ရှေ့ကိုမျှော်၊ အနာဂတ်ကို အာရုံပြုလို့ သွက်သွက်လက်လက် ဆက်လက်လျှောက်လှမ်းစို့ (အယ်ဒီတာ့အာဘော်)

ရှေ့ကိုမျှော်၊ အနာဂတ်ကို အာရုံပြုလို့ သွက်သွက်လက်လက် ဆက်လက်လျှောက်လှမ်းစို့ (အယ်ဒီတာ့အာဘော်)
May 31, 2017 Asian Fame

2:46 pm
ရှေ့ကိုမျှော်၊ အနာဂတ်ကို အာရုံပြုလို့ သွက်သွက်လက်လက် ဆက်လက်လျှောက်လှမ်းစို့ (အယ်ဒီတာ့အာဘော်)

ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှုမပြိုကွဲရေးနှင့် အချုပ်အခြာအာဏာတည်တံ့ခိုင်မြဲရေးတို့ကို ရှေးရှု၍ လွတ်လပ်မှု၊ တန်းတူညီမျှမှုနှင့် တရားမျှတမှုတို့ကို အခြေခံပြီး ပင်လုံစိတ်ဓာတ်နှင့်အညီ ဒီမိုကရေစီအရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့် အခွင့်အရေးများ၊ အာမခံချက်များ အပြည့်အဝရှိသော ဒီမိုကရေစီနှင့် ဖက်ဒရယ်စနစ်တို့ကို အခြေခံသည့် ပြည် ထောင်စုကို နိုင်ငံရေးဆွေးနွေးပွဲ ရလဒ်များနှင့်အညီတည်ဆောက်နိုင်ရေးအတွက် ပြည်ထောင်စုငြိမ်းချမ်းရေးညီလာခံ – (၂၁) ရာစုပင်လုံ ဒုတိယအစည်းအဝေးအား မေလ ၂၄ ရက်မှ ၂၉ ရက်နေ့အထိကျင်းပပြုလုပ်ခဲ့ပြီးဖြစ်သည်။

ယင်းညီလာခံကြီး၏ ရလဒ်မှာမူ ပြည်ထောင်စုငြိမ်းချမ်းရေးဆွေးနွေးမှုပူးတွဲ ကော်မတီ (UPDJC) က အဆိုပြုတင်သွင်းလာသောမူဝါဒ အဆိုပြုချက်များအပေါ်ကဏ္ဍအလိုက်၊ အစုအဖွဲ့အလိုက် ဆွေးနွေးပွဲများကို အဆင့်ဆင့်ကျင်းပပြုလုပ်ပြီး ရရှိလာသော အဆိုပြုချက်များကို ပြည်ထောင်စုသဘောတူစာချုပ် အစိတ်အပိုင်း (၁) အဖြစ် သဘောတူလက်မှတ်ရေးထိုးနိုင်ခဲ့ခြင်းပင်။ အဆိုပါ ပြည်ထောင်စုသဘောတူစာချုပ်အစိတ်အပိုင်း (၁) တွင် နိုင်ငံရေး ကဏ္ဍ မူဝါဒသဘောတူညီချက် ၁၂ ချက်၊ စီးပွားရေးကဏ္ဍ မူဝါဒ သဘောတူညီချက် ၁၁ ချက်၊ လူမှုရေးကဏ္ဍ မူဝါဒ သဘောတူညီချက် ၄ ချက်၊ မြေယာနှင့် သဘာဝပတ်ဝန်းကျင်ကဏ္ဍ မူဝါဒသဘောတူညီချက် ၁ဝ ချက်၊ စုစုပေါင်း သဘောတူညီချက် ၃၇ ချက်ကို သဘောတူလက်မှတ်ရေးထိုးနိုင်ခဲ့သည်။

