1:59 pm
ပလက်ဝ ၊ ဒီဇင်ဘာ ၂၇
AA နဲ့ တိုက်ပွဲဖြစ်ပွားနေတဲ့ ချင်းပြည်နယ်ပလက်ဝမြို့နယ်အတွင်းကို ဆန်သယ်ယူခွင့် တပ်မတော်က ကန့်သတ်ထားတယ်လို့သိရပါတယ်။
ဒီဇင်ဘာလ လလယ်လောက်ကစပြီး ကန့်သတ်လိုက်တာဖြစ်ပြီး စစချင်းကန့်သတ်လိုက်တုန်းကဆိုရင် ဆန်ရှားပါးသွားတဲ့အတွက် ဆန်အရောင်းဆိုင်တစ်ချို့ပိတ်ထားခဲ့ရတယ်လို့ ပလက်ဝမြို့နေဒေသခံတွေထံကနေသိရပါတယ်။
လူတစ်ယောက်ကို ဆန်တစ်အိတ်သယ်ယူခွင့်ပြုထားပြီး အရောင်းဆိုင်တွေကိုလည်းကန့်သတ်ခဲ့တယ်လို့သိရပါတယ်။
“ကန့်သတ်ထားပါတယ်။ အဓိကက တိုက်ပွဲဖြစ်နေတော့ တစ်ခြားလက်နက်ကိုင်အဖွဲ့ထံကို ရိက္ခာရောက်မှာစိုးတဲ့အတွက်။ အဲ့ဒီသဘောပါပဲ” လို့ ချင်ပြည်နယ်အစိုးရအဖွဲ့ လမ်းပန်းဆက်သွယ်ရေးဝန်ကြီး ဦးရွှေအိုးထီး က ပြောပါတယ်။
ခုရက်ပိုင်းအတွင်းမှာတော့ ဆန်အရောင်းဆိုင်တွေကို ဆန် ၁၅ အိတ် စီသယ်ဆောင်ခွင့်ပေးထားပြီး ၀ယ်ယူစားသောက်လို့ ရနေတယ်လို့ ပလက်ဝမြို့နယ်နေဒေသခံတစ်ဦးဖြစ်သူ မမိုင်းအောင်မဖြူက ဆိုပါတယ်။
“ြ့ပီးခဲ့တဲ့ရက်ပိုင်းကတော့ တော်တော်ရှားသွားတယ်။ အခုတော့ ပြန်အဆင်ပြေနေပါပြီ” လို့ သူက ဆိုပါတယ်။
ချင်းပြည်နယ်ပလက်ဝမြို့နယ်ထဲမှာဆိုရင် တောင်ယာစပါးစိုက်ပျိုးမှုရှိပေမယ့် ထွက်နှုန်းမမှန်တာ ၊ စီးပွားရေးအရသိပ်ပြီးစိုက်ပျိုးခြင်းမရှိတာတွေကြောင့်ဒေသထွက်စပါးနဲ့လောက်ငှမှုမရှိဘဲ တစ်ခြားဒေသတွေကနေ ၀ယ်ယူစားသုံးရတယ်လို့ ဒေသခံတွေကဆိုပါတယ်။
ပလက်ဝမြို့နယ်အထဲမှာ ဆန်အရောင်းဆိုင် ၁၀ ဆိုင်ကျော်ရှိပြီး အဓိက အနေနဲ့ ရခိုင်ပြည်နယ် ကျောက်တော်ဘက်ကနေ ကုလားတန်မြစ်ကြောင်းအတိုင်းဆန်ကိုသယ်ယူရပါတယ်။
အဆိုပါ ကုလားတန်မြစ်ကြောင်းမှာ တပ်မတော်ကနေ ဂိတ်သုံးဂိတ်ထားရှိပြီး လက်ရှိမှာစစ်ဆေးတယ်လို့သိရပါတယ်။
ပလက်ဝမြို့နယ်အထဲမှာဖြစ်ပွားနေတဲ့ တပ်မတော်နဲ့ AA တို့ရဲ့တိုက်ပွဲတွေကြောင့် ရှင်းလက်ဝရွာနဲ့ ပတ်ဝန်းကျင်းအနီးနားမှာ စုစုပေါင်း စစ်ဘေးရှောင်ဒုက္ခသည် ၆၀၀ ကျော် ရှိတယ်လို့ လူမှုဝန်ထမ်းကယ်ဆယ်ရေးနဲ့ပြန်လည်နေရာချထားရေးဝန်ကြီးဌာနက ဆိုထားပြီး AA ကတော့ စစ်ဘေးရှောင် ၂၀၀၀ လောက် အိန္ဒိယနိုင်ငံဘက်ကို ထွက်ပြေးတိမ်းရှောင်နေတယ်လို့ ဆိုထားပါတယ်။
YL
Photo-Tayzar Aung