ရေ အကုန်အကျ သက်သာစေတဲ့ အိမ်နောက်ဖေးက ဈေးဆိုင်

ရေ အကုန်အကျ သက်သာစေတဲ့ အိမ်နောက်ဖေးက ဈေးဆိုင်
February 3, 2017 Asian Fame

12:15 pm
ရေ အကုန်အကျ သက်သာစေတဲ့ အိမ်နောက်ဖေးက ဈေးဆိုင်
 မြင်းခြံ မြို့နယ်၊ ရွှေဘုံသာရွာမှာ ရေ အစက်ချ စိုက်ပျိုးနည်း စနစ်ကို အသုံးပြုပြီး ရေသန့်ဘူးစင်နဲ့ စိုက်ပျိုးနေတဲ့ ဒေသခံ တစ်ဦး


မြင်းခြံ မြို့နယ်၊ ရွှေဘုံသာရွာမှာ ရေ အစက်ချ စိုက်ပျိုးနည်း စနစ်ကို အသုံးပြုပြီး ရေသန့်ဘူးစင် နဲ့ စိုက်ပျိုးနေတဲ့ ဒေသခံ တစ်ဦး

မိုးနည်းရေရှား ရပ်ဝန်း မန္တလေးတိုင်း ဒေသကြီး၊ မြင်းခြံ မြို့နယ်က တောင်သူ တစ်ယောက်ဖြစ်တဲ့ ကိုမောင်နိုင်က သူ့ရွာမှာ စိုက်ပျိုးလို့ မရတဲ့ ဟင်းသီးဟင်းရွက် ဝယ်ယူ စားသုံးဖို့ အတွက်ဆိုရင် ဈေးရှိတဲ့ အိမ်နီးချင်း ရွာဘက်ကို သွားခဲ့ရပါတယ်။ ဒါမှမဟုတ် ဆိုင်ကယ်နဲ့ လှည့်လည် ရောင်း ချတဲ့ ဈေးသည် သူတို့ ရွှေဘုံသာ ရွာကို ရောက်လာချိန် အထိ စောင့်ခဲ့ရပါ တယ်။

အခုတော့ အဲဒီလိုလုပ်စရာ မလိုတော့ပါဘူး။ အကူအညီပေးရေး အဖွဲ့ တစ်ခုကနေ ရတဲ့ နည်းလမ်းကို သုံးပြီး ပေ ၁ဝဝ ပတ် လည်ဝန်းကျင် ရှိတဲ့ သူ့အိမ်ဝိုင်းထဲက ရေသန့်ဘူး အခြေ ပြု စိုက်ခင်းထဲမှာ ကန်စွန်းရွက်၊ ပူဒီနာ၊ ဆလတ်ရွက်၊ နံနံပင် အပါအဝင် ဟင်းရွက် မျိုးစုံကို စိုက်ထားပါပြီ။

”အိမ်နောက်ဖေးမှာ ဈေးဆိုင်တည်ပါ ဆိုတဲ့ စကားပုံ အတိုင်း ကျွန်တော်တို့ လုပ်လာနိုင်ပြီ” လို့ ကိုမောင်နိုင်က သူ့အပင်တွေ ကို ကြည့်ရင်း ပြောလိုက်ပါတယ်။

”ရောင်းတန်း ဟင်းသီးဟင်းရွက်တွေက ဓာတ်မြေ သြဇာတွေနဲ့ စိုက်ထားချင် ထားမှာပေါ့။ အခုလို ကျွန် တော်တို့ဘာသာ စိုက်ရတော့ ဘာ ဓာတ်မြေသြဇာမှ မပါ သလို လတ်လည်းလတ်ဆတ်တယ်”

