အောက်တိုဘာ (၆)ရက်နေ့က ဗီယက်နမ်နိုင်ငံ ဟနွိုင်းမြို့မှာ ကျင်းပခဲ့တဲ့ စာအုပ်ဈေးပွဲတော် မြင်ကွင်းကတော့ ဘာသာပြန်တွေ အများကြီးထုတ်ဝေထားတာ တွေ့ရပါတယ်။ ဖွင့်ပွဲပြီးချိန်မှာ ရောက်လာတဲ့ မူကြိုကလေးငယ်တွေဟာ တစ် ယောက်အင်္ကျီ တစ်ယောက် နောက်ကဆွဲလို့ မီးရထားတွဲများလို အတန်းလိုက် စာအုပ်ဆိုင်တွေ လိုက်ကြည့်ကြပါတယ်။ ပျော်ရွှင်စွာ လှည့်ပတ်ပြီးကြရင် စင် မြင့်ပေါ် ဓာတ်ပုံအမှတ်တရ ရိုက်ကြနဲ့ အရာရာကို စိတ်အားထက်သန်နေကြပုံပါပဲ။ ဒါကို ဆန့်တွေးလိုက်ရင် အနာဂတ် ဗီယက်နမ်ဟာ စာပေမြတ်နိုးပြီး တက်ြ<ွကတဲ့ လူငယ်တွေနဲ့ နောက်ထပ်သမိုင်းသစ်ကို ပုံစံသစ်တွေနဲ့ ရေးဖွဲ့ကြလိမ့်မယ်ဆိုတာ သိသာပါတယ်။
ပုံစံသစ်တစ်ခုကို တဖြည်းဖြည်းပြောင်းနေတဲ့ ပုံနှိပ်မီဒီယာလောကထဲမှာ ကျင်လည်နေရတဲ့ ထုတ်ဝေသူတွေအတွက် ဒီကာလကို ဂရုမပြု လျစ်လျူရှုနေ ကြရင် နည်းပညာရဲ့ ဒဏ်ခတ်ခြင်းခံရမယ့်အခြေအနေပါ။ တချို့လည်း ပူပင်စွာနဲ့ အနာဂတ်အစီ မံတွေလုပ်ရင်း အမြန်ဆုံးကုစားနိုင်မယ့်အဖြေတွေကို ရှာကြံနေ ကြပြီဖြစ်ပါ တယ်။ ဟနွိုင်းစာအုပ်ပွဲသွားခဲ့တဲ့ မြန်မာနိုင်ငံ စာအုပ်ထုတ်ဝေ၊ ဖြန့်ချိသူများအသင်း မှ ဗဟိုလုပ်အမှုဆောင်များနဲ့ စကားပြောကြည့်ရာမှာ သူတို့ရဲ့ အတွေး၊ အသံ အချို့ကို တင်ပြလိုက်ပါတယ်။

ဒေါက်တာသာထွန်းဦး (Today Group)

အခုဟာ ဟနွိုင်းမှာပွဲလုပ်တယ်ဆိုတာက ရည်ရွယ်ချက် ၂ ခုရှိတယ်။ တစ်ခုကLearning Society များအောင်လုပ်ရမယ်။ အဲဒီအတွက် စာဖတ်များအောင် အစိုးရက အပြည့်အဝထောက်ပံ့မယ်။ မြို့တော်ဝန်ကအစ ဧည့်သည်တွေ ဧည့်ခံတယ်၊ မိန့်ခွန်းတက်ပြောပေးတယ်။ နည်းမျိုးစုံနဲ့ လုပ်ပေးတယ်။ နံပါတ် (၂)က ဘာလဲဆိုတော့ ကျွန်တော်တို့ ASEAN ထဲမှာ အင်ဒိုနီးရှားနိုင်ငံက ဖရန့်ဖတ်စာအုပ်ဈေးပွဲတော်မှာသွားပြီး Promotion လုပ်ထားတဲ့အတွက် ဗီယက်နမ်ကလည်း ဖရန့်ဖတ် (Frankfurt Book Fair) တာဝန်ခံတွေကို နည်းမျိုးစုံနဲ့ သူတို့ အခွင့်အရေးရဖို့အတွက် Promote လုပ်တယ်။ ကြားရတဲ့ သတင်းအရ သူတို့အရမ်းကြိုးစားရင်တောင်မှ ၂ဝ၂၄ လောက် မှ အကောင်အထည် ဖော်ဖြစ်နိုင်မယ်။ ဒါပေမယ့် ၂ဝ၂၄ မှ ဖြစ်မယ့်ကိစ္စ အခုကတည်းက သူတို့က စနစ်တကျ ကြိုတင်ပြင် ဆင်ပြီးတော့လုပ်နေတာ တွေ့ရတယ်။ ကျွန်တော်တို့ တိုင်းပြည်မှာကျတော့ ဘာလုပ်လုပ်ဘာကြောင့်လုပ်လဲဆိုတာမျိုးကို မသဲကွဲဘူး။ အဲဒါအရေးကြီးဆုံးပဲ…။

