PJSC”Tatneft” ကုမ္ပဏီနှင့်မြန်မာနိုင်ငံတို့ စွမ်းအင်လုပ်ငန်း များ၌ ရေရှည်ပူးပေါင်းဆောင်ရွက်သွားမည်
နစက ဥက္ကဋ္ဌမှ ကာဇန်မြို့ရှိ PJSC “Tatneft” ရေနံနှင့် သဘာဝဓါတ်ငွေ့ကုမ္ပဏီအမှုဆောင်အရာရှိချုပ် မစ္စတာနာအီးလ် အူဖာသောဗစ်ချ် မာဂါနော့ဗ်)အား ဇူလိုင် ၁၃ ရက်(ယနေ့)တွင် ခေတ္တတည်းခိုနေထိုင်လျက်ရှိသည့် သမ္မတအထူးဧည့်ဂေဟာ၊ ဧည့်ခန်းမဆောင်၌ လက်ခံတွေ့ဆုံဆွေးနွေးခဲ့သည်။
PJSC “Tatneft”ကုမ္ပဏီသည် ရုရှတွင် ပဥ္စမမြောက်အကြီးဆုံး ကုမ္မဏီဖြစ်ပြီးအမှုဆောင်အရာရှိချုပ်မှ ၎င်းတို့လုပ်ဆောင်နေမူများအား ရှင်းလင်းပြောကြားခဲ့သည်။
နစက ဥက္ကဋ္ဌမှလည်း မြန်မာနိုင်ငံ၏ လောင်စာဆီလိုအပ်ချက်နှင့်ဖြည့်ဆည်းဆောင် ရွက်နိုင်ရေးအတွက် စီမံဆောင်ရွက်လျက်ရှိသည့် အခြေအနေများ၊ “Tatneft”ကုမ္ပဏီနှင့်ပူးပေါင်းဆောင်ရွက်မှုများလုပ်ဆောင်နိုင်မည့် အခြေအနေများ၊ရေနံနှင့်သဘာဝဓာတ်ငွေ့အား အခြေခံသည့် ရင်းနှီးမြှုပ်နှံမှုဆိုင်ရာလုပ်ငန်းများကို ရေ ရှည်ပူးပေါင်းဆောင်ရွက်နိုင်မည့် အခြေအနေများအား ဆွေးနွေးပြောကြားခဲ့သည်။
ထို့ပြင် နစက ဥက္ကဋ္ဌသည် Kazan Hi-Technology Park(IT Park)သို့သွားရောက်၍ နည်းပညာရပ်ပိုင်းဆိုင်ရာများဖြင့်ပရိုဂမ် များရေးဆွဲ၍ လုပ်ငန်းဆောင်ရွက်လျက်ရှိမှုအား လေ့လာကြည့်ရှုခဲ့သည်။
ထိုသို့ လေ့လာကြည့်ရှာရာ တာဝန်ရှိသူများမှဌာနအလိုက် လုပ်ငန်းဆောင်ရွက်နေမှုများ၊ ဆောက်လုပ်ရေးလုပ်ငန်းများတွင် Smart House နည်းပညာအပါအဝင် လုံခြုံရေး၊ထိန်းချုပ်ရေးတို့နှင့်အခြားနည်းပညာရပ်ပိုင်းဆိုင်ရာတပ်ဆင်မှုများကို ရှင်းပြကြသည်။
Kazan Hi-Technology Park(IT Park)သည် ရုရှားနိုင်ငံ၏ ပထမဆုံးသော နည်းပညာဆိုင်ရာအဖွဲ့အစည်းတစ်ခုဖြစ်ကာ ၂၀၀၉ ခုနှစ်တွင်စတင်တည်ထောင်ခဲ့ခြင်းဖြစ်သည်။ ၄င်း နှင့်လက်တွဲလုပ်ကိုင်နေသည့် ၁၆ နိုင်ငံရှိကာ နည်းပညာကုမ္ပဏီ ၁၃၀ ခုရှိသောထိပ်တန်းအဖွဲ့အစည်း ဖြစ်သည်။
