Cyber Security ဆိုင်ရာ လုံခြုံရေးစနစ်များ ထပ်မံမြှင့်တင်နေပြီး သုံးစွဲသူများ၏ ဘဏ္ဍာရေးဆိုင်ရာ အချက်အလက်များ ဘေးကင်းလုံခြုံစွာ ရှိနေကြောင်း AYA Bank ထုတ်ပြန်
AYA Bank က အသုံးပြုခဲ့သည့် Application Portal အဟောင်းတစ်ခုမှ ငွေကြေးဆိုင်ရာမဟုတ်သော လျှောက်လွှာအချက်အလက်အချို့ ပြင်ပသို့ ပေါက်ကြားခဲ့သည့် ဖြစ်စဉ်တစ်ခု ဖြစ်ပွားခဲ့ကြောင်း AYA Bank က ထုတ်ပြန်ကြေညာခဲ့သည်။
AYA Bank ၏ ထုတ်ပြန်ချက်အရ အဆိုပါ Portal သည် ဘဏ်၏ Core Banking System၊ AYA Pay System၊ Card System စသည့် ပင်မစနစ်များနှင့် တိုက်ရိုက်ချိတ်ဆက်ထားခြင်း မရှိကြောင်း၊ ထို့ကြောင့် အခြားစနစ်များ ထိခိုက်မှုမရှိဘဲ AYA Pay နှင့် Internet Banking/Mobile Banking ဝန်ဆောင်မှုများကို ပုံမှန်အတိုင်း လုံခြုံစွာ ဆက်လက်အသုံးပြုနိုင်ကြောင်း သိရသည်။
ဘဏ်က သုံးစွဲသူများ၏ အချက်အလက်လုံခြုံရေးကို အမြဲဦးစားပေး ဆောင်ရွက်လျက်ရှိသော်လည်း ယခုဖြစ်စဉ်ကြောင့် သုံးစွဲသူများ စိတ်အနှောင့်အယှက် ဖြစ်ပေါ်ခဲ့ပါက အနူးအညွတ်တောင်းပန်အပ်ပါကြောင်းလည်း ထုတ်ပြန်ချက်တွင် ဖော်ပြထားသည်။
ထို့ပြင် Cyber Security ဆိုင်ရာ လုံခြုံရေးစနစ်များကို ထပ်မံမြှင့်တင်ဆောင်ရွက်လျက်ရှိကြောင်းနှင့် သုံးစွဲသူများ၏ ဘဏ္ဍာရေးဆိုင်ရာ အချက်အလက်များမှာ ဘေးကင်းလုံခြုံစွာ ရှိနေကြောင်း AYA Bank က အလေးအနက် အသိပေးထားသည်။
AYA Bank က ၎င်း၏ ဝန်ဆောင်မှုများကို ယုံကြည်စိတ်ချစွာ ဆက်လက်အသုံးပြုနိုင်ကြောင်း ထပ်လောင်းအသိပေးခဲ့ပြီး သုံးစွဲသူများ၏ နားလည်ပေးမှုနှင့် ပူးပေါင်းဆောင်ရွက်မှုအတွက် ကျေးဇူးတင်ရှိကြောင်း ထုတ်ပြန်ထားသည်။