၁၃ ဂဏန်း

၁၃ ဂဏန်း
February 17, 2017 Asian Fame

4:49 pm
၁၃ ဂဏန်း

13၁၃ ဂဏန်းကို ရှောင်ရှားပါက အဆင်မပြေမှု၊ ကံဆိုးမိုးမှောင် ကျမှုတို့ကို ကျော်လွှား နိုင်ပါသလား။ ဤမေးခွန်း အတွက် အဖြေက အမျိုးမျိုး ဖြစ်နိုင်သည်။

ဇန်နဝါရီလ လယ်ပိုင်းက ရန်ကုန်မြို့ ဘတ်စ်ကားလမ်းကြောင်း သစ်ကို အပြောင်းအလဲ ပြုလုပ်ရာတွင် ယာဉ်လိုင်းပေါင်း ၇ဝ ဝန်းကျင် ဖြင့် အစပြုခဲ့သည်။ YBS ယာဉ်လိုင်းများတွင် အမှတ် ၁၃လိုင်း ထည့် သွင်းထားခြင်း မရှိပေ။

ဘတ်စ်ကား လမ်းကြောင်းသစ် အာဏာပိုင်တို့က ရေရှည်ကို ကြည့် ပြီး ထိုနံပါတ်ကို ချန်ထားခဲ့ခြင်း ဖြစ်မည်ဟု မွန်ပြည်နယ် ကျိုက်ထိုမြို့ မှ ကုန်သည် တစ်ဦးဖြစ်သည့် ကိုနေဝင်း အောင်က ယူဆသည်။

”နိုင်ငံခြားသားတွေ လာတော့ ဘတ်စ်ကားစီး မယ်၊ ဒါတွေကြောင့် မထည့်တာဖြစ်မယ်” ဟု ကိုနေဝင်းအောင် ကပြောသည်။ သူကိုယ်တိုင် ကမူ ၁၃ ဂဏန်းနှင့် ပတ်သက်ပြီး မည်သည့် ခံစားချက်မျှ မရှိဟု ဆိုသည်။

ရန်ကုန်မှ လူငယ်တစ်ဦး ဖြစ်သည့် ကိုရဲရင့် အောင်က ထိုဂဏန်းကို အကျိုးရှိရှိ အသုံးချသူဖြစ်သည်။ ”ထီထိုးရင်တောင် ၁၃နဲ့ စတာ ထိုးမိ တယ်။ သူများတွေထင် နေကြတဲ့ မကောင်းတဲ့ နံပါတ်ပေါ့။ ကျွန်တော်က အဲဒီနံပါတ် နဲ့ဆိုကံကောင်းတယ်။ ဘယ်လောက် ရူးလဲဆိုရင် အလုပ် သွားလျှောက်ရင်တောင် အဲဒီနေ့ သွားတယ်။ အလုပ်တန်း ရတယ်” ဟု ကိုရဲရင့်အောင်က ပြော သည်။

နံပါတ် ၁၃ နှင့် သဟဇာတ မဖြစ်သူများထဲတွင် ရန်ကုန်မှ တက္ကသိုလ်ကျောင်းသား ကိုဇော်ဝင်း မောင် ပါဝင်သည်။ ”ကျွန်တော်တော့ ရှောင်တယ်။ သတိထား မိတာကတော့ အဆိုးတွေဖြစ်လို့။ ကျွန်တော်ယာဉ်တိုက် မှုတွေ၊ ပြသာနာတွေဆို ၁၃ ရက်လိုနေ့မျိုး မှာဖြစ်တာများတယ်” ဟု ကိုဇော်ဝင်းမောင် ကဆိုသည်။ ”စာတွေမှာက ၁၃ က ကံဆိုးတယ်၊ နိမိတ် မကောင်းဘူးလို့ ဖတ်ဖူးတယ်။ အနောက်နိုင်ငံ တော်တော်များများ ၁၃ နံပါတ်ကို မသုံးကြဘူးလေ။ အဲဒါကြောင့် တို့အစိုးရလည်း မသုံးတာ ဖြစ်မယ်”

