Category: Movies

ကျောင်းသား၊ ကျောင်းသူ လူငယ်များအနေဖြင့် အမှိုက်များကို စနစ်တကျ စွန့်ပစ်သည့် အသိစိတ်ဓာတ် (Mindset) ရရှိလာသည်အထိ ပညာပေးဆောင်ရွက်သွားရန် လိုအပ်ကြောင်း အမျိုးသားအဆင့် ရေအရင်းအမြစ်ကော်မတီဥက္ကဋ္ဌ၊ နိုင်ငံတော်သမ္မတ ဦးမင်းအောင်လှိုင်က ပြောကြားသည်။ ယနေ့ (ဇွန် ၉ ရက်) ကျင်းပသည့် အမျိုးသားအဆင့် ရေအရင်းအမြစ်ကော်မတီ အစည်းအဝေးတွင် ရေထုညစ်ညမ်းမှုနှင့် ပတ်သက်၍ ထိုသို့ ထည့်သွင်းပြောကြားခဲ့ခြင်းဖြစ်သည်။ ကျောင်းနေအရွယ်မှစတင်၍ ရေ၏တန်ဖိုးကို နားလည်သိရှိစေရန် လိုအပ်ကြောင်း၊ အမှိုက်များကို စနစ်တကျ မစွန့်ပစ်ခြင်းကြောင့် ရေထုညစ်ညမ်းမှုများ ဖြစ်ပေါ်လာရသည်ကိုလည်း သိရှိနားလည်စေရန် ပညာပေးသင်ကြားရမည်ဖြစ်ကြောင်း ၎င်းက ပြောသည်။ ထို့ကြောင့် စာသင်ကျောင်းများတွင် အမှိုက်များကို စနစ်တကျ စွန့်ပစ်တတ်စေရေးအတွက် ဆရာ၊ ဆရာမများ၏ ကြီးကြပ်လမ်းညွှန်မှုဖြင့် ပညာပေးဆောင်ရွက်သွားရန် လိုအပ်ကြောင်း ပြောကြားခဲ့သည်။ “ကျောင်းသား၊ ကျောင်းသူ လူငယ်တွေအနေနဲ့ အမှိုက်ကို စနစ်တကျ စွန့်ပစ်တဲ့ Mindset ရရှိလာတဲ့အထိ ဆောင်ရွက်ပေးကြရမှာ ဖြစ်ပါတယ်” ဟု နိုင်ငံတော်သမ္မတက ဆိုသည်။ ထို့ပြင် ရှိပြီးသား ရေအရင်းအမြစ်များကို အကျိုးရှိရှိ စနစ်တကျ အသုံးချနိုင်ရေး ဆောင်ရွက်ရန် လိုအပ်ကြောင်းနှင့် သဘာဝက ပေးအပ်ထားသည့် ကမ္ဘာ့အမွေအနှစ်နှင့် မြန်မာ့အမွေအနှစ်များဖြစ်သည့် အင်းတော်ကြီးကန်နှင့် အင်းလေးကန်တို့ကို အမျိုးသားရေးတာဝန်တစ်ရပ်အဖြစ် ထိန်းသိမ်းစောင့်ရှောက်ရန် လိုအပ်ကြောင်းလည်း ပြောကြားခဲ့သည်။ ထို့အတူ ရေဝေရေလဲသစ်တောများနှင့် ဆည်တာတမံများကို စနစ်တကျ ထိန်းသိမ်းစောင့်ရှောက်ရန် လိုအပ်ကြောင်း၊ ရေအရင်းအမြစ်များကို ထိန်းသိမ်းပေးနိုင်သည့် သစ်ပင်များကိုလည်း ရှင်သန်ဖြစ်ထွန်းလာစေရေး စိုက်ပျိုးဆောင်ရွက်ရမည်ဖြစ်ကြောင်း နိုင်ငံတော်သမ္မတက...