ကျွန်တော့်အနေနဲ့ ပြောရရင်တော့ မြန်မာနိုင်ငံက ပြန်ကြားရေးဝန်ကြီးဌာနတို့၊ နိုင်ငံတော်အဆင့်ရှိတဲ့လူတွေ ကိုယ်ဘာလုပ်ချင်လဲဆိုတာ သိဖို့လိုမယ်။ အဲဒီအပေါ်မှာမှ စဉ်းစား ဖို့လိုမယ်။ အခုဟာက သူများလုပ်လို့လိုက်လုပ်တာမျိုးနဲ့ လုပ်လိုက်ပြီးရင် ပျက်သွားလိုက်၊ ဘာမှန်းမသိလိုက် ဖြစ်နေတဲ့ အခြေအနေမျိုးဆိုတော့ ကျွန်တော်တို့နိုင်ငံက အဓိကလေ့လာသင့်တဲ့နိုင်ငံကတော့ Vietnam ပဲ။ သူတို့ စာအုပ်ဈေးတွေက Book Market တွေကလည်း တကယ်ကို ခေတ်မီနေပြီ။ စာအုပ် Printing Quality ဖြစ်နေပြီ။ အနည်းဆုံးနှစ်ဆလောက် ကျွန်တော်တို့ထက်ဈေးကြီးတယ်။ ဒါပေမယ့် သူတို့ နိုင်ငံက ဝယ်နိုင်သေးတယ်။ လူလတ်တန်းစား တဖြည်းဖြည်းများလာတယ်ဆိုတဲ့ သဘောပဲ။ ကျွန်တော်တို့ဆီမှာ စာအုပ်ဈေးကအပေါဆုံးပဲ။ အဲဒီလို စာအုပ် ဈေးပေါတဲ့အတွက် ရေရှည်မှာ ထုတ်ဝေသူလည်း ရပ်တည်နိုင်မှာမဟုတ်ဘူး။ စာအုပ်ဆိုင်တွေလည်း ရပ်တည်နိုင်မှာမဟုတ်ဘူးဆိုတော့ စာအုပ်ဈေးကြီးခြင်း၊ ပေါခြင်းက လူတွေရဲ့ပညာရေးကိုဆိုလိုတာ မဟုတ်ဘူး။ ထိုက်သင့်တဲ့ တန်ဖိုးတစ်ခုရှိမှ လူတွေက လေးစားမယ်ဆိုတာ ထုတ်ဝေသူတွေ သေချာလည်း နားလည်ဖို့ လိုတယ်။ ဒု မြို့တော်ဝန်နဲ့ သွားတွေ့တဲ့အခါမှာ ASEAN နိုင်ငံက စာအုပ်ထုတ်ဝေသူ ဥက္ကဋ္ဌတွေအားလုံးပါကြတယ်။ အဲဒီမှာ ဒီ Vietnam ထုတ်လုပ်သူများအသင်းရဲ့ ဥက္ကဋ္ဌကို ပြန်ကြားရေးဝန်ကြီးရဲ့ ဒုဝန်ကြီးနေရာပေးထားတာ။ Indonesia မှာဆိုလည်း တစ်နှစ်ကို ဒေါ်လာသန်း ၄ဝ နဲ့ ၆ဝ ကြားအထိ အစိုးရက ပိုက်ဆံပေးထားတာ။ ပြီးတော့ ဖိလစ်ပိုင်တို့ဆိုလည်း တကယ့်နိုင်ငံတကာ အစိုးရအသိ အမှတ်ပြုအဖွဲ့အစည်းတွေ ဖြစ်ပြီးတော့ သူတို့တွေ အားလုံးက ကိုယ့်တိုင်းပြည်မြှင့်တင်ဖို့အတွက်ငွေတွေ ရှိတယ်။ နောက်တစ်ခုက ကျွန်တော်ကြားလိုက်ရတာတစ်ခုက မလေးရှားကလုပ်မယ့်စာအုပ်ဈေးပွဲတော်အတွက် ဟနွိုင်းမြို့တော်ဝန်ကိုသူကဖိတ်တယ်။ Sister City လိုမျိုး ဖိတ်ဖို့လုပ်တယ်။ အဲဒီတော့ မလေးရှားက
လုပ်မယ့်ပွဲမှာ ဟနွိုင်းမြို့က စာအုပ်တွေလာရောက်ပြရမယ်။ အဲဒီလိုမျိုးပေါ့။ သူတို့အနေဲ့ ဒီကိုလာတဲ့ လူတိုင်းအားလုံးက Industry ကို ကိုယ်စားပြုရုံတင် မဟုတ်ဘဲ အစိုးရကို ကိုယ်စားပြုပြီးတော့ ပြောနိုင်တယ်ဆိုနိုင်တယ်။ အဲဒီတော့ အစိုးရကို ကိုယ်စားပြုတဲ့အတွက် တိုင်းပြည်အတွက် အကျိုးရှိမယ့်အရာတွေကို ရဲရဲတင်းတင်း ပြောဆိုနေတာ တွေ့ရပါတယ်။

