5:14 pm
နန်းယွန်း ၊ နိုဝင်ဘာ ၈ရက်
ဖော်ပြထားတဲ့ ပုံတွေကတော့ ကချင်ပြည်နယ် တနိုင်းဒေသ ၊ ရှင်ဗွေယန်မြို့နယ်ကနေ နာဂကိုယ်ပိုင်အုပ်ချုပ်ခွင့်ရဒေသထဲက နန်းယွန်းမြို့နယ် ကို သွားတဲ့လမ်းပိုင်း တစ်ခုရဲ့ ပုံတွေဖြစ်ပါတယ်။
နာဂကိုယ်ပိုင်အုပ်ချုပ်ခွင့်ရဒေသထဲက နန်းယွန်းနဲ့ ပန်ဆောင်မြို့တွေဟာ ဒီလမ်းပိုင်းကိုပဲအဓိကထား မှီခိုနေရတာပါ။ အခုလိုလမ်းပန်းဆက်သွယ်ရေးမကောင်းတဲ့အခါကျတော့ ဒေသရဲ့ ရောင်းဝယ်ဖောက်ကားမှုတွေ ၊ ကုန်စည်သယ်ယူပို့ဆောင်မှုတွေ ဟာ တော်တော်လေးကိုအခက်အခဲဖြစ်နေတာကို Popular News သတင်းထောက်က တွေ့ခဲ့ရပါတယ်။
အခုလမ်းပိုင်းကို နိုင်ငံတကာဆက်သွယ်ရေးလမ်းမကြီး (ဒုတိယကမ္ဘာစစ်ကတည်းကဖောက်လုပ်ခဲ့တဲ့ လီဒိုလမ်းမကြီးရဲ့တစ်စိတ်တစ်ပိုင်း) လို့အမည်ပေးထားတယ်လို့သိရပါတယ်။
ဒီလမ်းပိုင်းဟာ တရုတ်ပြည်ဘက်ကနေစတင်ပြီး ကချင်ပြည်နယ် KIA ထိန်းချုပ်နယ်မြေ လိုင်ဇာကနေ မြန်မာနိုင်ငံအတွင်းဝင်ရောက်ကာ မိုးကောင်း ၊ တနိုင်း ၊ ရှင်ဗွေယန် ၊ နန်းယွန်းး၊ ပန်ဆောင် ကနေတစ်ဆင့် အိန္ဒိယနိုင်ငံထဲကို ဆက်သွယ်ထားတာဖြစ်ပါတယ်။
ဒီလမ်းပိုင်းကို ပြင်ဆင်ဖို့ ပြီးခဲ့တဲ့နှစ်တွေတုန်းက ဘတ်ဂျက်ချထားခဲ့တယ်လို့ သိရပြီး၊တာဝန်ယူတဲ့ပုဂ္ဂလိကကုမ္ပဏီတစ်ခုက လုပ်ငန်းမပြီးဆုံးခင် ရပ်ဆိုင်းသွားတဲ့အတွက် အခုလို လမ်းပိုင်းဆိုးဝါးခဲ့တာဖြစ်တယ်လို့ သက်ဆိုင်ရာ အုပ်ချုပ်ရေးအဖွဲ့အစည်းကပြောပါတယ်။
ဒီလမ်းပိုင်းကို ထပ်မံပြင်ဆင်ဖို့နဲ့ပတ်သတ်ပြီးကတော့ လောလောဆယ် အခြေအနေမရှိသေးတဲ့အနေအထားမှာရှိကြောင်း သက်ဆိုင်ရာအုပ်ချုပ်ရေးတာဝန်ရှိသူတွေက ပေါ်ပြူလာနယူးစ်ကိုပြောပါတယ်။
ရဲလွင်
