KK Park မှ ထွက်ပြေးသည့် တရုတ်သုံးဦးကို ထိုင်းတွင် ဖမ်းမိ

မြန်မာနိုင်ငံ မြဝတီမြို့ရှိ KK Park အွန်လိုင်းငွေလိမ်လုပ်ငန်းမှ ထွက်ပြေးလာသည့် တရုတ်နိုင်ငံသားသုံးဦးကို ထိုင်းနိုင်ငံမြောက်ပိုင်း တာ့ခ်ပြည်နယ် နယ်စပ်တွင် ဖမ်းဆီးရမိခဲ့သည်။

မဲဆောက်ခရိုင် မဟာဝမ်မြို့နယ် နယ်စပ်တလျှောက်တွင် ကင်းလှည့်နေသည့် ထိုင်းရဲနှင့် စစ်သားများက ၎င်းတို့ကို ဖမ်းဆီးရမိခဲ့ခြင်းဖြစ်သည်။

တရုတ်နိုင်ငံသားသုံးဦးကို အမည်နာမထုတ်ပြန်ထားခြင်းမရှိဘဲ ၎င်းတို့သည် တောလမ်းမှတဆင့် ထိုင်းနိုင်ငံအတွင်း တရားမဝင် ဝင်ရောက်ခဲ့ကြောင်း ဝန်ခံခဲ့သည်။ တရားဥပဒေအရ အရေးယူဆောင်ရွက်နိုင်ရန်အတွက် ၎င်းတို့သုံးဦးကို မဲဆောက်ရဲစခန်းသို့ လွှဲပြောင်းပေးအပ်ခဲ့သည်။

မဲဆောက်၏ သောင်ရင်းမြစ်တစ်ဖက်ကမ်းရှိ KK Park လုပ်ငန်းခွင်သည် အကြမ်းအားဖြင့် ဧက ၅၀၀ ခန့်ကျယ်ဝန်းပြီး ယင်းကို တရုတ်ရာဇဝတ်မိသားစုများက စီမံခန့်ခွဲလျက်ရှိသည်။

ယင်းနေရာကို ယခုအခါ မြန်မာတပ်မတော်က ထိန်းချုပ်ထားပြီး အောက်တိုဘာလ ၂၂ ရက်နေ့မှစ၍ အဆောက်အအုံများစွာကို ဗုံးခွဲဖျ-က်ဆီးမှုများလုပ်နေခဲ့သည်။ ကြာသပတေးနေ့ကလည်း ထိုင်းဘက်ခြမ်းနှင့် ပိုနီးလာသောနေရာတွင် စစ်ဆင်ရေးဆောင်ရွက်ခဲ့သဖြင့် ထိုင်းအိမ်ထောင်စုတစ်ချို့ကို ဘေးကင်းရာ ရွှေ့ပြောင်းပေးခဲ့သည်။

ပြင်းထန်သော တို-က်ခိုက်နှိမ်နင်းမှုများလုပ်နေသော်လည်း တရုတ်ငွေလိမ်ဂိုဏ်းများသည် KK Park စီးနင်းမှု အကျိုးဆက်အများစုကို ရှောင်ရှားနိုင်ခဲ့ကာ မြန်မာပြည်တွင်းရှိ အခြားနီးစပ်ရာနေရာများသို့ ရွှေ့ပြောင်းနိုင်ခဲ့သည်ဟု ဒေသတွင်းသတင်းများအရ သိရသည်။ သို့ရာတွင် ထိုနေရာတွင် အလုပ်လုပ်နေကြသည့် အောက်ခြေအဆင့် နိုင်ငံခြားသားများမှာမူ နယ်စပ်ကိုဖြတ်၍ ဆက်လက်ထွက်ပြေးနေခဲ့ကြသည်။

Ref: ဘန်ကောက်ပို့စ်