အရွယ်မရောက်သေးသူများကို ကာမဂုဏ်ဖြင့် ဖျ-က်ဆီးမှုဖြင့် ပြစ်ဒ-ဏ်စီရင်ခံရပြီးနောက် ထောင်တွင်း၌ မိမိကိုယ်ကိုယ် အဆုံးစီရင်သွားသည့် Jeffrey Epstein ၏ အမှုတွဲဆိုင်ရာ အချက်အလက်များကို ပြည်ထောင်စု စုံစမ်းစစ်ဆေးရေးဗျူရို (FBI)က စတင်ထုတ်ပြန်လိုက်ပြီ ဖြစ်သည်။
Epstein ကို ၂၀၁၉ ခုနှစ်၊ ဇူလိုင်လတွင် နယူးယောက်ပြည်နယ် ဥပဒေစိုးမိုးရေးအဖွဲ့က ဖမ်းဆီးခဲ့သည်။ ၎င်းသည် ၂၀၀၂ ခုနှစ်မှ ၂၀၀၅ ခုနှစ်အတွင်း အသက် ၁၄ နှစ်အရွယ် အငယ်ဆုံးမိန်းကလေးများ အပါအဝင် အရွယ်မရောက်သေးသည့် မိန်းကလေးငယ် အများအပြားကို မန်ဟက်တန်ရှိ ၎င်း၏နေအိမ်သို့ လာရောက်ရန် စီစဉ်ခဲ့ကြောင်း အစိုးရရှေ့နေရုံးက အစီရင်ခံခဲ့သည်။
Epstein ၏ မိတ်ဆွေများနှင့် အသိအကျွမ်းများထဲတွင် အမေရိကန်ပြည်ထောင်စုမှသာမက အခြားနိုင်ငံအများအပြားမှ လက်ရှိနှင့် အငြိမ်းစား အစိုးရအရာရှိကြီးများ၊ နိုင်ငံတော်အကြီးအကဲဟောင်းများ၊ ထိပ်တန်းစီးပွားရေးလုပ်ငန်းရှင်များနှင့် အနုပညာလောကမှ နာမည်ကျော်များစွာ ပါဝင်နေသည်။ Epsteinအပေါ် ရာဇဝတ်ကြောင်းအရ တရားစွဲဆိုမှုသည် ၂၀၁၉ ခုနှစ်၊ ဩဂုတ်လတွင် ၎င်း၏အကျဉ်းထောင်အခန်းအတွင်း မိမိကိုယ်ကိုယ် အဆုံးစီရင်သွားပြီးနောက် အဆုံးသတ်သွားခဲ့သည်။
နိုဝင်ဘာလ ၂၀ ရက်နေ့တွင် အမေရိကန်သမ္မတ ဒေါ်နယ်ထရန့်က Jeffrey Epstein နှင့် ပတ်သက်သော အမှုတွဲဖိုင်များကို ထုတ်ပြန်ရန် တရားရေးဝန်ကြီးဌာနကို ဖိအားပေးစေမည့် ဥပဒေကြမ်းတစ်ခုအား လက်မှတ်ရေးထိုးခဲ့ကြောင်း သူ၏ Truth Social လူမှုကွန်ရက်စာမျက်နှာတွင် ပြောကြားခဲ့သည်။