ထိုသို့ လက်မှတ်ရေးထိုးနိုင်ခဲ့ကြခြင်းနှင့်ပတ်သက်၍ နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်က ”ဒီကနေ့ လက်မှတ် ရေးထိုးနိုင်ခဲ့တဲ့ သဘော တူညီချက်တွေဟာ အမျိုးသားရင်ကြားစေ့ရေး၊ ငြိမ်းချမ်းရေး၊ ဒီမိုကရေစီဖက်ဒ ရယ်ပြည်ထောင်စု ပေါ်ထွန်းရေးလမ်းကြီးအပေါ် လျှောက်လှမ်းလိုက်တဲ့ အရေးကြီးတဲ့ ခြေလှမ်းကြီး’ ဖြစ်ပါတယ်။ ဒီခြေလှမ်းလှမ်းနိုင်ဖို့၊ သဘောတူညီချက် တွေကို လွယ်လွယ်ကူကူ ရရှိခဲ့တာတော့ မဟုတ်ပါဘူး။ ငြိမ်းချမ်းရေးဖြစ်စဉ်မှာ စိတ်ဓာတ်ကျစရာတွေ၊ စိတ်တက်ြ<ွကစရာတွေ ကျော်ဖြတ်ပြီးမှ အခုလိုရရှိလာခဲ့တာ ဖြစ်ပါတယ်”ဟု ပြောကြားသွားခဲ့ပါသည်။

ပြည်သူအားလုံးတို့၏ဆန္ဒမှာလည်း မြန်မာနိုင်ငံကြီးငြိမ်းငြိမ်းချမ်းချမ်းရှိ နေစေ ချင်နေကြပါသည်။ ငြိမ်းချမ်းရေး၏အနှစ်သာရနှင့်ပတ်သက်၍လည်း ငြိမ်းချမ်းသော ဒေသတွင် နေထိုင်ကြသူများထက် မငြိမ်းချမ်းသောဒေသတွင် နေထိုင်ကြသူများက ပို၍ခံစားနားလည်ကြပါသည်။ မည်သူသည် သေနတ်သံတဒိုင်းဒိုင်းကြားဝယ် ကျီးလန့်စာစားဘဝကို လိုချင်ပါမည်နည်း။ သားတကွဲ သမီးတကွဲ ပြေးလွှားနေရသည့် ဘဝမျိုးကို မည်သူမျှမလိုချင်ကြပါ။ သို့ရာတွင် မြန်မာနိုင်ငံ၏ ပြည်တွင်းစစ်မီးတောက် လောင်ခဲ့သည်မှာ ဆယ်စုနှစ် ၇ ခုတာမျှ ကြာမြင့်နေပေပြီ။ ထို့အတွက် အားလုံးတွင် အတိတ်၏ ဒဏ်ရာဒဏ်ချက်များသည်လည်း ကိုယ်စီကိုယ်ငှ မနည်းမနောရှိနေခဲ့ကြပြီ။ အဆိုပါ ဒဏ်ရာဒဏ်ချက် နာကြည်းချက်တို့ကို နောင်လာမည့်မျိုးဆက်သစ်အား မည်သူကမျှ လက်ဆင့်မကမ်းလိုကြတော့ပါ။ ထို့အတွက် အားလုံးဝိုင်းဝန်းကြိုးစား အကောင်အထည်ဖော်နေကြပါပြီ။ထိုသို့ ဝိုင်းဝန်းကြိုးစားအကောင်အထည်ဖော်နေကြခြင်း၏ ရလဒ်မှာကား ယခု သဘောတူလက်မှတ်ရေးထိုးနိုင်ခဲ့ပြီဖြစ်သည့် ပြည်ထောင်စုသဘောတူစာချုပ် အစိတ်အပိုင်း (၁) ပင်ဖြစ်လေတော့၏။ သို့ရာတွင် ဆက်လက်လျှောက်လှမ်းရမည့် ငြိမ်းချမ်းရေးခရီးကားရှိနေသေးသည်။ မူလ စတင်လျှောက်လှမ်းခဲ့စဉ်ကထက်တော့ ပို၍ ပို၍ နီးလာနေပါပြီ။ထို့ကြောင့် နိုင်ငံတော်၏ အတိုင်ပင်ခံပုဂ္ဂိုလ်၏ စကားအတိုင်းပင် ပြည်သူ အားလုံး အတူလက်တွဲ၍ ”ငြိမ်းချမ်းရေးခရီးလမ်းမှာ ရှေ့ကိုမျှော်၊ အနာဂတ်ကို အာရုံပြုလို့ သွက်သွက်လက်လက် ဆက်လက်လျှောက်လှမ်းကြဖို့” တိုက်တွန်းအပ်ပါသတည်း။ မြန်မာနိုင်ငံကြီး အမြန်ဆုံး ငြိမ်းချမ်းပါစေသောဝ်။

အယ်ဒီတာ

Comments (0)

Leave a reply

Your email address will not be published. Required fields are marked *

*