3:45 pm
(နေပြည်တော်၊ ဒီဇင်ဘာ ၄)
ယခုဘဏ္ဍာနှစ်အတွင်း နိုဝင်ဘာလကုန်အထိ လယ်ယာစိုက်ပျိုးရေးကဏ္ဍသို့ နိုင်ငံခြားရင်းနှီးမြုပ်နှံမှုပမာဏ အမေရိကန်ဒေါ်လာသန်း(၁၃၀)ကျော် ဝင်ရောက်ခဲ့ကြောင်း မြန်မာနိုင်ငံရင်းနှီးမြုပ်နှံမှုကော်မရှင်မှသိရသည်။ထိုကြောင့် စိုက်ပျိုးရေးကဏ္ဍသို့ နိုင်ငံခြားရင်းနှီးမြုပ်နှံမှုမှာ ဆယ်စုနှစ်တစ်ခုအတွင်းအများဆုံးပမာဏဖြစ်လာနိုင်ကြောင်း ပြည်တွင်းစိုက်ပျိုးရေးလုပ်ငန်းရှင်များက သုံးသပ်ထားသည်။
“ခုနှစ်မှာ ဂျပန်နဲ့အာရှနိုင်ငံအချို့က စိုက်ပျိုးရေးကဏ္ဍကို စိတ်ဝင်တစားနဲ့ ရင်းနှီးမြုပ်နှံဖို့ လာဆွေးနွေးတာတွေရှိနေပါတယ်။ရင်းနှီးမြုပ်နှံတဲ့ ကုမ္မဏီတွေလည်းရှိနေပါပြီ။ဘဏ္ဍာနှစ်ကုန်ရင်တော့ ရင်းနှီးမြုပ်နှံမှုပမာဏကဆယ်နှစ်အတွင်းအများဆုံးဖြစ်သွားဖို့ရှိနေပါတယ်”ဟု မြန်မာနိုင်ငံရင်းနှီးမြုပ်နှံမှုကော်မရှင် MICမှ တာဝန်ရှိသူတစ်ဦးကဆိုသည်။
ပြည်တွင်းသို့ ဝင်ရောက်လာသည့်နိုင်ငံခြား ရင်းနှီးမြုပ်နှံမှုများတွင် စိုက်ပျိုးရေး ကဏ္ဍသည် အနည်းဆုံးဖြစ်နေသည်။လက်ရှိတွင် အစိုးရနှင့်ပြည်တွင်း ပုဂ္ဂလိကလုပ်ငန်းရှင်များကသာစိုက်ပျိုးရေးကဏ္ဍကို ရင်းနှီးမြုပ်နှံလျှက်ရှိနေပြီး ပြည်ပရင်းနှီးမြုပ်နှံမှုများကို ယခုထက်ပိုမိုဝင်ရောက်လာရန် လိုအပ်နေသည်။
စိုက်ပျိုးရေးကဏ္ဍတွင်အဓိကကျသည့် တောင်သူများအတွက် စိုက်ပျိုးနည်းနှင့် မျိုးစေ့များကို နိုင်ငံတကာကုမ္မဏီများနှင့်ပူးပေါင်းပြီးအကူအညီများပေးနိုင်ပါက ပြည်ပသို့စိုက်ပျိုးရေးထုတ်ကုန်များပိုမိုတင်ပို့နိုင်မည်ဖြစ်သည်။
လက်ရှိတွင် စိုက်ပျိုးရေးထုတ်ကုန်များ၏ (၈၅)ရာခိုင်နှုန်းခန့်မှာ ကုန်ကြမ်းအဆင့်အဖြစ်သာပြည်ပသို့တင်ပို့နေရပြီး နည်းပညာနှင့်ရင်းနှီးမြုပ်နှံမှုများ လိုအပ်နေသည်။
(၂၀၁၀-၂၀၁၁)ဘဏ္ဍာနှစ်တွင် စိုက်ပျိုးရေးကဏ္ဍသို့ နိုင်ငံခြားရင်းနှီးမြုပ်နှံမှုပမာဏ (၁၃၈)သန်းကျော်ဝင်ရောက်ခဲ့ဖူးပြီး ဆယ်စုနှစ်အတွင်းအများဆုံးဖြစ်ခဲ့သည်။ယခုဘဏ္ဍာနှစ်တွင် ဘဏ္ဍာနှစ်ကုန်ဆုံးရန် (၅)လခန့်လိုသေးသော်လည်း ရင်းနှီးမြုပ်နံမှုပမာဏ ကန်ဒေါ်လာသန်း(၁၃၀)ကျော်အထိရှိခဲ့သဖြင့် ဆယ်စုနှစ်အတွင်းအများဆုံးနှစ် ဖြစ်လာမည်ဟု ခန့်မှန်းထားခြင်းဖြစ်သည်။
အောင်ပြည့်စုံ