ရေသန့်ဘူးစင်၊ ရေ အစက်ချ နည်းပညာ တို့ကို သုံးထားတဲ့ ဆလတ်ရွက် စိုက်ခင်း

ရေသန့်ဘူးစင်၊ ရေ အစက်ချ နည်းပညာ တို့ကို သုံးထားတဲ့ ဆလတ်ရွက် စိုက်ခင်း

ကိုမောင်နိုင်တို့ ကျေးရွာမှာ အသုံးပြုနေတဲ့ စနစ်က ရေစက်ချ စိုက်ပျိုးရေး နည်းစနစ်ပါ။ ဒါက ရေအနည်းငယ်သာ လိုအပ်တဲ့ မိုးခေါင် ရေရှားဒေသမှာ နေထိုင်တဲ့ သူတို့အတွက် အလွန် အဆင်ပြေနေ ပါပြီ။ ကိုယ့်အိမ် ဝန်းကျင်မှာ စိုက်ပျိုးတဲ့ ဟင်းသီးဟင်းရွက်ကိုပဲ စားသုံးတဲ့ အတွက် အိမ်ရဲ့ ကုန်ကျစရိတ် အင်မတန် သက်သာလာပါပြီ။ တစ်နိုင်တစ် ပိုင်လုပ်ကိုင်ရာ ကနေ စီးပွားဖြစ် လုပ်ကိုင်ဖို့ အတွက်ပဲ နည်းလမ်းတွေ လိုအပ် နေတာ ဖြစ်ပါတယ်။

ရေအစက်ချစိုက်နည်းစနစ်

ကိုမောင်နိုင် ခြံထဲက ရေစက်ချစိုက်နည်း အတွက် ဖင်ဖောက်ပြီး အတန်း လိုက်ဆက်ထားတဲ့ ရေသန့် ပုလင်းခွံတန်းကို စင်ထိုးပါတယ်။ ပုလင်းဘေး မှာ အပေါက်ဖောက် ထားတာကတော့ မြေဆွေး ထည့်ပြီး အပင်စိုက်နိုင်ဖို့ အတွက်ပါ။ မြေဆွေး၊ မီးကျွမ်း ရုံတင်လေးရှို့ထားတဲ့ စပါးခွံတို့ကို ရောစပ် အသုံးပြုတာကြောင့် ရေစိမ့်လွယ်ပါတယ်။ ပုလင်းတွေထဲ ရေဝပ် မနေစေ ဖို့လည်း စိုက်ခင်းစင်ကို တစ်ဖက်စောင်း ထားပါတယ်။ လူတစ်ရပ်ခန့် အ မြင့်ရှိတဲ့ စင်ပေါ်မှာတော့ ရေတိုင်ကီ အသေးလေး တွေ့ရပါတယ်။ တိုင် ကီနဲ့ စိုက်ခင်းစင်ကို ဆက်သွယ်ထားတဲ့ ပိုက်လိုင်း တစ်လျှောက် ဖောက် ထားတဲ့ အပေါက်တွေကနေ ရေစက်ကျတဲ့ အတွက် အပင်တွေ ရေရရှိပါ တယ်။ ပုလင်းခွံ အသီးသီးကနေ ရေပိုလျှံလို့ စိမ့်ထွက် ကျလာတာကို စိုက် ခင်းအောက်ခြေမှာ ပုံးခံပြီး ပြန်စုထားပါတယ်။ ဒီရေကိုပဲ စင်ပေါ်က တိုင်ကီထဲ ပြန်ဖြည့်ကြတာပါ။

မြင်းခြံ မြို့နယ်၊ သိန်ကုန်းရွာမှာ ရေအစက်ချ စိုက်ပျိုး နည်းစနစ် ကို အသုံးပြုပြီး ရေသန့်ဘူးစင် နဲ့ စိုက်ပျိုး နေတဲ့ ဒေသခံ တစ်ဦး

မြင်းခြံ မြို့နယ်၊ သိန်ကုန်းရွာမှာ ရေအစက်ချ စိုက်ပျိုး
နည်းစနစ် ကို အသုံးပြုပြီးရေသန့်ဘူး စင် နဲ့ စိုက်ပျိုး
နေတဲ့ ဒေသခံ တစ်ဦး

ဒီလို စိုက်ခင်းမျိုးကို၂ဝ၁၅ ခုနှစ်ကစပြီး မန္တလေးတိုင်းဒေသကြီး ထဲက မြင်းခြံ နဲ့တောင်သာနှစ် မြို့နယ်မှာ Terre des hommes Italia (TDH Italia) အဖွဲ့က မိတ် ဆက်ပေးခဲ့တာပါ။ ဒါဟာ ကုလသမဂ္ဂ က ကြီးကြပ်တဲ့ အသက်မွေး ဝမ်းကျောင်းမှုနှင့် စားနပ် ရိက္ခာ ဖူလုံရေး ရန်ပုံငွေရဲ့ အစီအစဉ် တစ်ခု ဖြစ်ပါတယ်။

