H-1B ဗီဇာအငြင်းပွားမှုတွင် ထရမ့်ပ်က အီလွန်မက်စ်ကို ထောက်ခံ

အမေရိကန်ရွေးကောက်ခံသမ္မတ ဒေါ်နယ်ထရမ့်ပ်သည် H-1B ဗီဇာအစီအစဉ်နှင့်ပတ်သက်၍ သူ၏ နိုင်ငံရေးအတွင်းစည်းအတွင်း တင်းမာမှုများမြင့်တက်နေမှုတွင် Tesla စီအီးအိုဘက်မှ ရပ်တည်ကာ ယင်းဗီဇာအစီအစဉ်ကို ထောက်ခံပြောဆိုသွားခဲ့သည်။ ပြည်ပကျွမ်းကျင်လုပ်သားများကို အမေရိကန်ကုမ္ပဏီများက အလုပ်ခန့်ထားနိုင်စေသည့် အဆိုပါ အစီအစဉ်သည် တင်းကျပ်သော လူဝင်မှုကြီးကြပ်ရေးမူဝါဒများကို ထောက်ခံအားပေးသော ထရမ့်ပ်ဘက်တော်သားကြားတွင် အငြင်းပွားစရာများ ဖြစ်ပေါ်စေသည်။

“ငါပိုင်လုပ်ငန်းတွေမှာ H-1B ဗီဇာသမားတွေ အများကြီးရှိပါတယ်၊ ငါက H-1B ကို ယုံကြည်သူတစ်ယောက်ပါ၊ ဒါကို အကြိမ်ကြိမ် အသုံးပြုခဲ့ပါတယ်။ သိပ်ကောင်းတဲ့ အစီအစဉ်ပါ” ဟု ထရမ့်ပ်က သည်နူးယော့ခ်ပို့စ်ကို ပြောကြားခဲ့သည်။

ဗီဇာအစီအစဉ်အပေါ် လက်ယာစွန်းတက်ကြွလှုပ်ရှားသူများ၏ ဝေဖန်မှုများကို ခုခံကာကွယ်သွားမည်ဟု မတ်စ်က တုန့်ပြန်ခဲ့ပြီးနောက်တွင် ထရမ့်ပ်၏ မှတ်ချက်ထွက်လာခြင်းဖြစ်သည်။ အိန္ဒိယ-အမေရိကန်လုပ်ငန်းရှင်တစ်ဦးကို ထရမ့်ပ်က ညဏ်ရည်တု(AI) ဆိုင်ရာ အကြံပေးပုဂ္ဂိုလ်အဖြစ် ခန့်အပ်ရန် ဆုံးဖြတ်ခဲ့သည့်အတွက် လူဝင်မှုကြီးကြပ်ရေးဆိုင်ရာမူဝါဒများအပေါ် သက်ရောက်လာနိုင်သည်ဆိုကာ ထိုတက်ကြွလှုပ်ရှားသူများက မေးခွန်းထုတ်ခဲ့ကြသည်။

H-1B အစီအစဉ်ကို ထရမ့်ပ်က လက်ခံသဖြင့် သူ၏ ထောက်ခံသူများအကြားတွင် သဘောထားကွဲလွဲမှုများကို ဖြစ်စေခဲ့သည်။ စတိဗ်ဘန်နွန်ကဲ့သို့သော ထင်ရှားသူများက နည်းပညာကဏ္ဍတွင် နိုင်ငံခြားအလုပ်သမားများအပေါ် မှီခိုအားထားနေမှုကို ဝေဖန်ခဲ့ပြီး အဆိုပါအစီအစဉ်သည် အမေရိကန်များအတွက် လုပ်ခလစာကို လျော့ကျစေသည်ဟု စွပ်စွဲခဲ့သည်။

အဆိုပါကိစ္စတွင် မတ်စ်သည် မသိနားမလည်သည့် ကလေ-းငယ်တစ်ဦးသာဖြစ်သည်ဟု ဘန်နွန်က ဆိုခဲ့ပြီး H-1B ဗီဇာကိုင်ဆောင်သူများကို နည်းပညာကုမ္ပဏီကြီးများက အသုံးချနေသော အစေခံကျွန်များဟု သုံးနှုန်းခဲ့သည်။

မတ်စ်သည် အတိတ်က H-1B ဗီဇာကိုင်ဆောင်သူတစ်ဦးဖြစ်ပြီး သူ၏ Tesla ကုမ္ပဏီသည် ယခုနှစ်တွင် အဆိုပါဗီဇာအမျိုးအစားကိုင်ဆောင်သူ ၇၂၄ ဦးရရှိခဲ့သည်။ အမေရိက၏ ယှဉ်ပြိုင်နိုင်စွမ်းကို ထိန်းထားရန် အဆိုပါ အစီအစဉ်သည် မရှိမဖြစ်လိုအပ်သည်ဟု သူက အခိုင်အမာဆိုခဲ့သည်။ နိုင်ငံရပ်ခြားမှ အင်ဂျင်နီယာကျွမ်းကျင်ပညာရှင်များကို ဆွဲဆောင်ခြင်းသည် အမေရိက၏ ယှဉ်ပြိုင်နိုင်စွမ်း၌ ဆက်လက် အားသာနေစေရေးအတွက် မရှိမဖြစ်လိုအပ်သည်ဟု မတ်စ်က သူ့ကိုယ်ပိုင်ဆိုရှယ်မီဒီယာ X ပေါ်တွင် ပြောဆိုခဲ့သည်။

Ref: သည်အီကော်နောမစ်တိုင်းမ်စ်