မြန်မာ့ပထမဆုံး ပြည်တွင်း Esports Application ဖြစ်သည့် Eternity Esports Mobile Application မှ Falcon Esports အား Gold Sponsorship ပေးအပ်ခဲ့ကြောင်း သိရသည်။
Falcon Esports အား Gold Sponsorship ပေးအပ်ခြင်းကို ဇူလိုင်လ ၁၃ ရက်က ရန်ကုန်မြို့ Wyndham Grand Hotel တွင် ကျင်းပခဲ့သော မိတ်ဆက်ပွဲအခမ်းအနားတွင် ပေးအပ်ခဲ့ခြင်းဖြစ်သည်။
“ကျွန်တော်တို့အနေနဲ့ မြန်မာ Local Application ဖြစ်တဲ့ Eternity Mobile Application ကို Esports Community Application အဖြစ်နဲ့ ပထမဆုံး ခြေလှမ်းစတင်နိုင်ခဲ့ပါပြီ။ လက်ရှိအသင်းကြီးတွေထဲက တစ်သင်းဖြစ်ပြီး ပြည်တွင်းမှာရော နိုင်ငံတကာမှာပါ ပြိုင်ပွဲအတွေ့အကြုံတွေရှိတဲ့ Falcon Esports ကို Gold Sponsorship အနေနဲ့ Support ပေးရတာကိုလည်း ဝမ်းသာဂုဏ်ယူမိပါတယ်။ Falcon Esports ဟာ အရင်ကတည်းက နိုင်ငံတကာမှာ အောင်မြင်မှုတွေရခဲ့တယ်။ အခုလည်း နောက်တက်လာမယ့် လူငယ်တွေကို ပံ့ပိုးပေးနေတာ တွေ့ရတယ်။ ကျွန်တော်တို့ကလည်း လူငယ်တွေကို တတ်နိုင်တဲ့ဘက်ကနေ ပံ့ပိုးပေးချင်တဲ့ ရည်ရွယ်ချက်ချင်းတူလို့ အခုလိုစီစဉ်ဖြစ်သွားတာပါ” ဟု Eternity Mobile Application မှ Chief Operations Officer ကိုအောင်ခန့်ဇော်က ပြောကြားသည်။
အဆိုပါ Application တွင် ဂိမ်းများနှင့်ပတ်သက်၍ Eternity မှ ကျင်းပသော ပြိုင်ပွဲများကို ဝင်ရောက်ယှဉ်ပြိုင် ကြည့်ရှုနိုင်မည်ဖြစ်ပြီး တစ်ကြိမ် Register လုပ်ပြီး Profile ဖွင့်ထားသူများအနေဖြင့် ပြိုင်ပွဲတစ်ခုစီတိုင်းအတွက် Register ထပ်လုပ်စရာမလိုဘဲ မည်သည့်ပြိုင်ပွဲကိုမဆို ပါဝင်နိုင်ကြောင်းနှင့် အသင်း၊ အုပ်စုများဖွဲ့၍ ပြိုင်ပွဲများယှဉ်ပြိုင်နိုင်ခြင်း၊ Esports သတင်းများကို အချိန်နှင့်တပြေးညီဖတ်ရှုနိုင်ခြင်း၊ နာမည်ကျော် ပြည်တွင်း Esports အသင်းများ၏ အမှတ်တရလက်ဆောင် ပစ္စည်းအမျိုးမျိုးကို ဝယ်ယူနိုင်ခြင်းတို့ လုပ်ဆောင်နိုင်ကြောင်း သိရသည်။
“အခုလို Eternity Mobile Application ကနေ Gold Sponsorship ကို လက်ခံရရှိတဲ့အတွက် ကျေးဇူးတင်ပါတယ်။ Eternity ဟာ Esports Community မှာ အရွေ့တစ်ခုအနေနဲ့ စတင်မိတ်ဆက်နိုင်ခဲ့တာကိုလည်း ဝမ်းသာဂုဏ်ယူမိပါတယ်။ အဓိက,ကတော့ မြန်မာနိုင်ငံအတွင်းမှာရှိတဲ့ Esports အမျိုးမျိုးက ဝါသနာရှင်တွေကို တစ်နေရာတည်းမှာ စုပေးထားတာဖြစ်တဲ့အတွက် Esports ကို စိတ်ဝင်စားတဲ့ လူငယ်တွေအနေနဲ့ အခွင့်အလမ်းကောင်းတွေ ရရှိလာမယ်လို့ ယုံကြည်ပါတယ်” ဟု Falcon Esports မှ General Manager ကိုထက်လွင်ဦး ကပြောကြားသည်။
အဆိုပါ Application သည် မြန်မာနိုင်ငံ Esports Community ၏ခြေလှမ်းသစ်တစ်ခု စတင်ခြင်းဖြစ်၍ Esports ကို စိတ်ဝင်စားသော လူငယ်များနှင့် စီးပွားရေးလုပ်ငန်းရှင်များအတွက် အခွင့်အလမ်းကောင်းများကို ဖန်တီးနိုင်မည့် နေရာသစ်တစ်ခု ဖြစ်လာနိုင်ကြောင်း သိရသည်။