ပုလင်းခွံ စိုက်ခင်း အပြင် မြေစိုက် စိုက်ခင်းတွေလည်း ဒီရွာမှာ ရှိပါ တယ်။ မြေစိုက်ခြံ ကတော့ မြေကိုဆွပြီး မီးကျွမ်းရုံ လုပ်ထားတဲ့ စပါးခွံနဲ့ ရောသမကာ သီးပင် စားပင်တွေ ကို အတန်းလိုက် စိုက်ပျိုးရပါတယ်။ ရေကို ပိုက်နဲ့ သွယ်တန်းကာ အပင်ရဲ့ အောက်ခြေကို တစ်စက်ချင်းစီ ချပေးတဲ့ နည်း နဲ့ စိုက်ရတာပါ။ အပင်ရဲ့ အာ ဟာရ အတွက် နိုက်ထရို ဖော်စကာကို တစ်ပတ် တစ်ကြိမ် အနည်းငယ် ထည့်ပေးရတယ်လို့ ဆိုပါတယ်။

အိမ်ခြေ ၉ဝ ကျော် ရှိတဲ့ ကိုမောင်နိုင်တို့ ရွှေဘုံသာရွာမှာ ရေသန့် ဘူးနဲ့ စိုက်တဲ့ ၁၂ စင်၊ မြေပေါ်မှာ တိုက်ရိုက် စိုက်ပျိုးတာ၂၂ ခြံ ရှိပါတယ်။ ရွာမှာနေကြတဲ့ သူအချို့ဟာ ပဲစိုက်ခင်း အနည်းငယ်သာ ပိုင်ဆိုင်ကြပြီး တချို့ကတော့ ယာစိုက် ရာသီမှာ အငှားလုပ်သား လုပ်လိုက်၊ ကျန်တဲ့ အချိန် မှာ ရွာကနေ ၃ မိုင်လောက် ဝေးတဲ့နေရာကို သွားပြီး ထင်းခုတ်၊ မီးသွေး ဖုတ် ရောင်းကြတဲ့အလုပ်တွေ လုပ်ကိုင်ကြတဲ့သူတွေပါ။

တောင်သာမြို့နယ် ထဲက အိမ်ခြေ ၂ဝဝ ဝန်းကျင်ရှိတဲ့ ကန်ကြီးကျေးရွာ မှာ ရေသန့်ဘူးသုံး စိုက်ခင်း ၁၁ ခု၊ မြေစိုက်ခြံ ၉ ခု ရှိပါတယ်။ ရေသန့်ဘူး စင်တွေမှာ အရွက်စား အပင်၊ မြေစိုက်ခြံတွေမှာ အသီးစားအပင် စိုက်ပျိုး ဖို့ TDH အဖွဲ့က အကြံပေးကြောင်း ဒေသခံ ကိုမြင့်ဇော်က ပြောပါတယ်။

”ရေသန့်ဘူးစင်နဲ့ စိုက်တာကတော့ကိုက်လန်၊ မုန်ညင်း၊ ကန်စွန်း စတဲ့ အရွက် ကိုပဲစားရတယ်။ မြေစိုက်ခြံ ကျတော့ ခရမ်း၊ ရုံးပတီ တို့လို အသီးကို စားရတယ်။ အရင်တုန်းက သူများတွေ ရွာထဲကို လာရောင်းမှ စားရတာကို အခုတော့ ကိုယ့်ဘာသာ အလွယ်တကူ ခူးစားလို့ရတာက တော့ အကျိုးကျေးဇူး တစ်ခုလို့ ကျွန်တော် ထင်တယ်”လို့ သူက ဆိုပါတယ်။

မြေစိုက်ခြံတွေထဲမှာ သမားရိုးကျ ရေဖျန်း စိုက်ပျိုးမယ် ဆိုရင် အကျယ် ၁ဝ ပေ၊ အနံ ၆ ပေဝန်း ကျင်ရှိတဲ့ စိုက်ခင်း ကို တစ်နေ့မှာ ရေတစ်ပီပါ ကုန်မယ်၊ ရေအစက်ချ စိုက်ပျိုးနည်းနဲ့ ဆိုရင် ပီပါဝက် သက်သာတယ်လို့ ကိုမြင့်ဇော်က ဆိုပါတယ်။

မိုးခေါင်ရေရှား ဒေသဖြစ်တာကြောင့် မိသားစု အတွက်၊ လုပ်ငန်းသုံး တိရိစ္ဆာန်များ အတွက်၊ စိုက်ခင်း အတွက် လိုအပ်တဲ့ ရေရရှိရေး က ခက်ခဲတဲ့ အလုပ် တစ်ခု ဖြစ်ပါတယ်။