ဦးမျိုးအောင် (ပြည့်စုံစာပေတိုက်)

ဗီယက်နမ်လို နိုင်ငံမျိုးက ကျွန်တော်တို့ထက် မူပိုင်ခွင့်ဝယ်ပြီးတော့ ဗီယက်နမ်ဘာသနဲ့ ထုတ်နိုင်တယ်။ အဲဒီထုတ် လိုက်တဲ့ စာအုပ်တိုင်းရဲ့ ရောင်းဈေးက သူ့နိုင်ငံသားတတ်နိုင် တဲ့တန်ဖိုးဖြစ်နေတာ တွေ့ရတယ်။ Oxford Advance လို အဘိဓာန်မျိုးကို ၂၂ ဒေါ်လာကျတယ်။ မြန်မာလူမျိုးတွေ ဝယ်ဖို့စဉ်းစားနေချိန်မှာ ဗီယက်နမ်လူမျိုးတွေက ဒါကို ထိုက်ထိုက်တန်တန်ဆိုတဲ့ဟာမျိုးနဲ့ ပေးဝယ်နေတာတွေ့ရတယ်။ တစ်ကမ္ဘာလုံးမှာရှိတဲ့ စာအုပ်တွေတော်တော်များများကို သူတို့ တွေ ဘာသာပြန်နေနိုင်တဲ့အတွက် ကမ္ဘာ့စာပေကို သူတို့ ထိတွေ့နေမှုအားသည် ကျွန်တော်တို့ မြန်မာနိုင်ငံအားထက် များတယ်ဆိုတာကိုလည်း တွေ့ရတယ်။ သူတို့ရဲ့နိုင်ငံမှာ မြန် မာနိုင်ငံထက် ထုတ်ဝေသူတွေ နည်းလင့်ကစားသူ့အတိုင်းအတာနဲ့အတူ ဖွံ့ဖြိုးတယ်ဆိုတာကိုလည်း တွေ့ရတယ်။ သူတို့ ဟာ ကျွန်တော်တို့ မြန်မာနိုင်ငံက ထုတ်ဝေသူအများစုလို ကိုယ့် internal မှာပဲ မနေတော့ဘဲနဲ့ အပြင်ကိုထွက်ဖို့၊ အပြင် မှာမြှင့်တင်ဖို့၊ စာပေကနေပါ ကြိုးစားနေတာကိုလည်း တွေ့ရ တယ်။ ဒါဟာ ကျွန်တော်တို့လည်း နမူနာလိုက်ယူသင့်တဲ့လမ်း ပါ။ အခြေခံအားဖြင့် ကျွန်တော်တို့ပညာရေးစနစ်က ဒီ လောက်တော့ မညံ့ပါဘူး။ ဒီ့ထက်ပိုပြီး သေချာအောင် လုပ် ပေးမယ်ဆိုရင် ကျွန်တော်တို့ ပညာရေးစနစ်မှာ စာဖတ်စွမ်း အားက မနိမ့်လှဘူး။ တစ်ခုပဲရှိတယ် ကျွန်တော်တို့နိုင်ငံရဲ့ ဝင်ငွေတက်လာရင်တော့ ကျွန်တော်တို့ရဲ့ စာဖတ်စွမ်းအင် တက်လာဖို့က ငြင်းစရာအကြောင်းကို မရှိဘူး။

