MSME လုပ်ငန်းများအတွက် ချေးငွေလျှောက်နိုင်​ကြောင်း UMFCCI မှ အသိပေးထား

မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်ရှိ အသေးစား၊ အငယ်စားနှင့်အလတ်စားလုပ်ငန်းများ ဖွံ့ဖြိုးတိုးတက်ရေး ကော်မတီမှ MSME လုပ်ငန်းများ၌ Value Added Production ထုတ်ကုန်များ၊ သွင်းကုန်အစားထိုး ထုတ်ကုန်များ ထုတ်လုပ်လျက်ရှိသည့် လုပ်ငန်းများ ချေးငွေလျှောက်ထားနိုင်ကြောင်း ကုန်သည်စက်မှုအသင်းချုပ်မှ ထုတ်ပြန်ထားသည်။

အဆိုပါ ချေးငွေလျှောက်ထားရန်အတွက် ပြည်တွင်းလိုအပ်ချက်များ ဖြည့်ဆည်းပေးသည့် လုပ်ငန်းများ၊ သွင်းကုန်အစားထိုးနိုင်သည့် လုပ်ငန်းများနှင့် ပြည်ပသို့ တင်ပို့ရောင်းချနိုင်မည့် လုပ်ငန်းများကို ချေးယူခွင့်ပြုသွားမည်ဖြစ်ကြောင်း သိရသည်။

ယင်းချေးငွေအား ပြန်လည်ပေးဆပ်နိုင်မည့် ခိုင်လုံသော အခြေအနေရှိသော လုပ်ငန်းဖြစ်ရန်လိုအပ်ပြီး လုပ်ငန်း ဆက်လက် လည်ပတ်ရန်ကိစ္စအတွက်သာ အသုံးပြုမည့် လုပ်ငန်းဖြစ်ရမည် ဖြစ်ကြောင်းလည်း သိရသည်။

ထို့အပြင် ချေးငွေလျှောက်ထားရာ၌ ကုမ္ပဏီဖြစ်ပါက ယင်းကုမ္ပဏီမှတ်ပုံတင်ရုံးမှ မှတ်ပုံတင်စာရင်းမှ ဆိုင်းငံ့ထားခြင်းခံရသည့် ကုမ္ပဏီ သို့မဟုတ် မှတ်ပုံတင် စာရင်းပယ်ဖျက်ခြင်း ခံထားရသည့် ကုမ္ပဏီ မဖြစ်စေရန်လိုအပ်သည်။

ကုမ္ပဏီ မဟုတ်သော စီးပွားရေးလုပ်ငန်းဖြစ်ပါက သက်ဆိုင်ရာ အစိုးရဌာန/အဖွဲ့အစည်းက မှတ်ပုံ တင်စာရင်းမှဆိုင်းငံ့ထားခြင်းခံရသည့် သို့မဟုတ် မှတ်ပုံတင်စာရင်းမှ ပယ်ဖျက်ခြင်းခံထားရသည့် စီးပွားရေးလုပ်ငန်း မဖြစ်ရန် လိုအပ်ပြီး ဝင်ငွေခွန်/ကုန်သွယ်လုပ်ငန်းခွန်/အထူးကုန်စည်ခွန် ပေးဆောင်ထားသည့် ကုမ္ပဏီ သို့မဟုတ် လုပ်ငန်း ဖြစ်ရမည်ဖြစ်ကြောင်း သိရသည်။

ချေးငွေလျှောက်ထားရာတွင် ကုမ္ပဏီဖြစ်မည်ဆိုပါက ကုမ္ပဏီ၏ ဒါရိုက်တာအဖွဲ့နှင့် ကုမ္ပဏီမဟုတ်ပါက ချေးငွေရယူသည့် လုပ်ငန်းပိုင်ရှင်မှ ချေးငွေအား ပြန်လည်ပေးဆပ်ရန် အာမခံချက်ပေးနိုင်ရမည်ဖြစ်ပြီး ၂၀၂၁ ခုနှစ် မတ်လ (၃၁) ရက် မတိုင်မီက သက်ဆိုင်ရာဌာနမှ ခွင့်ပြုချက်/ လုပ်ငန်းလိုင်စင် ရထားပြီးဖြစ်သည့် လုပ်ငန်းဖြစ်ရမည်ဖြစ်သည်။

လွန်ခဲ့သည့် (၂) နှစ်တာ ကာလအတွင်း နှစ်စဉ်ဝင်ငွေရရှိနေသော လုပ်ငန်းဖြစ်ရမည်ဖြစ်သည့်အပြင် ဘဏ်တစ်ခုခုမှ ချေးငွေရယူထားပြီး ပြန်လည်ပေးဆပ်ရန် ပျက်ကွက်လျှက်ရှိသည့် လုပ်ငန်းများ၊ ချေးငွေပြန်လည်ပေးဆပ်ရန် ပျက်ကွက်မှုကြောင့် ဘဏ်တစ်ခုခုက တရားစွဲဆိုခြင်းခံထားရသည့် ကုမ္ပဏီ သို့မဟုတ် လုပ်ငန်းများ မဖြစ်စေရဟု ဖော်ပြထားသည်။

ထို့ပြင် ချေးငွေများ ပြန်လည်ပေးဆပ်နိုင်ခြင်းမရှိပါက တည်ဆဲဥပဒေများနှင့်အညီ အရေးယူဆောင်ရွက်မည်ဖြစ်ပြီး သတ်မှတ်ထားသည့် ချေးငွေအတွက် အဆိုပြုလျှောက်လွှာပုံစံများဖြင့် လျှောက်ထားရမည်ဖြစ်ကာ အဆိုပြုလျှောက်လွှာနှင့်အတူ ပူးတွဲပေးပို့ရန်ဖော်ပြထားသည့် စာရွက်စာတမ်း အချက်အလက် ပြည့်စုံစွာ ဖော်ပြရမည်ဖြစ်ကြောင်းလည်း သိရသည်။

လျှောက်လွှာများကို ၂၀၂၃ ခုနှစ်၊စက်တင်ဘာ (၃၀) ရက်နောက်ဆုံးထားကာ သတ်မှတ်ထားသည့် နေရာများ၌ အစိုးရ ရုံးဖွင့်ရက်များတွင် ရုံးချိန်အတွင်း လက်ခံသွားမည်ဖြစ်ပြီး သတ်မှတ်ချက်များနှင့် ပြည့်စုံကိုက်ညီခြင်း မရှိသည့်လျှောက်လွှာများကို လက်ခံဆောင်ရွက်ပေးမည်မဟုတ်ကြောင်းလည်း သိရသည်။