မိုးခေါင်ရေရှား ဒေသ ဖြစ်တာကြောင့် မိသားစု
အတွက်၊ လုပ်ငန်းသုံး တိရိစ္ဆာန်များ အတွက်၊
စိုက်ခင်း အတွက် လိုအပ်တဲ့ ရေရရှိရေး က ခက်ခဲတဲ့ အလုပ် တစ်ခု ဖြစ်ပါတယ်။

နည်းပါးနေတဲ့ ရေအား၊ လူအား

မြင်းခြံ မြို့နယ်၊ သိမ်းကုန်းကျေးရွာ မှာနေတဲ့ ကိုသိန်းတန် က ရေသန့် ဘူးစင်ထိုး စိုက်ခြံငယ် တစ်ခုဟာ အိမ်စားဖို့ လုံလောက်တဲ့ အပြင် ပိုလျှံတဲ့အ တွက် ပြန်ရောင်းချမယ် ဆိုရင် တစ်နေ့ကို ဝင်ငွေ ကျပ် ၅ဝဝ လောက်တော့ ရှိတယ်လို့ ပြောပါတယ်။ မြေစိုက်ခြံ ရဲ့ဝင်ငွေကလည်း အသီးသီးချိန်မှာ အထက်ပါ ပမာဏ ထက် မနည်းပါဘူး။

မြေစိုက် စိုက်ခင်း တစ်ခုကို အရင်းအနှီး ကျပ် တစ်သိန်းကျော်၊ ရေသန့်ဘူး စိုက်စင် တစ်ခုကို တစ်သိန်း နီးပါး ကုန်ကျတာကြောင့် ဒီငွေ ပမာဏဟာ ဒေသခံ အများ အပြား အတွက် ရင်းနှီးမြှုပ်နှံဖို့ အဟန့်အတား ဖြစ်စေတယ်လို့ ကိုသိန်းတန် က ဆက်ပြောပြပါတယ်။

မြေယာနည်းတဲ့ တောင်သူတွေ၊ မြေယာမဲ့ တောင်သူတွေကို အဓိက ဦးတည်ပြီး အိမ်တွင်းစားသုံးဖို့ အာဟာရပြည့်ဝတဲ့ စားပင်၊ သီးပင်တွေကို စိုက်ပျိုးရေ အသုံးပြုမှု သက်သာစေတဲ့ ရေအစက်ချ စိုက်ပျိုး နည်းပညာကို မြင်းခြံ၊ တောင်သာ မြို့နယ် တို့မှာကျေးရွာ ၂၂ ခုမှာ TDH ရဲ့ စီမံကိန်း ရောက်နေပါပြီ။

၂ဝ၁၅ အောက်တိုဘာမှာ TDH ဝန်ထမ်းတွေရဲ့ ကောက်ယူခဲ့တဲ့ စစ် တမ်းအရ လုပ်ငန်း လုပ်ဆောင်နေတဲ့ နှစ်မြို့နယ်မှာ ဟင်းသီးဟင်းရွက် စား သုံးမှု ၂၃ ရာခိုင်နှုန်း တိုးတက် လာကြောင်း သိရပါတယ်။ စုစုပေါင်း အိမ် ထောင်စု ၉၃၄ ခုဟာ မြေမဲ့ စိုက်ပျိုးနည်း၊ အိမ်ထောင်စု ၅ဝ၄ ခုက ရေအစက်ချ စိုက်နည်းကို စတင် ဆောင်ရွက်နိုင် ခဲ့တယ်လို့ LIFT အဖွဲ့ရဲ့ ၂ဝ၁၅ ခုနှစ် နှစ်ပတ်လည် အစီ ရင်ခံစာမှာ ဖော်ပြထားပါတယ်။

နွေရာသီမှာ လတ်ဆတ်တဲ့ ဟင်းသီးဟင်းရွက် ၄၊ ၅ မျိုးကို နေ့စဉ် စားသုံးရပြီး အသက် ၅ နှစ်အောက် ကလေး ငယ်တွေဟာ လတ်ဆတ်တဲ့ ဟင်းသီး ဟင်းရွက်တွေကို နွေရာသီ အပါအဝင် တစ်လကို ၁ဝ ကြိမ်မှ အကြိမ် ၃ဝ အထိ စားသုံးရတယ်၊ အိမ်ထောင်စု တစ်စုက လစဉ်ထုတ် လုပ်လိုက်တဲ့ ဟင်းသီးဟင်းရွက်ရဲ့ ပျမ်းမျှ တန်ဖိုးဟာ ကျပ်၂ဝဝဝ ကနေ ၁၄ဝဝဝ အထိ ရှိတယ်လို့ ၄င်းအစီရင် ခံစာမှာ ဖော်ပြထားပါတယ်။