ဦးမြင့်ထွန်း (Quality Publishing House)
ပြည်တွင်းစာအုပ်ထုတ်ဝေသူများနဲ့ နိုင်ငံခြားထုတ်ဝေသူ ၂ဝ ခန့် ပူးပေါင်းပါဝင်ခဲ့တာ တွေ့ရပါတယ်။ ဝန်ကြီးအဆင့် တာဝန်ရှိသူများ လာရော်ဖွင့်လှစ်ခဲ့တာ တွေ့ရပါတယ်။ စာအုပ်ဆိုင်တွေအတွက် ကျယ်ဝန်းလွတ်လပ်တဲ့နေရာနဲ့ စိတ် ဝင်စားဖွယ် အခင်းအကျင်းတွေကို တွေ့ရတော့ ကျွန်တော်တို့ ဆီက ကျဉ်းကျဉ်းကျပ်ကျပ်လုပ်ရတဲ့ စာအုပ်ဈေးပွဲတော်တွေအတွက် စိတ်မကောင်းဖြစ်ရပါတယ်။ သံဖရိန်တွေ တပ်ထား တဲ့ အမိုးအကာတွေအောက်မှာ တစ်ဆိုင်ချင်း လှပသေသပ်စွာ ခင်းပြနိုင်ပါတယ်။ ဖွင့်ပွဲကို မုခ်ဦးရှေ့မှာမလုပ်ဘဲ စင်ပေါ်မှာပဲလုပ်တာ တွေ့ရပါတယ်။ စာအုပ်တွေနဲ့ သူတို့ နိုင်ငံမြေပုံကို အဝင်ဝမှာ ပြသထားပါတယ်။

ဒီကစာအုပ်တွေရဲ့ အဖုံးကို ဖောင်ြး<ွကတွေလုပ်ပြီးအမှိန်၊ အပြောင်တွေနဲ့ လောင်းထားပါတယ်။ အတွင်းစာသား စက္ကူအများစုဟာ ဒီမှာ ဂျပန်စက္ကူ လို့ခေါ်တဲ့ အဝါရောင်စက္ကူပါးကို သုံးစွဲတယ်။ ခန့်ချုပ်ကိုလည်း တစ်လက်မခွဲ ဆိုက်လောက် စာအုပ်တွေအထိ သပ်ရပ်စွာချုပ်နိုင်တာ တွေ့ရပါတယ်။ စာ အုပ် အပြင်အဆင်ပိုင်းမှာ မြန်မာနိုင်ငံထက် အနည်းငယ်သာပါတယ်။ နိုင်ငံခြားစာအုပ်တိုက်တွေနဲ့ ဘာသာပြန်သဘောတူညီချက်တွေရှိတဲ့အတွက် သူတို့စာပေနဲ့ ဘာသာပြန်စာအုပ် တွေ အချိန်နဲ့တစ်ပြေးညီထွက်တာလည်း တွေ့ရပါတယ်။ စာအုပ်ဈေးတွေကတော့ မြန်မာနိုင်ငံထက် မြင့်ပါတယ်။ တစ် ဦးချင်းဝင်ငွေ အများကြီးမကွာပါဘူး။ ထုတ်ဝေတဲ့ စာအုပ်အရေအတွက်လည်း ၂ဝဝဝ ဝန်းကျင်ပါပဲ။ စာအုပ်သပ်ရပ်ပုံနဲ့ ဈေးကတော့ သူတို့က သာပါတယ်။ ကျိန်းသေတာတစ်ခုက တော့ သူတို့ရဲ့ အစိုးရကိုယ်တိုင် အားပေးပါတယ်။ ထောက်ပံ့ ပါတယ်။ ဘယ်နိုင်ငံမှာပဲဖြစ်ဖြစ် စာအုပ်ပွဲတော်တစ်ခုရဲ့ ရည် ရွယ်ချက်နဲ့ အနှစ်သာရက လူတွေ စာကောင်းဖတ်ပြီး စိတ် ကောင်းရှိကြဖို့ပါပဲ။ ဒီနိုင်ငံနဲ့ ကွာတာကတော့ သက်ဆိုင်ရာ အသင်းအဖွဲ့တွေရဲ့ လိုအပ်သော တင်ပြချက်တွေအပေါ် တာ ဝန်ရှိသူတွေက အလေးထားဆောင်ရွက်ပေးပါတယ်။ စာဖတ် ရှိန်တိုးမြှင့်ဖို့ကတော့ ပညာရေးစနစ်ပြုပြင်ဖို့နဲ့ စာကြည့်တိုက် တွေ ထွန်းကားလာဖို့ပါ။ မိသားစုတိုင်းရဲ့အသိစိတ်ထဲ အိမ် တစ်အိမ် စာအုပ်စင်တစ်စင်၊ ကျောင်းတစ်ကျောင်း စာကြည့် တိုက်တစ်ခုဆိုတဲ့ ဆောင်ပုဒ်နဲ့ တစ်ပြည်လုံးအတိုင်းအတာ အကောင်အထည်ဖော်ကြဖို့ လိုပါတယ်။

