မီးလောင်မှုဖြစ်ပွားသည့် အကြောင်းရင်းအား စုံ စမ်းစစ်ဆေးဆဲဖြစ်ပြီး သိရှိရသည့် အထောက်အထားများအရ မတော်တဆလောင်ကျွမ်းမှုဖြစ်ကြောင်းယူဆရသည်ဟု Grand Royal ကထုတ်ပြန်ခဲ့သည်။
ရန်ကုန်တိုင်း၊မှော်ဘီမြို့နယ်၊လိပ်ပုတ်ကျေးရွာ၊အမှတ်(၄)လမ်းမကြီးရှိ Grand Royal အရက်ချက်စက်ရုံ၌ ဇန်နဝါရီ ၁၃ ရက်နေ့လည်ပိုင်းက လောင်ကျွမ်းခဲ့သည့် မီးလောင်မှုဖြစ်စဥ်နှင့်ပတ် သက်၍ Grand Royal Group International Co.,Ltd (GRGI)မှ ဇန်နဝါရီ ၁၆ ရက်(ယနေ့)တွင် ထုတ်ပြန်ခဲ့ခြင်းဖြစ်သည်။
ကုမ္ပဏီအနေဖြင့် မီးလောင်မှုဖြစ်စဥ်အတွက် ဒေသဆိုင်ရာအာဏာပိုင်များနှင့်ပူးပေါင်းဆောင်ရွက်လျက်ရှိကာ သက်ဆိုင်ရာ အာမခံကုမ္ပဏီများနှင့်လည်း သင့်တော်သော ဆုံးရှုံးမှု ပမာဏအတွက်ဆွေးနွေးလျက်ရှိသည်ဟု ထုတ်ပြန်ချက်၌ ရေးသားထားသည်။
မီးလောင်မှုသည် အရက်သိုလှောင်သိမ်းဆည်းရာနေရာမှ စတင်လောင်ကျွမ်းခဲ့ခြင်းဖြစ်ပြီး သို လှောင်ထားသည့် ၉၆ ရာခိုင်နှုန်းအရက်ကြမ်းများ၊အရက်ဖျော်စပ်ရာတွင်အသုံးပြုသည့် Tank ကြီးများ ပျက်စီးဆုံးရှုံးခဲ့သည်။
မီးလောင်ကျွမ်းမှုတွင် ပင်မအရက်ချက်စက်ရုံ၊ပုလင်းသွင်းစက်ရုံနှင့်နှစ်ချို့အရက်စည်များ အ ခြမ်းသို့ ကူးစက်လောင်ကျွမ်းခဲ့ခြင်းမရှိကြောင်း Grand Royal ကထုတ်ပြန်သည်။
“ကျွန်တော်တို့အနေနဲ့ မီးလောင်မှုဖြစ်စဉ်အတွင်း ဝိုင်းဝန်းကူညီပေးခဲ့ကြသူများအားလုံးကို အထူးပဲ ကျေးဇူးတင်ပါတယ် GRGI က စီမံအုပ်ချုပ်မှုအဖွဲ့က လိုအပ်တဲ့ လုပ်ဆောင်မှုတွေကိုဆောင်ရွက်နေပါတယ် ဖေဖော်ဝါရီလ နောက်ဆုံးထားပြီး လုပ်ငန်းတွေ ပြန်လည်စတင်နိုင်မယ်လို့ ခန့်မှန်းထားပါတယ် စျေးကွက်ထဲမှာ ပစ္စည်းပြတ်လတ်မှု မရှိရအောင် ကုန်ပစ္စည်းဖြန့်ဖြူးသူတွေနဲ့ စနစ်တကျလုံလောက်တဲ့ ကုန်ပစ္စည်းတွေထားရှိပြီး ဖြစ်ပါတယ်”ဟု GRGI ၏ CEO ရာဟူးလ်ဂျွန်ကိုလာကိုလ်က ပြောသည်။
Grand Royal အခက်ချက်စက်ရုံမီးလောင်မှုဖြစ်စဥ်တွင် မီးသတ်သူရဲကောင်းများနှင့် စေတနာ့ ဝန် ထမ်း ၁၉ ဦးထိခိုက်ဒဏ်ရာရရှိခဲ့ပြီး ဆေးရုံတွင် ဆေးကုသမှုခံယူလျက်ရှိရာမှ ၁၇ ဦးမှာ ဆေးရုံမှဆင်းခွင့်ရခဲ့ပြီး ကျန် ၂ ဦးမှာ စိုးရိမ်ရသည့် အခြေအနေမရှိတော့ဟု Grand Royal ၏ထုတ်ပြန်ချက်အရ သိရသည်။