MOUလုပ်သားများတင်ဆောင်လာသည့်ကားအား ၂၂ဘီးယာဥ်၏ နောက်တွဲဖြင့်ရိုက်မိ၍ လူ ၁၁ ဦးထိခိုက်ဒဏ်ရာရရှိ
ထိုင်းနိုင်ငံသို့အလုပ်သွားရောက်လုပ်ကိုင်မည့် MOUလုပ်သားများတင်ဆောင်လာသည့် ယာဥ်အား ၂၂ဘီးတွဲကားယာဥ်က လမ်းအကွေ့တွင် နောက်တွဲဖြင့်ရိုက်မိသောကြောင့် MOUလုပ်သား ၁၀ဦးအပါအဝင် ယာဥ်မောင်းတစ်ဦး ထိခိုက်ဒဏ်ရာရရှိခဲ့ကြောင်း ကော့ကရိတ်အခြေစိုက်ပုလဲဖြူ လူမှုကူညီရေးအသင်းတာဝန်ခံ ကိုထိုက်ကပြောကြားသည်။
ယနေ့ သြဂုတ် ၄ ရက်နေ့ ညနေ ၄နာရီ ၁၅မိနစ်အချိန်ခန့်တွင် ကရင်ပြည်နယ် အာရှလမ်းမကြီးပေါ်ရှိ နတ်စင်ကွေ့မရောက်မီ အကွေ့တစ်ခုတွင် ဖြစ်ပွားခဲ့ခြင်းဖြစ်သည်ဟုဆိုသည်။
လက်ရှိတွင် ဒဏ်ရာရရှိသူ ၁၁ ဦးကို ကော့ကရိတ်ပြည်သူ့ဆေးရုံသို့အရေးပေါ်ပို့ဆောင်ထားပြီး၊ လိုအပ်ပါက ဘားအံပြည်သူ့ဆေးရုံသို့ပို့ဆောင်ရန်ရှိကြောင်းသိရသည်။
” ယာဥ်မောင်းကတော့ ကားထဲမှာညှပ်မိနေလို့ အောက်စီဂျင်ကျနေတယ်။ သူကတော့စိုးရိမ်ရတယ်ပေါ့။ MOUလုပ်သားအချို့ကကားပေါ်ကခုန်ချတဲ့သူတွေလည်းရှိနေတော့ လက်ကျိုးတာ၊ ခြေကျိုးတာနဲ့ နဖူးကွဲသူတွေလည်းရှိပါတယ်။ အသက်အန္တရာယ်အတွက်အနီ ရောင်အဆင့်သတ်မှတ်သူ နှစ်ဦးလောက်ရှိပါတယ်”ဟုဆိုသည်။
MOU လုပ်သားများတင်ဆောင်လာသည့်ယာဥ်တွင် လုပ်သားပေါင်း ၄၅ ဦးဝန်းကျင်ခန့်ပါဝင်နိုင်ပြီး၊ ၂၂ဘီးယာဥ်မောင်းမှာလည်း ရှာဖွေမတွေ့ရှိသေးကြောင်းဆိုသည်။
ယမန့်နေ့ သြဂုတ် ၃ရက်ည နေပိုင်းကလည်း ကရင်ပြည်နယ်၊ မြိုင်ကလေးနှင့် ဘားအံမြို့အကြား မြိုင်ကလေးကားလမ်းပေါ်တွင် အန်စာတုံးအမျိုးအစားယာဥ်တစ်စီးက ၁၀ဘီးယာဥ်တစ်စီးကို ဝင်တိုက်၍လမ်းလေးထိုးကျမှုဖြစ်စဥ်ဖြစ်ပွားခဲ့ပြီး၊လူငါးဦးထိခိုက်ဒဏ်ရာရရှိခဲ့သည်။