ဦးနေမျိုးညွန့် (စာပေလောက)

ဒီနှစ်မှ ဒီ APBA အစည်းအဝေးစတက်ဖြစ်တော့ ပါဝင်ကြတဲ့ နိုင်ငံတွေက အဖွဲ့ဝင်တွေဟာ သက်ဆိုင်ရာနိုင်ငံတွေမှာ အောင်မြင်ပြီး လက်တွေ့လုပ်ကိုင်နေသူ တွေဖြစ်ပြီး ဒီအဖွဲ့မှာ တကယ်လည်း စိတ်ပါဝင်စားစွာအကျိုးရှိရာရှိကြောင်းကိုဆွေးနွေးကြတာကို တွေ့မိတယ်။ အဖွဲ့ဝင်နိုင်ငံတွေနဲ့ချိတ်ဆက်ပြီး လုပ်ဖို့ကိုလည်း စိတ်ဝင်စားကြတယ်။ မိမိအကောင်အထည် ဖော်ဆောင်မယ့် မူဝါဒတွေနဲ့ပတ်သက်လို့ အသင်းရဲ့အားကို ယူဖို့လည်းကြိုးစားကြတယ်။ ကျွန်တော်တို့ နိုင် ငံတွင်းကတော့ ကိုယ့်နိုင်ငံသားတွေအတွက် နယ်ပယ်အသီးသီးနဲ့ ပတ်သက်တဲ့ သိမှတ်စရာတွေ၊ ထုတ်စရာတွေ အများကြီးထုတ်ဖို့လိုအပ်နေပါသေးတယ်။

စာဖတ်ရမယ် စာဖတ်နေသေးတယ်ဆိုတာကတော့ လုပ်ပြီးခဲ့သမျှ ပြည်တွင်းစာအုပ်ပွဲတွေရဲ့ လူစိတ်ဝင်စားမှု ဝယ်လိုအားတွေကိုကြည့်ရင် ကျေနပ်အားရစရာပါ။ ထုတ်ဝေသူတွေဘက်က ကိုယ့်လောက တိုးတက်ဖို့ကတော့ ကောင်းမွန်မြန်ဆန်ပြီးထိရောက်မှုရှိတဲ့ ဖြန့်ချိရေးစနစ် ကျယ်ကျယ်ပြန့်ပြန့်ထွန်းကားအောင်လုပ်ဖို့ လိုအပ်နေပါတယ်။ ဒီနေရာမှာ စာတိုက်စနစ်ကောင်းဖို့ စာတိုက်စနစ်ကို အသုံးပြုပြီး တစ်နိုင်ငံလုံးကို တစ်အုပ်ချင်းအမှာကစပြီး ပို့နိုင်ဖို့ လိုအပ်ပါတယ်။ လော လောဆယ်မှာစာအုပ်ဆိုင်တွေ အများ ကြီးပေါ်ဖို့ဆိုတာ အလှမ်းဝေးနေပါသေးတယ်။ တစ်နိုင်လုံးမှာ ရှိတဲ့ စာဖတ်သူတွေလက်ထဲကို ဖြန့်ချိနိုင်ဖို့ အလွယ်ကူဆုံး အမြန်ဆုံးလုပ်နိုင်တာကတော့ စာတိုက်စနစ်ပါပဲ။ စာအုပ်တွေ အတွက် ပို့ခဈေးနှုန်း သက်သာဖို့ကတော့ အစိုးရက ပံ့ပိုးဖို့ လိုအပ်ပါတယ်။

ပေါ်ပြူလာနယူးစ်အဖွဲ့