စီးပွားဖြစ်စိုက်ခင်း အဖြစ် အကောင်အထည် ဖော်ဖို့ရာမှာတော့ ရေရ ရှိမှု အခြေအနေ က အဓိက စိန်ခေါ်မှုကြီး အဖြစ် ရှိနေဆဲ ဖြစ်နေပြန်ပါတယ်။

မိုးရေကနေ စုဆောင်းထားတဲ့ သောက်သုံးရေကန် ဟာ မိုးများတဲ့ နှစ်ဆိုရင် တစ်နှစ်ပတ်လုံး သုံးစွဲဖို့ လောက်ငနိုင်တယ် ဆိုပေမယ့် ခုလို အစက်ချ စိုက်ခင်းတွေကို တစ်ရွာလုံး အိမ်တိုင်း စိုက်ပျိုးမယ်ဆိုရင် ရေပြတ် လပ်မှုကို မလွဲမသွေ တွေ့လာမယ်လို့ ကိုမောင်နိုင်က ယူဆပါတယ်။

TDH အဖွဲ့ မန္တလေးတိုင်း ဒေသကြီး တာဝန်ခံ ဒေါ်ခင်မာဦးက မိုး ခေါင်ရေရှားဒေသ စိမ်းလန်းစိုပြည်ရေး အတွက် ယခင် ကတည်းက ပြည် တွင်းပြည်ပ အဖွဲ့အစည်း အသီးသီးဟာ လာရောက် လုပ်ကိုင်ကြပေမယ့် တချို့ဒေသတွေ မှာ တစ်ဖွဲ့နဲ့ တစ်ဖွဲ့ ချိတ်ဆက်မှု အားနည်းတာကို လေ့လာ တွေ့ရှိရတယ် လို့ သုံးသပ်ပါတယ်။

ရွာကနေ တစ်မိုင်ကျော်၊ နှစ်မိုင်ဝေးတဲ့ ရေကန်တွေ ဆီကို နွားလှည်းနဲ့ သွားကြ ပြီး သောက်ရေ သုံးရေ ခပ်ယူကြပါတယ်

ရွာကနေ တစ်မိုင်ကျော် ၊နှစ်မိုင်ဝေး တဲ့ ရေကန်တွေ ဆီကို နွားလှည်းနဲ့ သွားကြ ပြီး သောက်ရေ သုံးရေ ခပ်ယူကြပါတယ်။

စီမံကိန်းတစ်ခု အကောင်အထည်ဖော်နေတဲ့ ကာလမှာ ဒေသခံတွေ အကျိုး ခံစားရပေမယ့် အဲ့ဒီ စီမံကိန်း ပြီးဆုံးသွားတဲ့ နောက်မှာ ထပ်မံ ပံ့ပိုး ကူညီမှုတွေ အဆက်ပြတ် သွားတတ်တဲ့ အတွက် ဒေသခံတွေမှာ ယခင်က အခြေအနေကို ပြန်ရောက်သွားတာ ကို တွေ့ရတယ်လို့ သူကပြောပြပါ တယ်။

”အစိုးရ တစ်ခုတည်းရဲ့ တာဝန်ရှိတာ မဟုတ်ဘူး။ လူတိုင်းမှာ တာဝန် ရှိတယ်။ အစိုးရ၊ INGO၊ NGO အားလုံးက ချိတ်ဆက်မှု အားကောင်းဖို့ လိုမယ်။ နောက်ပြီး …

တွေ့ဆုံ ဆွေးနွေးမှုတွေ လိုတယ်။ အဲဒီလို တွေ့ဆုံဆွေးနွေးနေမယ် ဆိုရင် ဘယ်သူက ဘာလုပ်နေ တယ်ကို တစ်ပြိုင်တည်း သိမယ်။ ဒါမျိုးတွေ မဖြစ်အောင် ရေရှည် စီမံချက်တွေ လိုတယ်။ အကုန် လုံး ချိတ်ဆက်ပြီး မလုပ်ရင် ဘယ်လောက်ပဲ နှစ်တွေကြာ ကြာ နဂိုအတိုင်း ပြန်ဖြစ်သွား တာပေါ့။ အကုန်လုံး ချိတ်ဆက်ပြီး ပြောင်း လဲအောင် လုပ်ဖို့လိုတယ်လို့ ကျွန်မ မြင်တယ်”လို့ ဒေါ်ခင်မာဦး က သုံးသပ်ပါတယ်။

