တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)အား လက်မှတ်ရေးထိုးခဲ့သည်မှာ ယနေ့ အောက်တိုဘာ ၁၅ ရက်တွင် (၁၀)နှစ်ပြည့်မြောက်ခဲ့ပြီဖြစ်၍ (၁၀)နှစ်ပြည့် နှစ်ပတ်လည်နေ့အခမ်းအနားအား ယနေ့နံနက်ပိုင်းမှစတင်ကာ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီကဦးစီး၍ “ငြိမ်းချမ်းသောအနာဂတ်တည်ဆောက်ခြင်း”အလုပ်ရုံဆွေးနွေးပွဲအဖြစ်ကျင်းပလျက်ရှိသည်။
အလုပ်ရုံဆွေးနွေးပွဲတွင် NCA ၏ (၁၀)နှစ်တာကာလအတွင်း အကောင်အထည်ဖော်နိုင်မှုများ၊ အောင်မြင်မှုများနှင့် သင်ခန်းစာများ၊ ငြိမ်းချမ်းရေးလုပ်ငန်းစဉ်မှရရှိခဲ့သည့် အတွေ့အကြုံများနှင့် အမြင်များကိုမျှဝေ၍ အနာဂတ်မြန်မာနိုင်ငံတော်ကိုတည်ဆောက်ခြင်းလုပ်ငန်းစဉ်တွင် ငြိမ်းချမ်းရေး၊ နိုင်ငံရေး၊ လုံခြုံရေး၊ ဖွံ့ဖြိုးတိုးတက်ရေးနှင့် ရွေးကောက်ပွဲတို့ကိုပေါင်းစပ်ဆောင်ရွက်ရေးအတွက် NCA တွင် ပါဝင်ခဲ့ကြသူများ၊ ငြိမ်းချမ်းရေးနှင့် နိုင်ငံရေးဖြစ်စဉ်တွင်ပါဝင်ခဲ့ကြသူများ၊ ပါဝင်ပတ်သက်သူ Stakeholders များ၊ ပြည်တွင်း၊ ပြည်ပ ပညာရှင်များ၊ သတင်းမီဒီယာများ၊ ကဏ္ဍအသီးသီးမှ တက်ရောက်လာကြသူများက အမြင်သဘောထားများ၊ အတွေ့အကြုံများကို မျှဝေဖလှယ်ခြင်းနှင့် အလွတ်သဘောကျယ်ပြန့်စွာဆွေးနွေးမှုများပြုလုပ်သွားကြမည်ဖြစ်သည်။
အဆိုပါ NCA စာချုပ်ကို မြန်မာနိုင်ငံတော်အစိုးရနှင့် တိုင်းရင်းသားလက်နက်ကိုင်အဖွဲ့အစည်းများကြား ရေရှည်တည်တံ့ခိုင်မြဲသော ငြိမ်းချမ်းရေးကိုဖော်ဆောင်နိုင်ရန် သမိုင်းဝင်စာချုပ်အဖြစ် ၂၀၁၅ ခုနှစ်၊ အောက်တိုဘာ ၁၅ ရက်က လက်မှတ်ရေးထိုးခဲ့ခြင်းဖြစ်သည်။
အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီသည် ဒီမိုကရေစီနှင့်ဖက်ဒရယ်စနစ်တို့ကိုအခြေခံသည့် ပြည်ထောင်စုပေါ်ထွန်းရေးအတွက် ရေရှည်တည်တံ့ခိုင်မြဲသော ငြိမ်းချမ်းရေးအသိုက်အဝန်းတည်ဆောက်နိုင်ရန် နိုင်ငံတော်စီမံအုပ်ချုပ်ရေးကောင်စီနှင့် အမျိုးသားကာကွယ်ရေးနှင့်လုံခြုံရေးကောင်စီတို့၏ မူဝါဒများ၊ လမ်းညွှန်ချက်များနှင့်အညီ တိုင်းရင်းသားလက်နက်ကိုင်အဖွဲ့အစည်းများ၊ နိုင်ငံရေးပါတီများ၊ ငြိမ်းချမ်းရေးအကျိုးဆောင်အဖွဲ့များနှင့် ငြိမ်းချမ်းရေးလိုလားသူအဖွဲ့အစည်းများအား ကြိုတင်ကန့်သတ်ချက်များမထားဘဲ တွေ့ဆုံဆွေးနွေးခြင်း၊ ငြိမ်းချမ်းရေးစကားဝိုင်းများပြုလုပ်၍ အကျိုးရလဒ်များ၊ အကြံပြုချက်များအား အကောင်အထည်ဖော်ဆောင်ရွက်ခြင်းများကို ပြုလုပ်လျက်ရှိသည်။
NCA (၁၀)နှစ်ပြည့် နှစ်ပတ်လည်နေ့အခမ်းအနားအား နေပြည်တော်၌ ယနေ့ အောက်တိုဘာ ၁၅ ရက်မှ အောက်တိုဘာ ၁၇ ရက်အထိ ခေါင်းစဥ်အသီးသီးဖြင့် ကဏ္ဍအလိုက်ဆွေးနွေးမှုများနှင့်အတူ ကျင်းပသွားမည်ဖြစ်သည်။