ဧရာဝတီ သတင်းဌာနမှ အယ်ဒီတာ တစ်ဦးဖြစ်သည့် ကိုနိုင်စွမ်းက ကံကောင်းခြင်း၊ ကံဆိုးခြင်း ဆိုသည်မှာ ဂဏန်းကြောင့် မဟုတ်ဘဲ စိတ်၏ စေ့ဆော်ချက်နှင့် သက်ဆိုင်မည်ဟု ယူဆသူ ဖြစ်သည်။

”၁၃ ဂဏန်းက ကံဆိုး မှောင်ကျစေတယ် ဆိုတဲ့ ယုံကြည်မှုမျိုး ကျွန်တော့်ဆီမှာ လုံးဝ၊ လုံးဝကို မရှိဘူး။ ဂဏန်းတွေက ပညာရှင်တွေ ဖန်တီးထားတာပါ၊ တကယ်လို့ ကံဆိုးစေမယ်.. ဆိုရင်တော့ အရင် ကတည်းက အဲဒီ ဂဏန်းကို သူတို့ မတီထွင်ခဲ့လောက်ဘူး၊ ကံကောင်း စေတဲ့ ဂဏန်းတွေပဲ များများ ဖန်တီးကြလိမ့်မယ် ထင်တယ်” ဟု ကိုနိုင် စွမ်းက ပြောသည်။

အနောက်တိုင်းသား အများအပြားက ၁၃ ဂဏန်းကို လာဘ်မ ကောင်းသော၊ ကံဆိုးစေသော နံပါတ်ဖြစ်သည် ဟု ယူဆကြ သည်။ နိုင်ငံတကာ တွင် လေ ကြောင်းလိုင်း အများအပြားက ခရီး သည်တို့ စိတ်သက်သာရာ ရစေရန် အ တွက် ထိုင်ခုံနံပါတ် များတွင် ဂဏန်း ၁၃ ကို ထည့်သွင်းထားခြင်း မရှိသကဲ့သို့ အထပ်မြင့် အဆောက်အအုံ အများ အ ပြားရှိ ဓာတ်လှေကား တွင်လည်း နံပါတ် ၁၂ ပြီးလျှင် ၁၄ ကိုသာတွေ့နိုင်သည်။

ကမ္ဘာကျော် ဘောလုံးအသင်း တချို့တွင် ကျောနံပါတ် ၁၃ မထား ရှိသော်လည်း ဂျာမန်ဘောလုံး သမား ဘောလတ်သည် ကျော နံပါတ် ၁၃ ကို နှစ်သက်သူ ဖြစ်သည်။ ကိုရီးယားလူ မျိုး ပတ်ဂျီဆန်လည်း မန်ယူ အသင်းတွင် ကန် စဉ်က နံပါတ် ၁၃ ကို ကျောပေါ် တင်သူဖြစ် ကြောင်း တွေ့ရသည်။

ဗိုလ်ချုပ်အောင်ဆန်း၊ ဒါရိုက်တာ ဟစ်ခ်ျကော့၊ စစ်တုရင်ချန်ပီယံ ကက်စပါရော့၊ အဆိုတော် တေလာဆွစ်ဖ်တို့သည် ၁၃ ရက်နေ့တွင် ဖွားမြင် သူများဖြစ်သည်။

မည်သို့ပင် ဖြစ်စေကာမူ … ၁၃ ဂဏန်းမှာ နိုင်ငံတကာတွင် လူကြိုက် နည်းလှသည်။ ဗြိတိန်တွင် အိမ်နံပါတ် ၁၃ ဆိုလျှင် ရောင်း ထွက်လေ့ မရှိဟု ဇန်နဝါရီလ လယ်ပိုင်း BBC သတင်း တစ်ပုဒ်တွင် ဖော်ပြထားသည်။ နံပါတ် ၁၃ အိမ်များသည် တခြားအိမ် များထက် ပေါင်ကိုးထောင် (ကျပ် သိန်း ၁၅ဝ ဝန်းကျင်) ပိုသက်သာသည်ဟု ဆိုသည်။

သိဂီင်္ဝင်းတင် ( Myanmar Now )

Comments (0)

Leave a reply

Your email address will not be published. Required fields are marked *

*