TDH အဖွဲ့က ကမကထပြု ထားပေးတဲ့ နမူနာ စိုက်ခင်းတွေ ဟာ မိသားစု ထမင်းဝိုင်း အတွက်ပဲ ဖြစ်တယ်။ ဒီစိုက်ခင်းတွေ ကို ကြည့်ပြီး စိတ်အား ထက်ထက်သန် သန်လုပ်ကိုင်မယ့် သူတွေ ပေါ်လာ မယ်လို့ ဒေါ်ခင်မာဦး က မျှော်လင့် ပါတယ်။

”ကျွန်မတို့ စီမံချက်ရှိတဲ့ တောင်သာမြို့နယ်က အေးရွာ ဆိုတဲ့ရွာက ဒေသခံတစ်ဦးက ခြံ ၅ ခြံလောက်ကို တိုးချဲ့ပြီးဈေး ကွက်အထိ ထိုးဖောက်နိုင်သေး တယ်။ သူတို့ ဆက်လုပ်ဖို့ ဆိုတာ သူတို့ရဲ့ စိတ်ဝင်စားမှု ပေါ်လည်း မူတည်တယ်”လို့ ဒေါ်ခင်မာဦးက ပြောပါတယ်။

သင့်လျော်တဲ့ စိုက်ပျိုးရေ ရရှိဖို့ အခက်အခဲ ဖြစ်နေတာကို လည်း သူတို့အဖွဲ့က သဘောပေါက် တယ်လို့ ဆိုပါတယ်။

”ဒီဒေသတော်တော် များများ က ရေကို အချဉ်နဲ့ အငန်ဓာတ် တိုင်းကြည့်လိုက်ရင် လိုအပ်တာ ထက် တော်တော်များနေတာကို တွေ့ရတယ်။ ရေကောင်းမှ ဒီလို စိုက်ခင်းတွေက စိုက်လို့ရမှာ” လို့ ဒေါ်ခင်မာဦးက ရှင်းပြပါတယ်။

နောက်ထပ် အခက်အခဲ တစ်ခု ကတော့ အလုပ်လုပ်မယ့် လူငယ်အင်အားစု ရှားပါးလာမှုပါ။ မြို့ပြကို၊ သို့မဟုတ် နိုင်ငံခြားကို ရွှေ့ပြောင်း သွားရောက် လုပ်ကိုင် သူတွေ များလာပါပြီ။

မြင်းခြံဒေသခံ ကိုမောင်နိုင် ကတော့ သူတို့ရွှေဘုံသာရွာ မှာ လူဦးရေ ၉ဝဝ ကျော်လောက်ရှိ ရာကနေ လူငယ် ၃ဝဝ နီးပါးဟာ မြို့ပြကို သွားကုန်ပြီလို့ ခန့်မှန်း ပါတယ်။ သွားကြတဲ့ထဲမှာ သူ့ရဲ့ သားသမီး သုံးယောက် စလုံးလည်း ပါဝင်နေတာပါ။

မိသားစု ထမင်းဝိုင်း အတွက်ပဲ စိုက်ပျိုးတဲ့ အနေအထားကနေ စီးပွားဖြစ် စိုက်ပျိုးကြမယ်၊ ရေ ကောင်းရေသန့် ရရှိမယ်ဆိုရင် ဒေသခံတွေ အကျိုးများလာမှာ ဖြစ်တယ်လို့ သူက ဆိုပါတယ်။

”အဓိက က စီးပွားဖြစ်စိုက် ပျိုးရေး လုပ်ကိုင်နိုင်တဲ့အထိ ရေ ကောင်းရေသန့် ကိုရအောင် ပံ့ပိုး ကူညီပေးဖို့ပဲ။ တကယ်သာ စီးပွား ဖြစ်စေလောက်တဲ့ စိုက်ပျိုးရေး ကဏ္ဍဖြစ်လာရင် ထွက်သွားသူတွေ ကိုယ့်မိသားစု နဲ့အတူတူ နေရင်း ဒီစိုက်ပျိုးရေးကို လာပြန်လုပ် ကြမှာပဲ”လို့ ကိုမောင်နိုင်ကဆိုပါ တယ်။

(ဓာတ်ပုံများ – ထက်ခေါင်လင်း/ Myanmar Now)

Comments (0)

Leave a reply

Your email address will not be published. Required fields are marked *

*