 pm
ဟုမ္မလင်း၊ မေ ၂၁
တရားမ၀င်သစ်လို့ လူမှုကွန်ရက်မှာ ဝေဖန်ပြောဆိုနေကြတဲ့ စစ်ကိုင်းတိုင်း ဟုမ္မလင်းမြို့နယ် ရွှေပြည်အေးမြို့သစ်က သစ်ပုံကြီးကို ၀င်ရောက်စစ်ဆေးခဲ့ပေမယ့် တရားမ၀င်သစ်မတွေ့ရှိရဘူးလို့ ဟုမ္မလင်းမြို့နယ် သစ်တောဦးစီးဌာန က ပေါ်ပြူလာနယူးစ်ကိုပြောပါတယ်။
ရွှေပြည်အေးမြို့သစ်မှာရှိတဲ့ အဆိုပါ သစ်လုံးတွေအလုံးလိုက်ပုံထားတဲ့ သစ်ပုံကြီးနဲ့ပတ်သက်ပြီး တရားမ၀င်သစ်တွေဖြစ်ကြောင်း ၊ သစ်မှောင်ခိုမှုတွေရှိနေကြောင်း မေ ၁၄ ရက်နေ့ညနေပိုင်းမှာ သတင်းရရှိခဲ့လို့ မေ ၁၅ ရက်နေ့ မနက်မှာပဲ တာဝန်ရှိသူတွေနဲ့ သွားရောက်စစ်ဆေးခဲ့ကြောင်း ဟုမ္မလင်းသစ်တောဦးစီးဌာနကနေသိရပါတယ်။
သစ်တောဦးစီးဌာန ဦးစီးအရာရှိ ဦးအေးချမ်းဖြိုးက “စစ်ဆေးပြီးသွားပြီခင်ဗျ။ ၁၄ ရက်နေ့မှာသတင်းရပြီး ရရချင်း၊ ကျွန်တော်တို့က ဝေးတယ်လေ။ ၁၅ ရက်နေ့မနက်မှာသွားစစ်ပါတယ်။ တရားမ၀င်သစ်တော့ဘာမှမတွေ့ရှိရဘူး။ သစ်လုံးတွေအားလုံးခွဲခြမ်းတွေအားလုံးက စာရွက်စာတမ်းတွေနဲ့ကိုက်ညီနေတယ်” လို့ ပေါ်ပြူလာနုယူးစ်ကိုပြောပါတယ်။
သွားရောက်စစ်ဆေးမှုမှာ မြန်မာနိုင်ငံရဲတပ်ဖွဲ့၊ သစ်တောဦးစီးဌာန၊ ဟုမ္မလင်းမြို့နယ်အထွေထွေအုပ်ချုပ်ရေးမှူး တို့ လည်းပါဝင်ခဲ့တယ်လို့ သူကပြောပါတယ်။
ပြီးခဲ့တဲ့ မေ ၁၄ ရက်နေ့က ဟုမ္မလင်းမြို့နယ် ရွှေပြည်အေးမြို့သစ်မှာတည်ရှိတဲ့ သစ်ပါးလွှာစက်ရုံတစ်ခုကို တရာမ၀င်သစ်တွေဝင်ရောက်နေတယ်ဆိုတဲ့ အကြောင်း ဓာတ်ပုံတွေနဲ့စာသားအချို့ ဟာ လူမှုကွန်ရက်တွေမှာပျံ့နှံ့ခဲ့ပြီး ဟုမ္မလင်းမြို့နယ်သစ်တောဦးစီးဌာနကို လိပ်မူတိုင်ကြားမှုတွေအထိရှိခဲ့ပါတယ်။
ဒီအတွက် မေ ၁၅ ရက်နေ့မနက်မှာ တာဝန်ရှိသူတွေဟာကွင်းဆင်းသွားရောက်စစ်ဆေးခဲ့တာဖြစ်တယ်လုိ့သိရပါတယ်။
“သူတို့အထဲမှာ သစ်လုံးအလုံး ၂၀၀ပေ့ါနော်။ ရောင်းဝယ်ထားတဲ့ စာရွက်စာတမ်းနဲ့အကုန်လုံးကိုက်ညီတယ်။ အဲ့ဒါတွေ့ရှိရတယ်။ ပြီးတော့ သစ်လုံးခွဲခြမ်း ၃၆ ခြမ်း ၊ အဲဒီဟာလည်းစာရွက်စာတမ်းမှာရှိတဲ့ သစ်လုံးတွေနဲ့ ခွဲခြမ်းတွေနဲ့ အကုန်လုံး ကိုက်ညီတယ်” လို့ သစ်တောဦးစီး ဦးစီးအရာရှိ ဦးအေးချမ်းဖြိုးက ပြောပါတယ်။
AF-178