‘ခါးပတ်တစ်ကွင်း လမ်းတစ်စင်း’ဟု လူသိများသည့် တရုတ်၏ BRI စီမံကိန်းမှ မြန်မာဘက်ခြမ်း၏ အစိတ်အပိုင်းတစ်ခုဖြစ်သည့် ကျောက်ဖြူရေနက်ဆိပ်ကမ်းစီမံကိန်းကို မကြာင်ခင် စတင်နိုင်တော့မည့် အခြေအနေသို့ ရောက်ရှိနေပြီဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီး ဦးအောင်နိုင်ဦးက တရုတ်မီဒီယာဖြစ်သည့် CGTN မေးမြန်းခန်းတွင် ထည့်သွင်းပြောကြားခဲ့သည်။
အဆိုပါ စီမံကိန်းများ တပြိုက်နက်တည်း ဆောင်ရွက်သွားမည်ဆိုပါက မြန်မာနိုင်ငံ၏ ကုန်သွယ်မှုနှင့် အလုပ်အကိုင်အခွင့်အလမ်းအတွက် ယခင်ထက်ပို၍ အကျိုးအမြတ်အများအပြားရရှိမည်ဖြစ်ကြောင်းလည်း ၎င်းကဆိုသည်။
ကျောက်ဖြူအထူးစီးပွားရေးဇုန်၏ တစိတ်တပိုင်းဖြစ်သည့် ရေနက်ဆိပ်ကမ်းစီမံကိန်း မူဘောင် သဘောတူညီချက်ကို ပြီးခဲသည့် ၂၀၁၈ ခုနှစ်တွင် မြန်မာအစိုးရနှင့် တရုတ်အစိုးရပိုင် CITIC Consortium တို့ စာချုပ်ချုပ်ဆိုခဲ့ခြင်းလည်းဖြစ်သည်။
လက်ရှိတွင် ရေနက်ဆိပ်ကမ်း စီမံကိန်းအတွက် အကောင်အထည်ဖော်လုပ်ဆောင်ရန် သဘာဝပတ်ဝန်းကျင်နှင့် လူမှုစီးပွားအပေါ် အကျိုးသက်ရောက်မှု၊ နစ်နာမှုဆိုင်ရာဆန်းစစ်ချက် EIA ၊ SIA စစ်တမ်းများကို စမ်းသပ်ခြင်းများကို စတင်လုပ်ဆောင်နေပြီဖြစ်ကြောင်းလည်း သိရသည်။
ကျောက်ဖြူရေနက်ဆိပ်ကမ်းကို မဒေးကျွန်းတွင် မီတာ ၂၅၀၀ အကျယ်နှင့် အနံ မီတာ ၆၀၀ ရှိသည့် ဆိပ်ကမ်းနှင့် ရမ်းဗြဲကျွန်းတွင် မီတာ ၁၅၀၀ အကျယ်နှင့် မီတာ ၆၀၀ အနံရှိသည့် ဆိပ်ကမ်း စသည်ဖြင့် တည်ဆောက်သွားမည်ဖြစ်ပြီး အဆိုပါ ကျောက်ဖြူရေနက်ဆိပ်ကမ်းသည် ပေ ၁၀၀၀ အထက် Mother Vessels၊ Carriers၊ Super Tankers စသည့်ကုန်တင်သင်္ဘောကြီးများ ဝင်ထွက်သွားလာနိုင်သည့် ရေနက်ဆိပ်ကမ်းအမျိုးအစား ဖြစ်သည်။
“Belt and Road Initiative က မြန်မာနိုင်ငံတော်နဲ့ မြန်မာနိုင်ငံသားတွေအတွက် အကျိုးရှိမယ့် ကိစ္စမျိုးဆို အားလုံးပါဝင်ဆောင်ရွက်သွားမှာဖြစ်ပါတယ်’”ဟု ဦးအောင်နိုင်ဦးက ပြောသည်။
အဆိုပါ စီမံကိန်းအတွက် တရုတ်အစိုးရ လက်အောက်ခံ CITIC က ရှယ်ယာ ၇၀ ရာခိုင်နှုန်း ထည့်ဝင်ကာ အမေရိကန်ဒေါ်လာ ၁.၃ ဘီလီယံ အသုံးပြုရန်လျာထားပြီးကျောက်ဖြူရေနက်ဆိပ်ကမ်းစီမံကိန်း မူဘောင်သဘောတူညီချက်အရ အဆင့် (၄) ဆင့်နှင့် ဆောင်ရွက်သွားမည်ဖြစ်ပြီး ပထမအဆင့်အဖြစ် သင်္ဘောကျောက်ချရပ်နားစခန်း၊ ဆိပ်ခံတံတား (၂) ခုကို တည်ဆောက်ရန် လျာထားကြောင်း သိရသည်။
Photo credit – Silk Road Briefing/ HKUST IEMS
