အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နှင့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်းများဖြင့် ဖွဲ့စည်းထားသော NCA-S EAOs 7 EAO Alliance အဖွဲ့တို့သည် ဇွန်လ ၉ ရက်က တွေ့ဆုံဆွေးနွေးခဲ့ကြကြောင်း သိရသည်။
ဆွေးနွေးပွဲတွင် 7 EAO Alliance အဖွဲ့ခေါင်းဆောင် ဗိုလ်မှူးကြီးစိုင်းငင်း ဦးဆောင်သော ကိုယ်စားလှယ်အဖွဲ့နှင့် NSPNC တာဝန်ရှိသူများ တက်ရောက်ခဲ့ကြသည်။
ဗိုလ်မှူးကြီးစိုင်းငင်းက အစိုးရသစ်ဖွဲ့စည်းပြီးနောက် NSPNC အနေဖြင့် နိုင်ငံရေးပြဿနာများကို နိုင်ငံရေးနည်းလမ်းဖြင့် ဖြေရှင်းနိုင်ရေးနှင့် ငြိမ်းချမ်းရေးလုပ်ငန်းစဉ်များ အကောင်အထည်ဖော်ဆောင်ရွက်နိုင်ရေးအတွက် လွတ်လပ်ပြီး ကြိုတင်ကန့်သတ်ချက်မထားသည့် ဆွေးနွေးပွဲများ ပြုလုပ်ရန် တရားဝင်ဖိတ်ခေါ်မှုကို 7 EAO Alliance အနေဖြင့် ကြိုဆိုကြောင်း ပြောကြားခဲ့သည်။
“ဒီလိုဆောင်ရွက်ခြင်းဟာ အပြန်အလှန်ယုံကြည်မှု တည်ဆောက်ရာရောက်သလို အစိုးရသစ်ရဲ့ ငြိမ်းချမ်းရေးအပေါ် စိတ်အားထက်သန်မှုကိုလည်း ပြသရာရောက်တယ်လို့ မြင်ပါတယ်” ဟု ဗိုလ်မှူးကြီးစိုင်းငင်းက ပြောကြားသည်။
ထို့ပြင် လက်ရှိနိုင်ငံရေးနှင့် လုံခြုံရေးအခြေအနေများနှင့် ကိုက်ညီသည့် ငြိမ်းချမ်းရေးလုပ်ငန်းစဉ်ကို ပြန်လည်ဖော်ဆောင်နိုင်ရေး၊ ငြိမ်းချမ်းရေးလုပ်ငန်းစဉ်တွင် ပါဝင်သင့်သည့် အဖွဲ့အစည်းများ ပိုမိုပါဝင်လာနိုင်ရေးနှင့် ရေရှည်တည်တံ့ခိုင်မြဲသည့် ငြိမ်းချမ်းရေး တည်ဆောက်နိုင်ရေးတို့ကို ရည်မှန်း၍ 7 EAO Alliance အနေဖြင့် ငြိမ်းချမ်းရေးလုပ်ငန်းစဉ်ကို ဆက်လက်ဆောင်ရွက်ရန် သဘောထားရှိကြောင်းလည်း ပြောကြားခဲ့သည်။
အလွတ်သဘော တွေ့ဆုံဆွေးနွေးပွဲအတွင်း နှစ်ဖက်စလုံးက ငြိမ်းချမ်းရေးလုပ်ငန်းစဉ် ဖော်ဆောင်ရေးဆိုင်ရာ အစီအစဉ်များနှင့် သဘောထားများကို အပြန်အလှန် ရှင်းလင်းဆွေးနွေးခဲ့ကြပြီး ယင်းဆွေးနွေးမှုများသည် ရှေ့ဆက် ငြိမ်းချမ်းရေးလုပ်ငန်းစဉ်များ အကောင်အထည်ဖော်ရာတွင် အထောက်အကူပြုမည်ဟု ယုံကြည်ကြောင်း ဗိုလ်မှူးကြီးစိုင်းငင်းက ပြောကြားခဲ့သည်။
